Deuteronomy 4 — balinese

1Dane Musa raris ngandika ring bangsa Israele sapuniki: “Pada pagehja semeton ngagem pidabdab sane sampun urukang tiang ring parasemeton, mangda semeton kalugra urip tur ngaug tanah sane sampun kapaicayang antuk Ida Sang Hyang Widi Wasa, Widin leluur semetone ring semeton.

2Saluiring sane sampun uduhang tiang, sampunang wuwuhina miwah kirangina angan akidik. Pagehangja ngamargiang titah-titah Ida Sang Hyang Widi Wasa, Widin semetone sane sampun rauhang tiang ring semeton.

3Parasemeton ngraga sampun ngeton indik sane sampun kamargiang antuk Ida Sang Hyang Widi Wasa ring Gunung Peor. Asing-asing anak sane nyumbah Dewa Baal, sampun kasirnayang ring genahe punika,

4nanging anake sane pageh bakti ngiring Ida Sang Hyang Widi Wasa, Widin semetone, ipun kantun urip rauh mangkin.

5Pidabdab-pidabdabe punika makasami sampun urukang tiang ring semeton, sakadi sane katitahang antuk Ida Sang Hyang Widi Wasa, Widin tiange. Tinutinja pidabdabe punika makasami ring gumine sane pacang entap tur aug semeton.

6Parasemeton patut saking satia tuu ngamargiang pidabdab-pidabdabe punika. Yening semeton pageh ngamargiang pidabdabe punika, jaga sinah kawicaksanan parasemetone ring bangsa-bangsane sane tiosan. Yening ipun miragi indik pidabdab-pidabdabe punika, ipun jaga mabaos sapuniki: ‘Ambate wicaksana tur ririh bangsane ane gede ento.’

7Bangsa-bangsa sane tiosan, yadiastu amunapija agengipun, nenten wenten sane madue Widi, sakadi Ida Sang Hyang Widi Wasa, Widin iraga sane tansah nampek ring iraga. Ida nagingin pinunas iragane sabilang iraga nunas ica.

8Bangsa-bangsa sane tiosan amunapija agengnyane, ipun nenten madue pidabdab-pidabdab sane yuakti adil sakadi pidabdabe sane urukang tiang ring parasemeton ring rahinane puniki.

9Telebang tur elingang pisan, mangdane sakantun semeton urip semeton nenten lali ring indike sane sampun aksi semeton punika. Samaliha tuturangja indike punika ring oka miwah paraputun semetone,

10inggih punika indik rahina rikala semeton ngadeg ring ayun Ida Sang Hyang Widi Wasa, Widin semetone ring Gunung Sinai. Daweg punika Ida ngandika ring tiang sapuniki: ‘Punduhangja bangsane ento. Ulun mapakayun apanga ia ajaka makejang ningehang unduk ane lakar sabdayang Ulun, apanga ia mlajah pageh ngiring Ulun sanun iane idup, tur apanga ia nguruk pianak-pianakne pageh bakti teken Ulun.’

11Critayangja ring oka-okan semetone indik semeton sampun rauh tur ngadeg ring bongkol gununge sane kalikub antuk andus peteng dedet, sakadi megane sane tebel miwah geni sane murub kantos rauh ring langite.

12Critayangja ring ipun indik Ida Sang Hyang Widi Wasa masabda ring parasemeton saking tengah genine punika, tur indik semeton miragiang sabdan Idane, nanging semeton nenten pisan ngantenang Ida.

13Irika Ida sampun nguduhang ring semeton indik sane patut margiang semeton, buat ngamanggehang prajanjian sane sampun kardi Ida marep ring semeton. Dasa Titah sane sampun suratang Ida ring papan batune kekalih punika patut manggehang semeton.

14Ida nitahang ring tiang, mangda tiang ngurukang ring semeton sakancan pidabdab sane patut manggehang semeton ring jagat sane pacang entap tur aug semeton.”

15“Daweg Ida Sang Hyang Widi Wasa masabda ring semeton saking genine ring Gunung Sinai, semeton nenten ngantenang punapa-punapi. Dadosipun pabuat karahayuan semetone ngraga semeton patut eling.

