Job 22

balinese

1Dane Elipas raris nyaurin kadi asapuniki: “Punapike wenten anak yadiastun ipun anak sane pinih wicaksana, sane naenin mrasidayang maguna pabuat Ida Sang Hyang Widi Wasa?

3Punapike laksanan semetone sane patut punika ngledangin pakayunan Ida Sang Hyang Widi Wasa, wiadin punapike pakardin semetone sane ayu punika mrasidayang nulungin Ida?

4Boyaja malantaran semeton ajerih ring Ida Sang Hyang Widi Wasa, Ida raris nglemekin semeton miwah makta semeton sajeroning gegodan.

5Nenten pisan kadi asapunika. Nanging mula wantah malantaran semeton sampun ngardi dosa sane kalintang akeh. Punika uli krana sakancan laksanan semetone sane dursila.

6Mangdane semeton ragane naur ring semeton antuk sakancan jinah sane derbeang ipun, kenginan semeton raris ngambil panganggennyane kantos tan wenten sane angge ipun.

7Semeton mucingin toya anake sane bedak, tur semeton mucingin dedaaran anake sane seduk.

8Semeton migunayang kakuasan miwah linggih semetone buat jaga ngambil tanahe makasami.

9Semeton nenten wantah tan kayun matulung ring anake sane balu-balu, nanging semeton taler ngrampas miwah nyakitin anake sane ubuh-ubuh.

10Duaning punika sane mangkin wenten bangbang bencana sane ngiter semeton tur tan pasangkan semeton kaliput antuk katakutan sane banget pisan.

11Kenginan tanahe sayan peteng dedet kantos semeton nenten mrasidayang manggihin punapa-punapi tur blabare rauh ngulung semeton.

12Boyake Ida Sang Hyang Widi Wasa malinggih ring langite sane pinih tegeh, tur macingakan tedun ring bintang-bintange, yadiastun bintang-bintange punika sampun tegeh?

13Nanging semeton mabaos sapuniki: ‘Napi sane kuningin antuk Ida Sang Hyang Widi Wasa? Ida sampun kilidin antuk ambun, sapunapi jaga antuk Ida nepasin iraga?’

14Pitaenang semeton mungguing ambune sane tebel mrasidayang nawengin pangaksian Idane, rikala Ida mamargi ring wates pretiwi klawan akasane.

15Punapike semeton jaga mamargi ring pamargine sane sampun katuut antuk jadmane sane dursila?

16Yadiastun durung rauh masanipun, ipun kanyudang antuk blabare.

17Punika makasami jadma sane tempal ring Ida Sang Hyang Widi Wasa, sane pracaya mungguing Ida Sang Hyang Widi Wasa nenten mrasidayang ngudiang-ngudiang marep ring ipun.

18Ida Sang Hyang Widi Wasa ngawinang ipun muponin kawibuhan. Tiang nenten nyidayang ngresep ring pepineh jadmane dursila.

19Jadmane sane becik pada liang, tur jadmane sane tan paiwang pada kedek rikala manggihin jadmane dursila keni pasisip.

20Sakancan paderbean jadmane sane dursila makasami jaga kasirnayang, tur genine ngeseng saluiring sane kantun masisa.

21Inggih semeton Ayub, sane mangkin madameja ring Ida Sang Hyang Widi Wasa tur wusanja nganggep Ida meseh semetone. Yening semeton nglaksanayang indike punika janten Ida jaga ngamertanin semeton.

22Trimaja paurukan sane paicayang Ida, tur agemja sabdan Idane ring angen semetone.

23Dadosipun, semeton patut ngasorang raga mawali tangkil ring Ida Sang Hyang Widi Wasa, samaliha kutang tur wusanja malaksana sane dursila, sakadi sane kalaksanayang ring pumahan semetone.

24Kutangja mas semetone. Entungangja mas semetone sane pinih becika ring dasar tukade sane tuh.

25Banggayang Ida Sang Hyang Widi Wasa Sane Maha Kuasa dados mas semetone, tur banggayang Ida dados perak semetone, sane madugdug-dugdug pabuat semeton.

26Kenginan semeton jaga setata andel ring Ida Sang Hyang Widi Wasa, tur semeton jaga uning mungguing Ida punika dados wit kaliangan semetone.

27Yening semeton ngastawa, Ida jaga nagingin pinunas semetone, tur semeton jaga naur sesangi sane aturang semeton.

28Semeton jaga labda karya saparilaksanan semetone, tur pamargin semetone jaga kasinarin antuk galang.

29Ida Sang Hyang Widi Wasa ngasorang jadmane sane sumbung, tur ngrahayuang sane ngalap asor.

30Ida jaga ngluputang semeton, yening semeton nenten maderbe kiwangan, yening sakancan laksanan semetone mula patut.”

← Chapter 21 Chapter 23 →