Job 33

balinese

1Inggih semeton Ayub, sane mangkin becikang miragiang saananing sane jaga aturang tiang.

2Tiang sampun sedia jaga nguningayang daging manah tiange.

3Sakancan baos tiange punika saking jujur, tur tiang maosang indik kapatutan.

4Roh Ida Sang Hyang Widi Wasa sane ngardi tiang, tur mapaica urip ring tiang.

5Yening semeton mrasidayang, indayang saurin baos tiange. Rarisang dabdabang pakayunan semetone, buat nindihin ragan semetone.

6Semeton miwah tiang pateh ring ayun Ida Sang Hyang Widi Wasa. Iraga sareng kalih pateh kakardi antuk tanah legit.

7Punika awinannya semeton nenten patut ajerih ring tiang, tiang nenten jaga nyapa kadi aku ring semeton.

8Sane mangkin tiang sampun miragi baos semetone kadi asapuniki:

9‘Tiang nenten iwang. Tiang nenten wenten makardi paindikan sane iwang. Tiang tan paiwang tur bebas saking dosa.

10Nanging Ida Sang Hyang Widi Wasa polih dadalan nglawan tiang, tur nadosang tiang meseh Idane.

11Ida negul buntut tiange antuk ante, tur nlektekang sakancan pajalan tiange.’

12Inggih semeton Ayub, nanging tiang nguningayang ring semeton, sayuaktinipun, semeton iwang. Ida Sang Hyang Widi Wasa maraga agungan ring sakancan manusane.

13Napi awinannya semeton ngiwangang Ida Sang Hyang Widi Wasa, rehning Ida nenten nyaurin atur piuning manusane?

14Yadiastun Ida Sang Hyang Widi Wasa mawali-wali ngandika, nenten wenten anak sane nglinguang paindikan sane nikayang Ida.

15Rikalaning wengi, risedek jadmane pada pules, Ida Sang Hyang Widi Wasa ngandika masrana ipian miwah antuk kamewehan.

16Ida ngawinang ipun pada miragiang sabdan Idane tur nengkejutang ipun antuk panglemek Idane.

17Ida Sang Hyang Widi Wasa ngandika mangda anake wusan ngardi dosa miwah ngluputang ipun mangda sampunang ipun sombong.

18Ida nenten ledang manggayang ipun kasirnayang. Ida ngrahayuang ipun saking pati.

19Ida Sang Hyang Widi Wasa nglemekin manusane masrana nurunang pinakit, tur ngebekin awak ipune antuk rasa sakit.

20Jadmane sane sakit, ipun nenten maderbe manah jaga madaar, samaliha yadiastun dedaaran sane pinih becik, taler ngawinang ipun seneb.

21Awakipune sayan ngameragang, kantos semeton mrasidayang ngaksi sakancan tulang-tulangipune.

22Ipun sampun makire ngungsi jagat anake padem.

23Sajawining menawi wenten malaekat adiri sane rauh mapaica pitulungan ring ipun, inggih punika adiri saking pantaran panyiuan malaekat Ida Sang Hyang Widi Wasa, malaekat sane matinget imanusa, ngeniang indik tetegenanipune.

24Maduluran antuk sih kapiolasan malaekate punika jaga mabaos sapuniki: ‘Bebasangja ipun! Ipun durung patut ngungsi jagat jadmane sane padem. Puniki jinah panebusipune, mangdane ipun prasida bebas.’

25Awakipune jaga malih kukuh bakuh tur muda.

26Yening ipun ngastawa, Ida Sang Hyang Widi Wasa jaga ledang nagingin pangastawanipune. Ipun jaga astiti bakti ring Ida Sang Hyang Widi Wasa maduluran manah liang. Ida Sang Hyang Widi Wasa pacang ngamanggehang malih kapatutanipune.

27Ipun jaga mabaos ring ajeng pasamuane, kadi asapuniki: ‘Tiang sampun madosa. Tiang sampun nenten nglaksanayang paindikan sane patut, nanging Ida Sang Hyang Widi Wasa ngrahayuang tiang.

28Ida ngambil tiang, mangda nenten ngungsi genah anake sane padem, mawinan tiang kantun urip.’

29Ida Sang Hyang Widi Wasa mawali-wali nglaksanayang sakancan paindikan.

30Ida ngrahayuang urip anake tur Ida mapaica urip sane bungah ring ipun.

31Inggih semeton Ayub, sane mangkin pirengangja atur tiange. Menengja tiang jaga matur.

32Nanging yening wenten paindikan sane sandang baosang semeton, becikan tiang jaga miragiang baos semetone. Tiang saking liang ngwastanin semeton anak sane patut.

33Nanging yening nenten wenten, rarisang meneng tur pirengangja atur tiange, tur tiang jaga ngaturin semeton, sapunapi caranipun mangda prasida dados wicaksana.

← Chapter 32 Chapter 34 →