16Tangarin ragan semetone, sampunang semeton kantos ngardi dosa malantaran ngardi tur nyumbah arca marupa punapi jua, sane marupa muani wiadin luh.

17Marupa sato wiadin paksi,

18buron sane ngrayang wiadin mina.

19Sampunang semeton kantos ngardi dewa malantaran nyumbah wiadin mabakti ring napi sane kantenang semeton ring langite, luiripun: surya, sasih miwah bintang-bintang. Ida Sang Hyang Widi Wasa, Widin semetone manggayang bangsa sane tiosan nyumbah barang-barange punika.

20Nanging parasemeton puniki bangsa sane sampun bebasang Ida saking panegara Mesir, genah parasemetone kapanjakang banget pisan. Parasemeton sampun bakta Ida medal saking jagate irika, mangda semeton dados kaulan Ida ngraga sakadi kawentenan semetone mangkin.

21Parasemeton sane ngawinang Ida Sang Hyang Widi Wasa, Widin semetone duka ring tiang, tur Ida masumpah mungguing tiang nenten pacang nglintangin Tukad Yordane buat ngentap jagate sane gemuh, sane jaga paicayang Ida ring parasemeton.

22Nenten malih amunapi suenipun semeton jaga nglintangin tukade punika, tur ngaug jagate sane gemuh punika, sakewanten tiang nenten pacang nyarengin semeton santukan tiang pacang padem iriki.

23Elingang pisan, sampunang semeton lali ring prajanjiane sane sampun kakardi antuk Ida Sang Hyang Widi Wasa, Widin semetone marep ring semeton. Manggehangja titah Idane, sampunang semeton ngardi arca sane pacang sungsung semeton, yadiastu marupa punapi kewanten.

24Santukan Ida Sang Hyang Widi Wasa, Widin semetone, waluya sakadi geni sane ngeseng. Ida nenten ledang yening wenten sane nyamenin Ida.

25Yening semeton sampun sue malinggih ring jagate punika, sampun madue oka miwah putu, sampunang taler semeton ngardi dosa malantaran makarya arca pabuat ragan semetone, sane marupa punapija luiripun. Pamargine sane kadi asapunika dados kajaatan ring ayun Ida Sang Hyang Widi Wasa tur jaga ngawinang Ida duka.

26Dumadak langit miwah gumine makadados saksi pabuat semeton ring rahinane puniki, mungguing yening semeton nenten tuwon ring tiang, semeton digelis pacang sirna saking jagate sane jaga aug semeton ring dauh Tukad Yordane punika. Semeton nenten pacang sue jenek irika, nanging semeton jaga kasirnayang makasami.

27Ida Sang Hyang Widi Wasa jaga nyambragang semeton ring pantaran bangsa-bangsa tiosan, tur wantah akidik saking pantaran semetone sane pacang kantun.

28Irika semeton pacang mabakti ring widi-widi sane kakardi antuk manusa, widi-widi sane malakar antuk taru miwah batu, sane buta miwah bongol sane nenten midep mangan miwah ngambu.

29Irika wau semeton pacang ngrereh Ida Sang Hyang Widi Wasa, Widin semetone, tur yening semeton ngrereh Ida antuk saguluk pakayunan semetone, semeton jaga kapanggih ring Ida.

30Yening semeton wenten sajeroning kamewehan tur makasami sengkalane nibenin parasemeton, pamuputipun semeton jaga mawali ring Ida Sang Hyang Widi Wasa tur pageh ngiring Ida.

31Ida punika Widi sane kalintang kawelas arsan. Ida nenten jaga ngutang wiadin nyirnayang semeton, tur Ida nenten jaga lali ring prajanjian sane kardi Ida marep ring leluur parasemetone.

32Indayangja tureksain kawentenan duke nguni, sadurung semeton pada embas, ngawit saking rahina daweg Ida Sang Hyang Widi Wasa ngardi manusa ring jagate puniki. Indayang rereh ring satungkabing rat. Naeninke sadurung punika wenten paindikan sane agung kadi asapuniki? Naeninke wenten jadma miragi indik sane kadi asapuniki?

