Ezekiel 27

balinese

1Ida Sang Hyang Widi Wasa ngandika ring tiang, sapuniki:

2“Ih manusa, kidungangja kidung kaduhkitan pabuat kota Tiruse,

3nah ento kota ane nongos di tanggun pasihe, tur madedagangan ngajak sakancan jlemane ane di pasisi. Orahang teken ia sabdan Ida Sang Hyang Widi Wasa Sang Maha Luur ane buka kene: Ih Tirus, iba sumbung teken kajegegan ibane ane tan paceda.

4Umah ibane di pasihe. Tukange ane ngwangun iba, ngae iba dadi buka kapale ane melah.

5Awak ibane malakar aji kayu sanobar uli Gunung Hermon. Muah tiang ibane malakar aji kayu aras uli di Libanon.

6Dayung-dayung ibane malakar aji kayu tarbantin uli Basan. Geladag ibane gaena aji kayu cemara uli Siprus, tur mukir aji danta.

7Layar ibane malakar aji kain lenen, nah ento kain lenen ane mawarna-warni uli Mesir. Aluh baan ngingetin uli joh. Tendan ibane malakar aji kain ane paling melaha, malakar aji kain tangi uli Siprus.

8Tukang-tukang dayung ibane jlema uli kota-kota Sidon muah Arwad. Tukang ibane ento makejang pelaut.

9Tukang-tukang kapal ibane makejang jlema ane suba pascad uli Gebal. Paraanak buah kapale ane biasa malayar di pasih, madedagangan sig toko-tokon ibane.

10Paraprajurit uli Persia, Lidia muah Libia pada dadi wadua balan ibane. Ia pada ngantungang tamiang muah topi wajannyane di tembok-tembok kotan ibane. Ia pada dadi anak ane jayengrana pabuat iba.

11Prajurit-prajurit ane uli Arwad pada ngebag tembok-tembok ibane muah ane uli Gamad pada nyaga menara-menaran ibane. Ia pada ngantungang tamengne sig tembok-tembok ibane. Ia ajaka makejang pada nadiang iba jegeg pesan.

12Iba madedagangan ngajak gumi Spanyole. Iba nyilurin perak, besi, timah putih muah timah selem aji barang-barang ibane.

13Iba madedagangan ngajak gumi Yawan, Tubal muah Mesek. Iba nyilurin barang-barang ibane aji panjak paketokan muah aji barang-barang ane malakar temaga.

14Iba nyilurin barang-barang ibane aji jaran pangedengan kreta muah jaran tunggangan muah keledae uli Bet-Togarma.

15Wong Roduse masih madedagangan ngajak iba. Jlemane uli makudang-kudang gumi ane di pasisi pada nyilurin barang-barang ibane aji danta muah kayu eben.

16Wong Edome pada meli dagangan muah asil ibane ane liu ento. Ia nyilurin barang-barang ibane aji soca jamrud, kain tangi, kain lenen alus ane mawarna-warni, batu kaang muah soca mirah delima.

17Gumi Yehuda muah Israele nyilurin barang-barang ibane aji gandum, madu, lengis saitun muah wewangen.

18Wong Damsike meli dedagangan muah asil ibane, tur bayaha aji anggur uli Helbon muah aji wol uli Sakar. Ia nyilurin barang-barang ibane aji besi ane suba magarap muah aji wewangen.

20Wong Dedane nyilurin barang-barang ibane aji kulit lakar kedapa.

21Wong Arab muah pamrentah gumi Kedare nyilurin dedagangan ibane aji panak biri-biri, biri-biri muah kambing.

22Parasudagare uli Seba muah Raema pada nyilurin barang-barang ibane aji sesocan, mas muah wewangen ane paling melaha.

23Kota ane di Haran, Kane, Eden, sudagar-sudagare ane uli di kota Seba, kota-kota Asur muah Kilmad pada madedagangan ngajak iba.

24Ia pada ngadepin iba panganggo ane sarwa endah, kain tangi, sulaman muah permadani ane ngranyab muah benang lan tali ane siteng-siteng.

25Barang-barang dagangan ibane abana aji kapal layar ane gede-gede. Iba waluya buka kapale di pasihe, ane muat barang-barang sarat pesan.

26Di kalan tukang-tukang dayung ibane mesuang iba ka pasihe, ditu angin ane uli kangin ngenyagang iba joh uli daatan.

27Sakancan arta branan dedagangan ibane, sakancan pelaut anak buah kapal ibane, tukang-tukang kayun kapal muah sudagar ibane, sakancan prajurit ane di kapale, makejang pada ilang di pasihe, dikalan kapal ibane bencah.

28Jeritan parapelaut ibane ane nyilem matangguran kanti neked ka pasisi.

29Ane jani sakancan kapale suba kakalahin, tur sakancan pelautne suba pada menek ka pasisi.

30Ia pada sedih kingking mangenang iba, tur tendasne pada sambehina abu sambilanga maguyang di buke.

31Ia pada magundul pabuat iba saha nganggoin dewekne aji karung. Kenehne pada sedih kingking, dikala ia ngeling.

32Ia pada ngidungang kidung kaduhkitan pabuat iba, kene: ‘Nyenke ane nyandang bandingang teken kota Tiruse, teken kota Tiruse ane jani suba kelem di pasihe.

33Dikalan dedagangan ibane malayar ngliwat pasih, iba nyukupang kaperluan sakancan bangsane. Pararatune pada dadi sugih ulihan liun barang-barang ibane.

34Ane jani iba bencah di pasihe. Iba suba nyilem di sawang samudrane. Barang-barang muah anak buah kapal ibane suba kelem bareng teken iba di pasihe.’

35Sakancan anake ane nongos di pasisi makejang tengkejut nepukin unduk ibane ento. Kanti kayang pararatunnyane pada karesresan, tur kajejehane ento pada marawat di muannyane.

36Iba suba sirna, sirna buat salawas-lawasne. Sakancan sudagare di gumine pada karesresan, tur pada jejeh nemu paundukan ane patuh teken unduk ibane.”

← Chapter 26 Chapter 28 →