Psalms 101

balinese

1Duh Ratu Sang Hyang Widi Wasa, titiang makidung ngeniang indik kasatian miwah kadilan, tur titiang ngidungang paindikane punika pabuat Palungguh IRatu.

2Tingkah solah titiange nenten pacang wenten cedanipun. Malih pidanke Palungguh IRatu ngrauhin titiang? Titiang jaga urip tan pateleteh ring cecanggahan titiange,

3tur nenten jaga sruron ring kadursilan. Titiang geting ring solah jadmane sane lempas saking ayun Ida Sang Hyang Widi Wasa. Nenten wenten sane nyandang laksanayang titiang sareng-sareng ring ipun.

4Titiang nenten pacang ngambekang manah sane nenten jujur, tur nenten pacang masidikara ngajak kadursilan.

5Titiang jaga ngaonang jadmane sane makisi-kisi maosang paindikan sane dura cara marep ring timpalnyane. Titiang nenten jaga sruron ring jadmane sane sumbung miwah ngagu.

6Titiang jaga makanti ring jadmane sane satia tuu ring Ida Sang Hyang Widi Wasa, tur jaga manggayang ipun madunungan ring cecanggahan titiange. Inggih punika jadmane sane sawiakti jujur. Ipun jaga kenken titiang ngayahin dewek titiange.

7Nenten jaga wenten jadma bobab sane madunungan ring cecanggahan titiange, tur nenten wenten jadma mapi-mapi sane jaga kantun ring arepan titiange.

8Nyabran rahina titiang jaga nyirnayang jadma sane dursila saking jagat titiange. Titiang jaga nundung sawatek jadmane sane dursila, saking kota druen Ida Sang Hyang Widi Wasa.

← Chapter 100 Chapter 102 →