Job 13

balinese

1Saluiring sane baosang semeton, sami pada naenin piragi tiang. Punika makasami sampun karesep antuk tiang, amunapija sane uningin semeton, kadi asapunika taler tiang uning. Tiang nenten pisan kasoran ring semeton.

3Nanging tiang puniki mawicara ngiring Ida Sang Hyang Widi Wasa, boyaja nglawan semeton. Tiang misadia maosang wicaran tiange ngiring Ida.

4Semeton ngangkebin kanambetan semetone antuk bobab. Semeton tan bina sakadi balian sane nenten mrasidayang nyegerang anak.

5Becikan semeton meneng kewanten, tur banggayang anak lian sane maosang semeton wicaksana.

6Indayangja pirengang tiang nartayang wicaran tiange.

7Napi awinane semeton mobab. Punapike pitaenang semeton, mungguing bobab semetone punika jaga ngawinang aget Ida Sang Hyang Widi Wasa?

8Punapike semeton mapakayun jaga nindihin Ida? Punapike semeton jaga matindihin wicaran Idane ring pangadilan?

9Yening Ida Sang Hyang Widi Wasa nlektekang semeton, punapike wenten sane becik cingak Ida ring ragan semetone? Punapike pitaenang semeton, mungguing semeton mrasidayang nguluk-uluk Ida Sang Hyang Widi Wasa, sakadi semeton melog-melog manusa?

10Yadiastunja pepineh semetone sane nenga-nenga punika tan sinah, Ida sinah jaga nglemekin semeton,

11tur kawisesan Idane jaga nglikub semeton antuk katakutan.

12Slokan semetone jaga tan paguna sakadi abune, tamiang semetone jaga dekdek sakadi tanah legite.

13Menengja semeton, tur icenja tiang sela buat mabaos, tur banggayang napija sane jaga nibenin dewek tiange, jaga tolak tiang.

14Tiang sampun sedia ngetohang angkihan tiange.

15Tan wenten malih sane ajap-ajap tiang, tan wenten alangannyane yen Ida Sang Hyang Widi Wasa mapakayun ngamademang tiang. Tiang misadia ngaturang wicaran tiange ring Ida.

16Menawita kawanenan tiange jaga ngluputang tiang, santukan tan wenten jadma dursila sane jaga purun mapas Ida Sang Hyang Widi Wasa.

17Sane mangkin pirengangja baos miwah katerangan tiange.

18Tiang sampun sedia jaga nletehang wicaran tiange, santukan tiang uning mungguing tegak tiange ring patute.

19Duh Ratu Sang Hyang Widi Wasa, punapike Palungguh IRatu rauh jaga nyisipang titiang? Yening kadi asapunika, titiang misadia pisan jaga mendep tur padem.

20Lugrainja titiang nunasang kalih paindikan. Daginginja pinunas titiange punika, tur titiang nenten jaga mengkeb saking ayun Palungguh IRatu.

21Wusangja nyisipang titiang, tur sampunangja titiang nyaganga antuk katakutan.

22Duh Ratu Sang Hyang Widi Wasa, rarisang Palungguh IRatu masabda, tur titiang nyaurin, wiadin lugrainja titiang matur, tur ledang Palungguh IRatu nyaurin.

23Punapike dosan titiange? Kiwangan sane kadi asapunapike sane sampun laksanayang titiang? Kiwangan sane kadi asapunapike anggen Palungguh IRatu nalih titiang?

24Punapike awinannya Palungguh IRatu ngedoh saking titiang? Punapike awinannya titiang dadosang Palungguh IRatu meseh?

25Punapike Palungguh IRatu mapakayun nengkejutang titiang? Titiang puniki tan bina sakadi daun kewanten. Palungguh IRatu satmaka nglawan sumi sane sampun tuh.

26Palungguh IRatu nalih titiang nganggen paindikan-paindikan sane ngranayang duhkita, yadianja paindikane punika laksanayang titiang daweg titiange kantun wimuda.

27Palungguh IRatu negul buntut titiange antuk ante. Palungguh IRatu nlektekang sabilang tindakan titiange, tur nureksain sakancan penjekan titiange.

28Pamuputipun, titiang dekdek sakadi taru sane berek, tan bina sakadi kawaca sane teda ngetnget.

← Chapter 12 Chapter 14 →