Psalms 102

balinese

1Duh Ratu Sang Hyang Widi Wasa, pirengangja pangastawan titiange, tur pirengangja panulamen titiange.

2Yening titiang katempuh antuk kakewuhan, sampunangja Palungguh IRatu nilar titiang! Pirengangja atur titiange tur daginginja digelis pinunas titiange.

3Urip titiange sirna waluya sakadi andus, tur dewek titiange ngendih waluya geni murub.

4Titiang kakaonang waluya sakadi padange sane tuh, tur titiang nenten wenten manah jagi nunas pangan kinum.

5Titiang gelur-gelur daah-duuh. Titiang tan bina sakadi kulit lan tulang kewanten.

6Titiang tan bina sakadi paksine sane rengas ring tegal melakange, sakadi paksi clepuk ring genahe sane uug.

7Titiang mabahan nanging nenten dados pules. Titiang waluya sakadi paksine ngesil padewekan ring neb umahe.

8Arahina mepek meseh-meseh titiange nganistayang titiang. Jadmane sane nganistayang titiang ipun nemah misuh nganggen wastan titiange.

9Malantaran piduka miwah bebendun Palungguh IRatune, kenginan buk sane dados tetedan titiange, tur toya sane inem titiang madukan sareng yeh matan titiange. Palungguh IRatu ngambil titiang, tur ngentungang titiang malih.

11Tuuh titiange waluya sakadi lawate rikalaning sore. Titiang tan bina sakadi padang sane tuh.

12Nanging Palungguh IRatu, duh Ratu Sang Hyang Widi Wasa, Palungguh IRatu maraga Sang Nata Ratu salami-laminipun. Sakancan katurunan manusane jaga ngelingang Palungguh IRatu.

13Palungguh IRatu jaga matangi tur mapaica sih sueca ring Sion. Sampun rauh panemayan Palungguh IRatu kawelas arsan ring ipun. Puniki dauh sane becik.

14Parakaulan Palungguh IRatu pada tresna ring ipun, yadiastun ipun sampun rusak. Kaulan Palungguh IRatu pada madalem ipun yadiastu ipun sampun uug.

15Parabangsane jaga ajerih ring Ida Sang Hyang Widi Wasa. Sawatek pararatune ring jagate taler jaga ajerih ring kawisesan Idane.

16Rikala Ida Sang Hyang Widi Wasa malih ngwangun Sion punika, Ida jaga nyinahang kagungan Idane.

17Ida jaga mirengang kaulan Idane sane tan lingu ring Ida, tur jaga mirengang pangastawan ipune.

18Suratangja pabuat katurunan sane jaga rauh, saluiring paindikan sane sampun kakardi antuk Ida Sang Hyang Widi Wasa, mangda jadmane sane durung embas jaga muji Ida.

19Ida Sang Hyang Widi Wasa macingak saking genah sane suci sane wenten ring luur. Ida macingak saking suargan ka mrecapada.

20Ida mirengang panulamen jadmane sane mapangkeng, tur mebasang jadmane sane katibenin danda pati.

21Duaning punika parab Idane jaga kacritayang ring Sion, tur Ida jaga kaluihang ring Yerusalem,

22rikala parabangsane miwah parakaprabone pada rauh mapunduh tur mabakti ring Ida Sang Hyang Widi Wasa.

23Ida Sang Hyang Widi Wasa sampun nadosang titiang tan pabayu rikala titiang kantun wimuda. Ida sampun nyutetang tuuh titiange.

24Duh Ratu Sang Hyang Widi Wasa, sampunangja ngambil titiang, sadurunge titiang tua. Duh Ratu Sang Hyang Widi Wasa, Palungguh IRatu sane nyeneng kantos salami-laminipun.

25Sane nguni Palungguh IRatu ngardi pretiwi, tur antuk tangan Palungguh IRatune, Palungguh IRatu ngardi akasa.

26Akasa miwah pretiwine jaga sirna, nanging Palungguh IRatu jaga kantun. Ipun makasami jaga buuk sakadi panganggene. Palungguh IRatu jaga ngentungang ipun sakadi ngutang pangangge tur ipun jaga sirna.

27Nanging Palungguh IRatu kantun tetep manggeh nenten uah-uah, tur yusan Palungguh IRatune nenten wenten watesipun.

28Pianak-pianak titiange urip kerta raharja, tur sajeroning pasayuban Palungguh IRatune katurunanipune jaga pada sutrepti.

← Chapter 101 Chapter 103 →