Psalms 12

balinese

1Duh Ratu Sang Hyang Widi Wasa, icenja titiang pitulungan. Nenten wenten kantun jadma sane patut, tur nenten wenten malih kakeniang jadma sane jujur.

2Ipun sareng sami sampun pada saling bobabin sareng timpalnyane. Ipun pada saling apus sareng timpalnyane antuk baos nyunyur manis.

3Duh Ratu Sang Hyang Widi Wasa, bungkemangja bungut anake sane demen nglelunyuh punika! Ngepangja bungut anake sane sumbung, sane mabaos kadi asapuniki:

4“Aji raos iraga nyidayang maan apaja ane kenehang iraga. Iraga lakar ngorahang apaja ane dotang iraga, tur tusing ada anak ane nombahang iraga.”

5Ida Sang Hyang Widi Wasa masabda kadi asapuniki: “Nanging ane jani Ulun lakar tumurun sawireh anake ane tiwas pada kala-ala muah anake kasangsaran pada masesambatan. Ulun maicayang karahayuan ane edotanga teken ia.”

6Janjin Ida Sang Hyang Widi Wasa patut pisan andelang. Janjine punika waluya sakadi perak sane murni sane kasepuh kantos ping pitu ring prapene.

7Ring dija-dija kewanten wenten jadma corah, tur ipun pada muji paindikan sane jaat. Duh Ratu Sang Hyang Widi Wasa, raksaja titiang mangda titiang setata rahajeng, tur sayubinja titiang saking jadmane sane kadi asapunika.

← Chapter 11 Chapter 13 →