Psalms 13

balinese

1Duh Ratu Sang Hyang Widi Wasa, malih makapidanke suenipun Palungguh IRatu pacang lali ring titiang? Punapike salami-laminipun? Malih makapidanke suenipun Palungguh IRatu pacang nyingidang ragan Palungguh IRatu ring titiang?

2Malih makapidanke suenipun titiang patut nandang kamewehan? Malih makapidanke suenipun manah titiange kaliput antuk kaduhkitan siang latri? Malih makapidanke suenipun meseh-meseh titiange pacang unggul ring titiang?

3Duh Ratu Sang Hyang Widi Wasa, Widin titiange, cingakja titiang, tur daginginja pinunas titiange. Waliangja malih kakuatan titiange. Sampunangja titiang banggayanga padem.

4Sampunangja lugraina meseh-meseh titiange mabaos mungguing ipun sampun ngaonang titiang. Sampunangja icena ipun marasa bingar ngeton kasinangkaonan titiange.

5Titiang andel pisan ring suecan Palungguh IRatu sane tan papegatan. Titiang jaga bungah ring manah santukan Palungguh IRatu pacang ngrahayuang titiang.

6Duh Ratu Sang Hyang Widi Wasa, titiang jaga ngaturang kidung ring ayun Palungguh IRatu, santukan Palungguh IRatu sampun kalintang sueca ring titiang.

← Chapter 12 Chapter 14 →