Job 34

balinese

1Semeton anak sane kalintang wicaksana, tur kalintang pradnyan. Sane mangkin pirengangja atur tiange.

3Semeton uning ring ajeng-ajengan sane becik rikala semeton sampun nyicipin ajengane punika, nanging semeton nenten uning ring baos sane wicaksana, yening wantah miragiang kewanten.

4Sane mangkin iraga sane kapisara buat mastikayang paindikane punika.

5Dane Ayub mariangken, mungguing dane tan paiwang, nanging Ida Sang Hyang Widi Wasa nenten kayun ngicen dane kadilan.

6Dane mataken sapuniki: ‘Sapunapiang tiang jagi mobab, tur mabaos mungguing tiang puniki iwang? Tiang sampun katatunin raat pisan, nanging tiang nenten madosa.’

7Inggih semeton Ayub, punapike semeton naenin ngaksi jadma sane kadi asapunika? Ipun nenten naenin madue rasa bakti ring Ida Sang Hyang Widi Wasa.

8Ipun sakadi rombongan jadmane dursila, tur ngumbara sareng-sareng ring jadmane sane dosa.

9Ipun mabaos mungguing tan wenten gunanipun jaga ngiringang pakarsan Ida Sang Hyang Widi Wasa.

10Duaning punika, semeton sane madue pangresepan pada pirengangja atur tiange! Punapike Ida Sang Hyang Widi Wasa ledang nglaksanayang paindikan sane iwang?

11Ida mapaica ganjaran ring anake manut ring laksanan ipun, tur ngajiang ipun sakadi amun patutipun.

12Ida Sang Hyang Widi Wasa Sane Maha Wisesa nenten nglaksanayang paindikan sane jaat. Ida nenten naenin tan adil ring sapasira jua.

13Punapike Ida Sang Hyang Widi Wasa molih kakuasaan saking anak lian? Punapike wenten anak sane misarayang jagate puniki ring Ida?

14Yening Ida Sang Hyang Widi Wasa ngambil angkihane punika,

15kenginan sawatek sane murip jaga padem tur jaga mawali malih dados abu.

16Sane mangkin, yening wiakti semeton wicaksana, pirengangja atur tiange.

17Punapike semeton mapikayun nyisipang Ida Sang Hyang Widi Wasa sane patut? Punapike pitaenang semeton, mungguing Ida geting ring kadilan?

18Ida Sang Hyang Widi Wasa nyisipang pararatu miwah parapamrentah, yening ida dane pada tan maguna wiadin dursila.

19Ida nentenja ngilonin pamrentahe wiadin ngroangin anake sugih marep ring anake tiwas, santukan Ida sane ngardi dane miwah ipun sareng sami.

20Jadmane nyidayang nadak padem rikalaning wengi. Ida Sang Hyang Widi Wasa manteg manusane tur ipun raris padem. Tan pasrana Ida mademang manusane.

21Ida ngaksi sakancan tindakan manusane.

22Tan wenten peteng dedet, amunapija petengipune jaga mrasidayang ngilidang jadmane madosa ring ayun Ida Sang Hyang Widi Wasa.

23Ida Sang Hyang Widi Wasa nenten buat mastikayang dauh sane pasti pabuat imanusa jaga tangkil buat nunas tetepasan ring Ida.

24Ida nenten buat ngwentenang panureksan, buat jaga ngingsirang parapamimpine tur ngentosin antuk anak lianan.

25Santukan Ida wikan ring laksanan ipune. Ida nyabatang tur ngenyagang ipun rikala wengi.

26Ida nyisipang jadmane madosa ring genah sane kapanggihin antuk jadmane akueh.

27Santukan ipun pada wusan ngiring Ida tur nenten nglinguang pituduh-pituduh idane,

28ipun pada ngawinang anake sane tiwas-tiwas pada jerit-jerit nunas ica ring Ida Sang Hyang Widi Wasa, tur Ida mirengang pinunas icanipune.

29Yening Ida Sang Hyang Widi Wasa mastikayang nenten nglaksanayang punapa-punapi, sirake sane mrasidayang ngiwangang Ida. Yening Ida ngengkebang wedanan Idane, jadmane nenten jaga maderbe pitulungan.

30Nenten wenten paindikan sane nyidayang kalaksanayang antuk bangsa-bangsane, buat jaga ngandeg penjajahe sane tan pawidi sane mamanah mrentah ipun.

31Inggih semeton Ayub, punapike semeton sampun ngangkenin dosa-dosan semetone ring ayun Ida Sang Hyang Widi Wasa tur majanji jaga nenten malih ngardi dosa?

32Punapike semeton sampun mapinunas ring Ida Sang Hyang Widi Wasa, mangda Ida ledang nyinahang kiwangan-kiwangan semetone? Samaliha punapike semeton sampun adung jaga wusan malaksana dursila?

33Santukan semeton tulak ring indik sane kamargiang antuk Ida Sang Hyang Widi Wasa, sapunapiang semeton jaga mrasidayang nyantos Ida buat jaga nglaksanayang paindikan sane edotang semeton? Kaputusan puniki wantah ring ragan semetone, boya ring dewek tiange. Sane mangkin nikayang ring tiang sareng sami, sapunapi pakayunan semetone?

34Sakancan anake sane pradnyan sinah jaga adung. Saananing anake sane wicaksana sane mireng atur tiange jaga maosang,

35mungguing semeton Ayub jaga mabaos ulihan nenten uning ring punapa-punapi, tur saananing baos danene tan wenten pikenohipun.

36Indayangja telebang mikayunin, saananing sane kabaosang antuk Dane Ayub. Semeton jaga uning mungguing dane mabaos punika tan bina sakadi jadmane dursila.

37Dosan danene wewehin dane malih antuk pembrontakan. Ring arep iraga sareng sami dane nganistayang Ida Sang Hyang Widi Wasa.

← Chapter 33 Chapter 35 →