Psalms 27

balinese

1Ida Sang Hyang Widi Wasa punika dados galang miwah karahayuan titiange. Titiang nenten ajerih ring sapasira jua. Ida Sang Hyang Widi Wasa nyayubin titiang saking sakancaning baya, tur titiang nenten jaga naenin ajerih.

2Yening jadmane dursila ngebug tur mamanah ngamademang titiang, ipun katanjung tur labuh.

3Yadianja upami sawatek wadua balane ngiter titiang, titiang nenten pacang ajerih. Yadianja upami meseh-mesehe punika ngebug titiang, titiang jaga pageh pracaya ring Ida Sang Hyang Widi Wasa.

4Wenten pinunas titiange asiki ring Ida Sang Hyang Widi Wasa. Wantah asiki kewanten sane dotang titiang, inggih punika pageh magenah ring purin Ida Sang Hyang Widi Wasa sakantun titiang urip, buat muponin sakancan kabecikan Idane miwah nunas tantanan Idane.

5Ring sajeroning kamewehan, Ida jaga nawengin titiang. Ida jaga miara titiang saha rahayu ring Perhyangan Agung Idane, tur Ida ngluputang titiang ring duur gunung batune sane tegeh.

6Punika awinannyane titiang jaga molih kamenangan marep ring meseh-meseh titiange sane ngiter titiang. Maduluran suryak kaliangan titiang jaga ngaturang aturan titiange ring Perhyangan Agung Idane. Titiang jaga makidung, tur muji Ida Sang Hyang Widi Wasa.

7Duh Ratu Sang Hyang Widi Wasa, pirengja atur titiange, rikala titiang matur ring Palungguh IRatu. Suecanin tur saurinja titiang!

8Rikala Palungguh IRatu ngandika: “Maija sumbah Ulun,” titiang masaur sapuniki: “Inggih Ratu Sang Hyang Widi Wasa, titiang nyadia tangkil.

9Sampunangja Palungguh IRatu nyingidang raga ring titiang!” Sampunangja Palungguh IRatu duka ring titiang, tur sampunangja Palungguh IRatu nilar kaula druene. Palungguh IRatu sampun dados panulung titiange. Sampunangja nilar miwah ngutang titiang. Duh Ratu Sang Widi Wasa, juru rahayun titiange.

10Yadianja meme bapan titiange ngutang titiang, nanging Ida Sang Hyang Widi Wasa jaga matiningin titiang.

11Duh Ratu Sang Hyang Widi Wasa, urukja titiang ngamargiang paindikan sane arsayang Palungguh IRatu, tur tuntunja titiang sapanjang margi sane rahayu, santukan titiang akeh maderbe meseh.

12Sampunang IRatu ngentungang titiang ring meseh-meseh titiange sane ngebug titiang antuk bobab miwah kawirosan.

13Titiang uning mungguing titiang jaga ngeton kabecikan Ida Sang Hyang Widi Wasa santukan titiange urip ring mrecapada.

14Pracayaja ring Ida Sang Hyang Widi Wasa. Pracayaja, tur sampunangja nenten maderbe pangajap-ajap. Pracayaja ring Ida Sang Hyang Widi Wasa!

← Chapter 26 Chapter 28 →