Job 21

balinese

1Dane Ayub raris masaur sapuniki: “Indayangja pirengang atur tiange. Indike punika sujatinipun dados panglipur pabuat tiang saking semeton.

3Icenja tiang sela buat mabaos sapangrarisipun. Yening baos tiange nglantur, rarisang semeton ngewerin tiang.

4Pasogsag tiange boyaja nglawan manusa pada. Mawinan tiang nenten sabar, punika wenten awinanipun.

5Indayangja cingakin tiang! Punapike panlektek semetone punika nenten cukup jaga ngawinang semeton meneng tan pasangkan?

6Yening tiang ngrasayang paindikan sane nibenin tiang, kenginan tiang klenger miwah ngetor bebuyutan.

7Punapi awinannya Ida Sang Hyang Widi Wasa nglugrain jadmane dursila punika urip, tur ngicen ipun tuuh kantos tua miwah muponin kawibuhan?

8Ipun maderbe pianak miwah cucu tur ipun ngempuang pianak miwah cucunipune kantos pada kelih.

9Ida Sang Hyang Widi Wasa nenten nibakang bencana ring pumahanipune. Ipun nenten ngrasayang urip sane ngresresin.

10Samaliha ingon-ingonipune pada endah-gumendah tur nenten naenin meweh nglekadang panak.

11Pianakipune pada malaib-laiban miwah macanda sakadi biri-birine,

12tur pada ngigel nuutang suaran gegambelan rebab miwah sulinge.

13Ipun nutugang tuuh saha sutrepti ngantos padem saha rahayu, tur nenten mataanan.

14Jadmane dursila punika mapinunas mangda Ida Sang Hyang Widi Wasa ledang nilarin ipun, mangdane ipun kantun padewekan kewanten. Ipun nenten mamanah uning ring pakarsan Ida Sang Hyang Widi Wasa sane numplek ring uripipune.

15Ipun marasa nenten perlu astiti bakti ring Ida Sang Hyang Widi Wasa, tur nenten wenten pikolihipun astiti bakti ring Ida.

16Ipun maosang mungguing ipun prasida labda karya antuk kakuatanipune niri, nanging tiang nenten mrasidayang nampi pepinehipune punika.

17Naeninke sundih jadmane dursila ical, punapike naenin salah tunggal saking pantaranipune manggihin pakewuh? Punapike naenin Ida Sang Hyang Widi Wasa nyisipang jadmane dursila antuk pidukan Idane,

18miwah ngampehang ipun sakadi gumpange ampehang angin, wiadin sakadi buk sane kakeberang antuk angin ribute?

19Semeton mapinunas mangda Ida Sang Hyang Widi Wasa nyisipang ipianak duaning dosa-dosan bapanipune. Boyaja kadi asapunika. Banggayang Ida nyinahang ring ipun, mungguing Ida nibakang pasisip punika uli krana dosa-dosanipune newek.

20Banggayang jadmane dursila punika negen pasisip ipune niri. Banggayang ipun ngrasayang temah Ida Sang Hyang Widi Wasa Sane Maha Kuasa.

21Yening tuuh manusane sampun puput, punapike ipun kantun lingu ring kawentenan pianak-pianakipune, punapike ipun liang punapi nenten?

22Punapike manusane mrasidayang nguruk Ida Sang Hyang Widi Wasa sane nepasin jadmane, yadianja ipun jadma sulinggih?

23Wenten makudang-kudang anak sane padem sajeroning ipun kantun siteng. Ipun padem saking liang tur nenten mataanan, tur sawanipune kapreteka saha becik.

25Wenten sane lianan, sane nenten pisan naenin ngrasayang kaliangan. Ipun urip miwah padem maduluran manah sane duhkita.

26Nanging makasami ipun pateh pada-pada padem miwah pada-pada katanem. Ipun makasami pada kaliput antuk icacing.

27Tiang uning ambate iri atin pakayunan semetone.

28Semeton mataken, ring dija purin anake agung sane mangkin, inggih punika anake sane malaksana dursila.

29Punapike semeton nenten mabebaosan ring anake sane maleluasan? Punapike semeton nenten uning ring gatra sane bakta ipun?

30Ring rahina Ida Sang Hyang Widi Wasa nibakang piduka miwah pasisip, kenginan jadmane sane dursila setata ipun luput.

31Tan wenten anak ngiwangang anake sane dursila, wiadin makolihin laksananipune.

32Rikala ipun kabakta ka bangbang setrane, ka kuburipune sane kajaga saha sregep,

33panyiuan jadmane marerod nututin sawanipune, samaliha pretiwine saha dabdab nekepin sawanipune.

34Tur semeton puniki, semeton ngindayang nglipur tiang antuk paindikan sane tan papuara. Sakancan pasaur semetone punika makasami bobab.”

← Chapter 20 Chapter 22 →