Daniel 3

balinese

1Ida Sang Prabu Nebukadnesar makarya bedogol sane malakar antuk mas, sane tegehnyane pitulikur meter, agengnyane tigang meter kirang akidik. Bedogole punika genahang ida ring tanah lapange ring Dura ring propinsi Babel.

2Sasampune punika sang prabu tumuli nauhin prakanggene mangda dane pada rauh inggih punika parapangeran, paragubernur, parakomisaris, parabendahara, parahakim, parajaksa miwah paraprakanggene sane tiosan sane wenten ring daerah-daerah. Dane sareng sami mangda nyarengin upacara mlaspas bedogole sane sampun kadegang antuk Ida Sang Prabu Nebukadnesar.

3Sasampune paraprakanggene mapunduh buat jaga mlaspas bedogole punika saha pada ngadeg ring arepan bedogole punika,

4raris wenten pacalang ida sang prabu adiri ngumumang antuk suara jangih, kadi asapunika: “Ih rakyat saluiring bangsa, sakancan sorohan miwah sakancan basa.

5Ragane pacang mireng suaran trompet sane kasarengin antuk suaran kecapi, rebab, gambus, raris kasambung antuk suaran tetabuhan sane tiosan. Rikala tetabuhanne ngawitin matabuh, ragane sareng sami patut sumungkem tur nyumbah bedogol mas sane sampun kadegang iriki antuk Ida Sang Prabu Nebukadnesar.

6Kala punika, sapasiraja sane tan sumungkem tur nyumbah bedogole punika, pacang kentungang ring grombong genine sane ngendih murub.”

7Duaning punika, rikala wenten suaran tetabuhan, rakyate saking sakancan bangsa, sakancan sorohan miwah basa, makasami pada sumungkem tur nyumbah bedogol mas sane sampun kadegang antuk Ida Sang Prabu Nebukadnesar punika.

8Makudang-kudang wong Babele ngunayang indike punika buat nalih wong Yahudine.

9Ipun matur ring Ida Sang Prabu Nebukadnesar asapuniki: “Mugi palungguh iratu dirga yusa.

10Palungguh iratu sampun ngwedalang titah mungguing ritatkala tetabuhane matabuh, mangda sakancan anake pada sumungkem tur nyumbah bedogole punika,

11tur asing-asing anak sane nenten nyak sumungkem saha nyumbah bedogole punika, ipun patut kacelepang ka grombong genine sane ngendih murub.

12Wenten makudang-kudang wong Yahudi sane adegang iratu dados pamrentah propinsi ring Babel, inggih punika Sadrah, Mesah miwah Abednego nenten sairing ring titah palungguh iratu. Ipun nenten nyumbah dewan iratune, wiadin sumungkem ring bedogol sane sampun adegang palungguh iratu punika.”

13Malantaran punika ida sang prabu raris duka tan kadi-kadi tur ida raris nitahang mangda sang tiga punika katangkilang ring ajeng idane.

14Ida tumuli ngandika ring sang tiga sapuniki: “Sadrah, Mesah muah Abednego, apake saja paman tusing nyak nyumbah dewan gelahe tur tusing nyak sumungkem teken bedogol mase ane jujukang gelahe ento?

15Sawireh keto ane jani dikalane ningeh munyin trompet, suling, kecapi, rebab, gambus muah munyin tetabuhan ane lenan, sumungkemja tur sumbahja bedogole ento. Yening paman tusing nyak nyumbah prajani paman lakar kaclempungang ka grombong apine ane ngendih murub. Apa paman ngaden lakar ada widi ane nyidaang ngluputang paman?”

16Dane Sadrah, Mesah miwah Abednego tumuli matur asapuniki: “Singgih ratu sang prabu, titiang nentenja pacang nindihin dewek titiange.

17Yening Ida Sang Hyang Widi Wasa sane sungsung titiang mrasidayang ngrahayuang titiang saking grombong genine sane ngendih murub miwah saking kakuasan palungguh iratune, janten Ida jaga ngluputang titiang.

18Nanging yadiastun Ida nenten ngluputang titiang mangda palungguh iratu pawikan, mungguing titiang nenten jaga nyumbah bedogol mas sane sampun adegang iratu punika.”

19Irika Ida Sang Prabu Nebukadnesar duka tan kadi-kadi, kantos prarain idane abang duaning dukan idane ring Dane Sadrah, Mesah miwah Abednego. Ida raris mrentahang mangda grombong genine kapanesang kantos tikel ping pitu panesipune yan bandingan ring biasanipun.

20Ida taler nitahang prajurit-prajurit sane pinih kuat saking pantaran wadua balan idane, mangda ipun negul tur ngentungang sang tiga ka grombong genine.

21Prajurit-prajurite punika raris negul sang tiga. Panganggen sang tiga minakadinipun kawaca, jubah, sorban miwah sane lian-lianan kantun jangkep. Sasampune kategul, sang tiga raris kaclempungang ka grombong genine.

22Santukan sang prabu mapaica prentah sane keras mangda grombonge kapanesang pisan, endih genine raris muunang pangawal-pangawale sane makta sang tiga ka grombonge punika.

23Nanging Dane Sadrah, Mesah miwah Abednego, kantun mategul maclempung ka tengah genine sane ngendih murub.

24Tan dumade Ida Sang Prabu Nebukadnesar tumuli matangi kabatek antuk kagiat idane. Ida mataken ring paraprakanggen idane sapuniki: “Tusingke iraga suba negul jlema tuah ajaka tetelu laut ia clempungang iraga ka grombong apine?” Paraprakanggene tumuli matur asapuniki: “Inggih sawiakti ratu sang prabu.”

25Ida Sang Prabu tumuli malih mataken asapuniki: “Yen keto, ngudiang dadi gelahe nepukin ia ajaka patpat majalan di tengah apine? Ia tusingja mategul, tur pangenahne ia tusingja mapa, buina ane nomer pat pangenahne cara dewa.”

26Duaning punika Ida Sang Prabu Nebukadnesar raris lunga ka lawang grombong genine tumuli ngandika saha santer sapuniki: “Ih paman Sadrah, Mesah muah Abednego, paraparekan Widi Ane Maha Luur. Maija pesu!” Sang tiga tumuli digelis tangkil.

27Sakancan pangeran, gubernur, bupati miwah paraprakanggen sang prabu sane tiosan tumuli mapunduh tur medasin sang tiga, sane tan bintul antuk genine punika. Rambut sang tiga nenten puun, panganggennyane taler nenten puun, tur dane nenten pisan mambu andus.

28Ida sang prabu tumuli ngandika sapuniki: “Luihangja Widin Sadrah, Mesah muah Abednegone. Ida ngutus malaekat Ida buat ngluputang anake ene, nah ento anak ane ngancangin tur andel teken Ida. Ia ajaka tetelu suba milih tulak teken prentah gelahe tur ngetohang uripnyane bandingang teken nyumbah dewa ane lenan teken Widinnyane.

29Ane jani gelahe mrentahang, mungguing yen ada anak wiadin bangsa, sorohan wiadin basa ane bani nganistayang Widin Sadrah, Mesah muah Abednego, ia lakar kapunggal tur kapukang-pukang, buina umahne lakar kadadiang dugdugan uug-uugan. Tusing ada Widi ane lenan ane nyidayang ngluputang buka kene.”

30Sasampune punika sang prabu raris ngunggahang linggih Dane Sadrah, Mesah miwah Abednego ring propinsi Babele.

← Chapter 2 Chapter 4 →