2 Samuel 17

balinese

1Tan asue sasampune punika, Dane Ahitopel matur ring Ida Absalom sapuniki: “Icenja titiang milih prajurit sareng roras tali, tur ring dauh wengine puniki titiang pacang nguber Ida Sang Prabu Daud.

2Titiang jaga ngebug ida sedekan ida kantun lesu tur karesresan. Sinah ida jaga tengkejut tur parapangiring idane jaga malaib sambrag. Titiang jaga nyedayang Ida Sang Prabu Daud kewanten,

3tur jaga ngatehang parapangiring idane tangkil ring iratu, sakadi panganten istri mawali ring rabinnyane. Palungguh iratu cukup nyedayang anak asiki, tur jadmane sane siosan pada rahayu.”

4Pituture punika kapakayun becik antuk Ida Absalom miwah antuk parapamimpin Israele sami.

5Ida Absalom raris ngandika asapuniki: “Jani kema alih paman Husai, jalan padingehang masih pituturne.”

6Rikala Dane Husai sampun rauh, Ida Absalom ngandika ring dane asapuniki: “Paman, ene ada pituturne paman Ahitopel teken gelahe. Apake pituturne ene patut tuutin gelahe. Yening tusing, tegerang paman nuturin gelah, apa ane patut laksanayang gelahe.”

7Dane Husai tumuli matur: “Pitutur Dane Ahitopele punika nenten patut.

8IRatu wikan mungguing ajin iratune, Ida Sang Prabu Daud miwah parapangiring idane punika sami pada jayengrana. Kawentenan idane sane mangkin pateh sakadi beruange sane sakit ati duaning kicalan pianak. Samaliha, ajin iratune punika sang jayengrana sane akeh madue pangalaman. Ida nenten jaga sareng-sareng ring prajurit idane rikalaning wengi.

9Sane mangkin menawi ida masingidan ring guane wiadin ring genahe siosan. Yening Ida Sang Prabu Daud raris ngayudain pangiring-pangiring iratune, sakancan anake sane miragi indike punika jaga maosang mungguing parakaulan iratune sampun kaon.

10Yening sampun kadi asapunika, yadiastu jadmane sane paling wanena tur sane galaknyane sakadi singa, pasti pacang ajerih. Santukan makasami anake ring Israel sampun pada uning mungguing ajin iratune punika sang jayengrana sane agung tur parapangiring idane taler paraprajurit sane sura dira.

11Pinunas titiange, mangda iratu nauhin jadma Israel sami saking tanggun jagate sane asiki rauh ring tanggunnyane sane siosan, kantos kawentenannyane sakadi biase ring pasisi, tur mangda iratu ngraga sane mimpin ipun ring payudan.

12Iratu jaga prasida manggihin Ida Sang Prabu Daud, kijaja ida lunga, tur iratu jaga prasida ngayudain ida sadurunge ida sayaga. Yening sampun kadi asapunika tan wenten sane jaga prasida luput, yadiastu Ida Sang Prabu Daud wiadin pangiring-pangiring idane.

13Yening ida makirig ka salah tunggaling kota, kaula druene makasami jaga makta tali sane kanggen maid kotane punika ka jurange. Nenten wenten batu angan asiki sane jaga kantun ring pucak bukite punika.”

14Ida Absalom miwah jadma Israele sami mabaos mungguing pitutur Dane Husai becikan yan bandingang ring pitutur Dane Ahitopel. Ida Sang Hyang Widi Wasa sampun mastiang mungguing pitutur Dane Ahitopel sane becik punika jaga nenten katuut, mangda Ida Absalom prasida katiben bencana.

15Sasampune punika Dane Husai ngaturin Pandita Sadok miwah Pandita Abyatar indik pitutur danene ring Ida Absalom miwah parapamimpin bangsa Israele tur indik pitutur Dane Ahitopel ring Ida Absalom.

