Revelation 14

Azerbajani Bible (South) Used in Both Iran and Azerbaijan 2008

1اونلار تختئن، دؤرد جانلي مخلوقون و آغساقّاللارين حوضوروندا تزه بئر ماهني اوخويوردولار و هچ کئم بو ماهنيني اؤيره‌نه بئلمئردي مگر ير اوزوندن ساتين آلينميش او يوز قيرخ دؤرد مئن نفر.

2بو آداملار اونلارديرلار کي، اؤزلرئني آروادلارلا لکهلي اتمه‌يئبلر، چونکي اؤزلرئني باکئره ساخلاييبلار. بونلار، اونلارديرلار کي، قوزونون دالينجا هارايا گتدئيي يره گدئرلر. بونلار آداملار آراسيندان تاري و قوزو اوچون نوبار ساتين آلينيبلار.

3و اونلارين آغزيندا هچ يالان تاپيلمادي؛ اونلار قوصورسوزدورلار.

4گؤيون اورتاسيندا اوچان آيري بئر ملک ده گؤردوم. اونون ابدي خوش خبري وار ائدي کي، ير اوزونده ياشايانلارا، هر مئلّته، هر قبئلهيه، هر دئله و هر خالقا موژده ورسئن.

5او، اوجا بئر سسله ددي: «تاريدان قورخون و اونا عئزّت ورئن. چونکي اونون موحاکئمه اتمه‌يئنئن ساعاتي يتئشدي. گؤيو، يري، دهنزي و سولار بولاقلاريني يارادانا پرستئش ادئن.»

6ائکئنجي بئر ملک اونون آرخاسيندان گلئب، ديئردي: «ييخيليب، او بؤيوک بابئل شهري ييخيليب، او کي، بوتون مئلّتلري، عئفّتسئزلئيئنئن شهوتئنئن شرابيندان ائچدئردي.»

7سونرا اوچونجو بئر ملک، اونلارين آرخاسيندا گلئب، اوجا بئر سسله ديئردي: «کئم جاناوارا و اونون تئمثالينا پرستئش اتسه و آلينينا يا دا الئنه نئشان وورولسا،

8او دا تارينين قضبئنئن شرابيندان ائچهجک کي، اونون قهرئنئن پئيالهسئنده کامئل قووّتده قاريشديريليب. او، موقدّس ملکلرئن و قوزونون حوضوروندا اود و گوگوردله ده عذاب چکدئرئلهجک.»

9اونلارين عذابلارينين توستوسو ابددن ابده کئمي قالخير. جاناوارا و اونون تئمثالينا پرستئش ادنلرئن، و اونون آدينين نئشانيني قبول ادنلرئن نه گوندوز راحاتليغي وار، نه ده گجه.

10بورادادير موقدّسلرئن تاب گتئرمکلري کي، تارينين احکاملاريني و عئسايا اولان ائمانلاريني حئفظ ادئرلر.

11و گؤيدن بئر سس اشئتدئم کي، ديئردي: «ياز، خوش او آداملارين حالينا کي، ائندئدن بله ربده اؤلورلر!» موقدّس روح ديئر: «بلي، اله کي، زحمتلرئندن راحاتلانسينلار، چونکي اونلارين عمللري اونلارين آرخاسيندان گدئر.»

12سونرا باخديم، و باخ، آغ بئر بولود! و بولودون اوستونده اوتوران، بئر ائنسان اوغلونا بنزه‌يئردي؛ باشيندا قيزيل بئر تاج، الئنده ده ائتي بئر اوراغ وار ائدي.

13معبدئن ائچئندن آيري بئر ملک چيخدي و اوجا بئر سسله بولود اوستونده اوتورانا ددي: «اوراغيني ائشه سال و بئچ، چونکي بئچئن زاماني گلئب، چونکي ير اوزونون محصولو يتئشئب.»

14سونرا بولود اوستونده اوتوران، اوراغيني ير اوزونه سالدي و ير اوزو بئچئلدي.

15گؤيده اولان معبدئن ائچئندن آيري بئر ملک ده چيخدي. اونون الئنده ده ائتي بئر اوراغ وار ائدي.

16سونرا، اود اوستونه حاکئمئيّتي اولان آيري بئر ملک، قوربانگاهدان چيخدي و اوجا بئر سسله ائتي اوراغي اولاني چاغيريب، ديئردي: «ائتي اوراغيني ائشه سال و ير اوزونون سالخيملاريني در، چونکي اوزوملري يتئشئب.»

17بلجه ملک اوراغيني ير اوزونه سالدي و يرئن اوزوم سالخيملاريني درئب، اونلاري تارينين قضبئنئن بؤيوک اوزومسيخانينا آتدي.

18شهرئن اشئيئنده اولان اوزومسيخان سيخيلدي و اوزومسيخانين ائچئندن آتلارين جئلووونا کئمي، مئن آلتي يوز اوخ آتيمي قدر قان اشئيه چيخدي.

20سونرا، گؤيده بؤيوک و حيرته سالان باشقا بئر علامت گؤردوم؛ يدّي ملک کي، آخيرکي يدّي بلالاري گتئرئردئلر، چونکي تارينين قضبي اونلارلا قورتارير.

← Chapter 13 Chapter 15 →