33Naeninke wenten bangsa kantun murip rikala ipun miragi sabdan Widi saking genine, sakadi kawentenan semetone?

34Naeninke wenten Widi sane purun ngambil bangsa saking pantaran bangsa tiosan, raris kadadosang kaula druen Idane, sakadi sane sampun kalaksanayang antuk Ida Sang Hyang Widi Wasa, Widin semetone marep ring semeton ring panegara Mesir? Parasemeton ngraga sampun pada ngantenang indik Ida Sang Hyang Widi Wasa sampun nibakang bencana miwah yuda, ngardi katawahan-katawahan tur ngamargiang paindikan-paindikan sane madurgama malantaran kawisesan Idane.

35Ida Sang Hyang Widi Wasa nyinahang indike punika sami ring semeton buat muktiang mungguing wantah Ida kewanten sane maraga Widi, tur nenten wenten malih Widi sane tiosan.

36Ida masabda saking langite buat nguruk semeton ring jagate puniki. Ida sampun nyinahang genin Idane sane suci pabuat semeton, tur saking genine punika Ida ngandika ring parasemeton.

37Duaning Ida asih ring leluur parasemetone, parasemeton sampun selik Ida, tur semeton sampun bakta Ida makaon saking Mesir malantaran kawisesan Idane sane ageng.

38Ring ajeng parasemetone Ida ngaonang bangsa-bangsane sane agengan tur kuatan ring semeton, buat ngaterang parasemeton ka guminnyane sane jaga kapaicayang ring semeton antuk Ida Sang Hyang Widi Wasa. Inggih punika gumi sane dados paderbean semetone sane mangkin.

39Duaning punika ring rahinane puniki, pada elingja tur sampunang kantos lali mungguing Ida Sang Hyang Widi Wasa punika Widi ring suargan miwah ring jagate. Nenten wenten Widi sane tiosan.

40Pada pagehja ngagem pidabdabe sane aturang tiang ring semeton ring rahinane puniki. Malantaran punika semeton miwah katurunan semetone pacang rahayu. Parasemeton jaga dirga yusa ring jagat sane kapaicayang antuk Ida Sang Hyang Widi Wasa buat dados paderbean semetone salami-laminipun.”

41Dane Musa raris netepang kota tetiga ring dangin Tukad Yordane,

42makadados kota pasayuban, inggih punika kota genah anake ngluputang dewek yening ipun nenten nyelapang ngamademang anak lian sane boya mesehipune. Ipun dados malaib ka salah tunggal kotane punika mangda ipun nenten kadanda pati.

43Buat suku Ruben kasediaang kota Beser, sane ring pagunungan tegal melakange. Pabuat suku Gad, kota Ramot sane ring wewidangan Gilead, tur pabuat suku Manase, kota Golan sane ring wewidangan Basan.

44Dane Musa mapaica pidabdab miwah paurukan-paurukan Ida Sang Hyang Widi Wasa ring bangsa Israel.

45Dane maicayang pidabdab-pidabdabe punika ring bangsa Israel sasampun ipun medal saking Mesir tur kantun masandekan ring lebake ring dangin Tukad Yordane, sane marep-arepan ring kota Bet-Peore. Wewidangane punika pecak wewidangan Sang Prabu Sihon, ratun wong Amorine sane pecak mrentah ring kota Hesbon. Dane Musa miwah bangsa Israel sampun ngaonang ida, rikala bangsa Israel makaon saking Mesir.

47Bangsa Israel ngaug jagat Ida Sang Prabu Sihon punika, kadi asapunika taler jagat Sang Prabu Og sane ring Basan, ratun wong Amorine sane tiosan, sane malinggih ring dangin Tukad Yordane.

48Jagate punika nglajur saking kota Aroer, sane ring sisin Tukad Arnone, ngraris ngalerang kantos rauh ring Gunung Siryon, inggih punika Gunung Hermon.

49Sane maug ring wewidangane punika inggih punika tanah sane ring dangin Tukad Yordane, kelod ipun rauh ring Segara Mati tur kanginipun rauh ring bongkol Gunung Pisgane.