Psalms 39

Azerbajani Bible (South) Used in Both Iran and Azerbaijan 2008

1ددئم: "يوللاريما دئقّت اده‌جيم کي، دئلئمله گوناه اتمه‌يئم؛ پئس آدام قاباغيمدا اولان واخت، آغزيما جئلوو قوياجاغام."

2آغزيمي توتوب ساکئت اولدوم، ياخشيليق اوچون ده بله سوکوت اتدئم؛ آمّا دردئم جوشا گلدي،

3اوره‌يئم ائچئمده قيزيشدي، درئن دوشونرکن اود کئمي آلوو چکدي؛ او زامان دئلئمله دانيشديم:

4يارب، عاقئبتئمي، گونلرئمئن ساييسينين نه قدر اولدوغونو منه بئلدئر، قوي عؤمرومون نه قدر قيسا اولدوغونو آنلاييم.

5باخ، گونلرئمي بئر نچه قاريش قدر ادئبسن، عؤمروم سنئن يانيندا هچدئر. دوغرودان دا هر کس آنجاق نفس کئمي‌دئر. سِلا.

6دوغرودان دا هر کس بئر کؤلگه کئمي کچئر. دوغرودان دا بوش يره زحمت چکئر، مال-دؤولت ييغير، اوندان کئمئن ائستئفاده اده‌جيئني بئلمئر.

7اونا گؤره، ای پروردئگار، نه‌يه توکّول ادئم؟ اومئدئم بئرجه سنده‌دئر.

8مني بوتون عوصيانلاريمدان قورتار. مني آخماقلار يانيندا روسواي اتمه.

9لال اولوب آغزيمي آچميرام، چونکي بونو ادن سنسن.

10گؤندردئيئن بلاني اوستومدن گؤتور. الئنئن ووروشلاري ائله تلف اولموشام.

11سن ائنساني گوناهين جزاسي اوچون وورورسان؛ اونون سودئيي شيلرئني گووه يدئيي کئمي هچ ادئرسن. دوغرودان دا هر کس آنجاق بئر نفس‌دئر. سِلا

12دوعامي اشئت، يارب، فرياديما قولاق ور، گؤزياشلاريما گؤز يومّا؛ چونکي سنئن يانيندا بئر قرئبم، بوتون آتالاريم کئمي بئر موسافئرم.

13گؤزونو مندن گؤتور کي، کچيب-گدئب يوخ اولماميشدان تزه‌دن خوشبخت اولوم.

← Chapter 38 Chapter 40 →