Psalms 26

balinese

1Duh Ratu Sang Hyang Widi Wasa, sinahangja mungguing titiang tan paiwang santukan titiang nglaksanayang paindikan sane patut, tur saking saguluking manah titiang pracaya ring Palungguh IRatu.

2Duh Ratu Sang Hyang Widi Wasa, pintonin tur ujija titiang. Tepasinja manah miwah pepineh titiange.

3Sih pasuecan Palungguh IRatu sane tan rered-rered punika dados panuntun titiange, tur kasatia tuonan Palungguh IRatune tansah nuntun titiang.

4Titiang nentenja sruron ring jadmane sane tan paguna. Titiang nenten magubugan ngajak anak sane mapi-mapi.

5Titiang geting ring sakancan jadmane sane corah tur titiang ngedohang dewek saking jadmane dursila.

6Duh Ratu Sang Hyang Widi Wasa, titiang masehin liman titiange, buat muktiang mungguing titiang tan paiwang, tur titiang mapeed ngilehin pamorboran aturan Palungguh IRatune.

7Titiang ngaturang kidung atur panyuksma, tur nyritayang sakancan pakardin Palungguh IRatune sane becik-becik.

8Duh Ratu Sang Hyang Widi Wasa, titiang tresna bakti ring wisma linggih Palungguh IRatune, inggih punika wisma linggih kaluihan Palungguh IRatune.

9Sampunangja titiang sirnayanga sinarengan ring jadmane madosa. Dohangja titiang saking pala karman jadmane sane amati-mati,

10inggih punika jadmane sane tan mari malaksana corah tur sane setata sedia nampi tetombokan.

11Mungguing titiang puniki, titiang tan mari nglaksanayang paindikan sane patut. Ledang Palungguh IRatu asung sueca ring titiang tur rahayuangja titiang.

12Titiang luput saking saananing baya. Titiang muji Ida Sang Hyang Widi Wasa ring arepan pauman kaulan Idane.

← Chapter 25 Chapter 27 →