Ezekiel 25

balinese

1Ida Sang Hyang Widi Wasa ngandika ring tiang sapuniki:

2“Ih manusa, uman-umanja gumi Amone ento.

3Tundenja madingehang sabdan Ulun Sang Hyang Widi Wasa Sang Maha Luur, ane buka kene: Iba liang pesan nepukin Perhyangan Agung Ulune katemberang. Iba liang pesan nepukin gumi Israele suung mangmung muah nepukin rakyat Yehudane kaselong.

4Sawireh iba marasa liang, dadinne Ulun lakar nglugrain bangsa ane uli tegal melakange bedangin ngalahang iba. Ia lakar nyujukang kemahe di gumin ibane laut nongos ditu. Ia lakar pada naar woh-wohan muah nginem susu ane dadi gelah ibane.

5Ulun lakar nadiang kota Rabane dadi tongos pangonan unta muah sakuub gumi Amone lakar dadiang Ulun tongos pangonan biri-biri, apanga iba nawang, mungguing Ulun ene Ida Sang Hyang Widi Wasa.”

6Sapuniki sabdan Ida Sang Hyang Widi Wasa Sang Maha Luur: “Iba andup-andup muah kecag-kecog baan liang idep ibane. Iba nganistayang gumi Israele.

7Sawireh iba nglaksanayang unduk ane buka keto, dadinne Ulun lakar nyerahang iba teken bangsa ane lenan, ane lakar ngrampok muah nyarah iba. Ulun lakar nguugang iba kanti uug maglaturan, apanga iba tusing enu buin dadi bangsa wiadin enu ngelah gumi padidi. Sasubane keto iba lakar nawang mungguing Ulun ene Ida Sang Hyang Widi Wasa.”

8Ida Sang Hyang Widi Wasa Sane Maha Luur ngandika sapuniki: “Sawireh wong Moabe suba ngorahang mungguing Yehudane ento patuh teken sakancan bangsa-bangsane ane lenan,

9Ulun lakar nglugrain apang kota-kota ane mentengin tepi siring gumi Moabe lakar kagebug, kanti neked ka kota-kota ane paling melaha, luire kota Bet-Yesimot, Baal-Meon muah Kiryataim.

10Ulun lakar nglugrain suku-suku bangsa ane uli tegal melakange bedangin ngalahang gumi Moabe, bareng-bareng ngajak gumi Amone apanga Moabe ento tusing enu buin dadi satunggaling bangsa.

11Ulun lakar nyisipang wong Moabe, tur ia lakar nawang mungguing Ulun ene Ida Sang Hyang Widi Wasa.”

12Ida Sang Hyang Widi Wasa Sane Maha Luur ngandika sapuniki: “Wong Edome ento ngadakang pangwales ane sengit pesan marep teken wong Yehudane, tur pangwalesne ento ngawinang wong Edome ento dadi pelih gede.

13Ane jani Ulun ngwarah-warahang mungguing Ulun lakar nyisipang gumi Edome, tur ngamatiang sakancan manusa muah buron ane ada ditu. Ulun lakar nadiang gumine ento suung mangmung uli di kota Teman nganteg ka kota Dedan, tur jlemannyane lakar pada mati di pasiatan.

14Kaulan Ulune Israel lakar nyalanang pangwales Ulune marep teken wong Edome, tur ia lakar ngawanang wong Edome ngrasayang pidukan Ulune ane ngendih murub. Ditu wong Edome lakar nawang, kenken rasanne dadi sasaran pangwales Ulune.” Sapunika sabdan Ida Sang Hyang Widi Wasa Sane Maha Luur.

15Ida Sang Hyang Widi Wasa Sane Maha Luur ngandika sapuniki: “Wong Pilistine suba ngadakang pangwales marep teken musuhne ane uli nguni-nguni, tur nyirnayang musuhne ento sajeroning brangtinnyane.

16Sawireh keto, Ulun ngwarah-warahang mungguing Ulun lakar ngebug wong Pilistine tur nyampatang ia pesu. Ulun lakar nyirnayang asing-asing anak ane nongos di tanah dangsahe ane di Pilistin.

17Ulun lakar nyisipang ia sanget pesan tur ngadakang pangwales ane gede marep teken ia. Ia lakar ngrasayang pidukan Ulune. Sasubane keto ia lakar nawang, mungguing Ulun ene Ida Sang Hyang Widi Wasa.”

← Chapter 24 Chapter 26 →