Deuteronomy 25

balinese

1Upami wenten wong Israel sareng kalih mawicara ring pangadilan, raris sane adiri kabaos patut miwah sane lianan kabaos iwang.

2Yening anake sane iwang punika keni ukuman matigtig, sang hakim patut ngandikayang anake punika makakeb, raris ipun katigtig. Akehnya katigtig patut sanut ring kacorahan sane sampun margiang ipun.

3Ipun dados katigtig paling akeh ping petang dasa, nenten dados lintangan. Yening lintang ring punika, mapiteges ipun kanistayang ring ajeng anake akeh.

4Sampunangja semeton nyamok bungut banteng sane anggen semeton makarya nglindes gandum.”

5“Yening wenten anak panyamaan sareng kalih mumah dados asiki, raris padem adiri, tur nenten numbuhang sentana, kenginan somahipune nenten dados nganten ngajak anak lianan, sajawining ring pakurenanipune, tur nyaman sang padem punika sane patut ngambil ipun nganggen somah.

6Pianakipune muani sane pinih keliha patut kaperas dados pianak sang padem, mangda sang padem madue katurunan ring pantaran bangsa Israele.

7Nanging yening nyaman sang padem punika nenten nyak ngambil balun sang padem, anake luh punika patut tangkil ring ajeng pamimpin kotane, saha matur asapuniki: ‘Nyaman kurenan titiange, nenten nyak ngamargiang tetegenanipune. Ipun nenten nyak numbuhang sentana pabuat nyamanipune ring pantaran bangsa Israele.’

8Irika pamimpin kotane punika patut ngesengin anake punika sarwi mabaos ring ipun. Yening ipun kantun nenten nyak ngambil anake luh punika,

9anake luh punika patut ngajak ipun nangkil ka ajeng parapamimpin kotane, raris ngembusin sandal anake muani punika asiki, tur ngecuhin muanipune, sarwi mabaos sapuniki: ‘Paindikane puniki sane nibenin anake sane nenten nyak numbuhang sentana pabuat nyamanipune.’

10Ring pantaran wong Israele pakurenan anake muani kadi asapunika pacang kasambat: ‘Pakurenan anak sane kembusin sandalnyane.’ ”

11“Yening wenten anak muani sareng kalih sedekan magulet, raris rauh kurenan salah tunggal anake punika, jaga nulungin somahipune, tur ipun ngambil pranan anake muani sane lianan,

12sampunangja padalema anake luh punika nanging getepja limanipune.

13Sampunangja semeton melog-melog antuk panimbangan miwah panakehan.

15Gunayangja panimbangan miwah panakehan sane patut, mangdane semeton prasida muponin umur panjang ring tanah sane pacang kapaicayang ring semeton antuk Ida Sang Hyang Widi Wasa, Widin semetone.

16Ida Sang Hyang Widi Wasa menggah ring anake sane demen melog-melog.”

17“Elingangja sakancan laksanan wong Amaleke marep ring semeton rikala semeton rarud saking Mesir.

18Ipun nenten takut ring Ida Sang Hyang Widi Wasa. Ipun ngebug semeton saking ungkur rikalaning semeton sampun lesu miwah kuru, tur sane nglawan ring ungkur sami pademang ipun.

19Duaning punika, yening Ida Sang Hyang Widi Wasa, Widin semetone, sampun maicayang tanahe punika ring semeton, tur semeton sampun muponin kerta raharja saking sakancan meseh-meseh semetone sane wenten ring kiwa tengen semetone, semeton patut ngamademang sakancan wong Amaleke punika, mangda sampunang malih wenten anak sane ngelingang ipun. Sampunang pisan semeton lali ring indike punika.”

← Chapter 24 Chapter 26 →