16Atur danene: “Titiang nunas mangda digelis sang pandita ngutus anak matur piuning ring Ida Sang Prabu Daud keni sampunang ida marerepan ring genahe nglintang ring tegal melakange, nanging mangda ngraris nglintangin Tukad Yordane kantos ida miwah parapangiring idane nenten jaga keni kejuk tur kasedayang.”

17Dane Yonatan putran Pandita Abyatar, miwah Ahimas putran Pandita Sadoke setata nyantosang orti ring toya empule ring En-Rogel, ring tepin kotane, duaning sang kalih ajerih pisan jaga ngranjing ka kota. Wenten panyeroan asiki sane setata ngaturang ring sang kalih ngeniang saananing paindikan, wus punika sang kalih raris ngaturang indike punika ring Ida Sang Prabu Daud.

18Nanging risedek rahina anu wenten anak alit lanang manggihin sang kalih, raris kuningang ring Ida Absalom. Duaning punika digelis sang kalih masingidan ring satunggiling umah anake ring Bahurim. Anake lanang sane nuenang umahe punika madue semer tur sang kalih raris tedun ka semere punika.

19Somah anake sane nuenang umahe punika tumuli nekepin semere punika malantaran ngebatang angkeb ring bungut semere punika tur nyemuh gandum ring duur angkebe punika, kantos tan wenten anak prasida uning ring semere punika.

20Paraprakanggen Ida Absalom raris rauh ring umahe punika tur mataken ring anake luh punika asapuniki: “Dijake I Ahimas ajaka I Yonatan?” Pasaur anake luh punika: “Dane sareng kalih sampun nglintang ring tukade.” Dane sareng sami raris ngrereh-rerehin irika, nanging tan prasida kapanggihin, punika awinan dane raris pada budal ka Yerusalem.

21Sasampune paraprakanggene punika matilar saking irika, Dane Ahimas miwah Dane Yonatan raris medal saking semere tumuli lunga tangkil ring Ida Sang Prabu Daud. Sang kalih tumuli ngaturang indik rencanan Dane Ahitopel ngeniang ring ragan idane. Atur sang kalih: “Gelisang iratu matilar saking iriki, tur nglintangin tukade punika.”

22Ida Sang Prabu Daud miwah parakaulan idane raris nglintangin Tukad Yordane, tur rikala ngedas lemah makasami pada sampun nglintang.

23Rikala Dane Ahitopel uning mungguing pitutur danene nenten katampi dane raris ngambil keledaen danene tumuli kapasangin kedapa, tur dane raris budal ka kotan danene. Irika dane nabdab kulawargan danene, tur sasampune punika, dane raris ngantung raga. Dane kapendem ring pamendeman kulawargan danene.

24Rikala Ida Absalom miwah wong Israele nglintang ring Tukad Yordane, Ida Sang Prabu Daud sampun rauh ring kota Mahanaim.

25(Ida Absalom sampun ngentos Dane Yoab dados senapati. Ida ngangkat Dane Amasa dados senapatin wadua balan idane. Dane Amasa punika okan Dane Yeter wong Ismael. Ibun Dane Amasa punika Abigail, okan Dane Nahas tur semeton Dane Seruya, ibun Dane Yoab.)

26Ida Absalom miwah parapangiring idane raris makemah ring Gilead.

27Rikala Ida Sang Prabu Daud rauh ring Mahanaim, ida katangkilin antuk Dane Sobi, okan Dane Nahas, saking kota Raba sane wenten ring Amon, miwah antuk Dane Makir okan Dane Amiel, saking Lodebar, miwah antuk Dane Barsilai saking Rogelim sane wenten ring wewidangan Gilead.

28Dane rauh makta paso, payuk, kasur miwah pangan, luiripun: gandum, ketan, tepung, gandum manyanyah, kacang buncis, kacang barak, madu, keju, susu miwah makudang-kudang biri-biri. Punika sami katurang ring Ida Sang Prabu Daud, duaning dane sareng sami uning mungguing ida miwah parapangiring idane janten lue, kasatan miwah pada kaleson ring tegal melakange.

← Chapter 16 Chapter 18 →