Job 12

balinese

1Dane Ayub raris masaur, sapuniki: “Inggih sawiakti pisan kadi asapunika. Semeton puniki sane makadados suaran jadmane punika. Yening semeton seda, kawicaksanaane punika taler jaga padem sinarengan ring semeton.

3Nanging tiang taler maderbe pangresepan sane asah ring pangresepan semetone. Tiang nentenja marasa kuciwa ring semeton. Makasami anake uning ring paindikan sane sampun nikayang semeton iwau.

4Sane mangkin sawitra-sawitran tiange ngedekin tiang. Ipun pada ngedekin tiang, yadiastun tiang patut miwah tan paiwang. Nanging jaga wenten masanipun Ida Sang Hyang Widi Wasa jaga nagingin pangastawan-pangastawan tiange.

5Semeton nenten nandang kamewehan, tur semeton kantun ngedekin tiang. Semeton manteg anake sane makire labuh.

6Nanging sawatek maling miwah jadmane sane tan pawidi muponin sutrepti yadiastu widinipune wantah kakuatanipune niri.

7Sujatinipun paksi miwah satone mrasidayang ngajahin semeton.

8Indayangja semeton ngidih pepineh ring gumatap-gumitipe sane wenten ring jagate miwah sane wenten ring segarane.

9Ipun makasami pada uning mungguing ipun kakardi antuk tangan Ida Sang Hyang Widi Wasa.

10Ida Sang Hyang Widi Wasa sane nuntun urip saananing sane kardi Ida. Sakancan urip manusane wenten ring sor kawisesan Idane.

11Tan bina sakadi lidah semetone seneng ngrasayang ajeng-ajengan, kadi asapunika taler karnan semetone seneng mirengang bebaosan.

12Anake lingsir-lingsir madue kawicaksanaan, nanging Ida Sang Hyang Widi Wasa madue kawicaksanaan miwah kawisesan. Anake lingsir-lingsir madue pangresepan, Ida Sang Hyang Widi Wasa madue pangresepan miwah kawisesan buat malaksana.

14Yening Ida Sang Hyang Widi Wasa nguugang, sapasirake sane mrasidayang malih mangunang, tur sapasirake mrasidayang mebasang anak sane kepangkeng antuk Ida Sang Hyang Widi Wasa?

15Jagate jaga tuh latuh, yen Ida Sang Hyang Widi Wasa ngandeg sabehe. Blabare jaga rauh yening Ida nglebang toyane.

16Ida Sang Hyang Widi Wasa maraga kuat tur setata nyaya. Jadmane sane keni kapus wiadin sane ngapus makakalih wenten sajeroning kakuasaan Idane.

17Ida ngaonang kawicaksanaan saking parapamrentahe miwah ngawinang parapamimpine malaksana sakadi anak nambet.

18Ida nyurudang lungguh pararatune, tur mangkeng pararatune punika.

19Ida ngasorang parapandita miwah anake sane mawisesa.

20Ida mungkem anake sane kapiandel miwah ngaonang kawicaksanaan anake lingsir-lingsir.

21Ida ngawinang kimud anake sane mawisesa miwah nyurudang kakuatan parapamrentahe.

22Ida nurunang galang buat nyilurin peteng patine.

23Ida ngawinang bangsa-bangsane kuat miwah ageng, nanging sasampune punika Ida sane ngaonang miwah nyirnayang ipun.

24Ida sane ngawinang parapamimpin ipune dados anak nambet, tur manggayang ipun pada paling ngumbara ngantos ical.

25Ipun pada patigabag ring petenge, tur srayang-sruyung sakadi anake punyah.

← Chapter 11 Chapter 13 →