Psalms 37

Azerbajani Bible (South) Used in Both Iran and Azerbaijan 2008

1پئس آداملارين اوزوندن سيخيلما، يامانليق ادنلرئن حالينا دا پاخيلّيق اتمه،

2چونکي اونلار اوت کئمي عنقرئب قوروياجاقلار، ياشيل سبزه کئمي سولاجاقلار.

3ربّه توکّول ات و ياخشي ائشلر گؤر؛ اؤلکه‌ده ساکئن اول، امئن-آمانليقدان کف ات.

4ربدن لذّتئني آل، او دا سنه اوره‌يئنئن موراديني ورر.

5يولونو ربّه تاپشير، اونا توکّول ات؛ رب اونو يرئنه يتئرر.

6او، سنئن صالحلئيئني ائشيق کئمي چيخاردار، عدالتئني گون اورتا کئمي ادر.

7ربّئن يانيندا آرام اول، صبئرله اونو گؤزله؛ بِجَرکلي اولان اوزوندن، فئساد ائشله‌ين اوزوندن سيخيلما.

8قضبدن دوش، قيضي بوراخ، سيخيلما؛ بو، ائنساني آنجاق پئسلئيه چکر.

9پئس آداملار کسئله‌جکلر؛ لاکئن ربّه اعتئماد ادنلر يري مئراث آلاجاقلار.

10بئر آز داها زامان کچسئن، پئس آدام آرتيق يوخ اولار. او اولان يري آختارارسان، آمّا اونو تاپا بئلمزسن.

11لاکئن حلئم آداملار يري مئراث آلارلار، خوشبختلئيئن بوللوغوندان کف ادرلر.

12پئس آدام، صالح آدامين قصدئنه قالخار، اونا دئشلرئني قيجيردار.

13آمّا پروردئگار اونا گولر، چونکي اَجَل گونون گلدئيئني گؤرور.

14فاغير و مؤحتاج آدامي يره ييخماق اوچون، يولو دوغرو اولانلاري اؤلدورمک اوچون، پئس آداملار قيلينج چکئب کامانلاريني اَيئرلر.

15لاکئن قيلينجلاري اؤز اورکلرئنه گئره‌جک، کامانلاري سيناجاقدير.

16صالح آدامين صاحئب اولدوغو آز، چوخ پئس آدامين ثروتئندن ياخشيدير.

17چونکي پئس آداملارين قولو سينار، لاکئن رب صالح آداملارا داياق اولار.

18دوز آداملارين گونلرئني رب بئلئر، اونلارين مئراثي ابدي اولار.

19اونلار يامان گونلرده خجالت چکمزلر، آجليق زامانيندا توخ اولارلار.

20دوغرودان دا پئس آداملار هلاک اولارلار؛ ربّئن دوشمنلري اوتلاقلارين شؤوکتي کئمي‌دئرلر؛ محو اولوب گدرلر، توستو ائچئنده محو اولوب گدرلر.

21پئس آدام بورج آلير، بورجونو گري ورمئر، آمّا صالح آدام سخاوتلي‌دئر و ورئر.

22ربدن برکت آلانلار يري مئراث آلارلار، لاکئن ربّئن طرفئندن لعنت اولونموشلار کسئلَرلر.

23رب آدامين يولوندان خوشلانان واخت، اونون قدملرئني مؤحکم ادر؛

24بودره‌سه ده ييخيلماز، چونکي رب الي ائله اونو توتار.

25جاوان ائدئم و ائندي قوجايام؛ لاکئن گئنه ده، صالح بئر آدامين نه يالقوز بوراخيلديغيني گؤرموشم، نه ده اونون اؤولادلارينين چؤره‌يه مؤحتاج اولدوغونو.

26او همئشه سخاوتلي‌دئر و بورج ورر، اونون اؤولادلاري موبارک اولارلار.

27پئسلئکدن چکئل و ياخشيليق ات، او زامان ابددن ابده‌جک ساکئن قالارسان.

28چونکي رب عدالتي سور، اونا موتّقي اولانلاري بوراخماز؛ اونلار ابده کئمي حئفظ اولونارلار، آمّا پئس آدامين نسلي کسئلر.

29صالح آداملار يري مئراث آلارلار، اورادا ابده کئمي ساکئن اولارلار.

30صالح آدامين آغزي حئکمت نقل ادر، دئلي عدالت دانيشار.

31تارينين شرئعتي اونون اوره‌يئنده‌دئر؛ قدملري سوروشمز.

32پئس آدام صالح آدامي گودر، اونو اؤلدورمه‌يه چاليشار؛

33رب صالح آدامي اونون الئنه بوراخماياجاق، موحاکئمه اولوندوغو زامان دا اونو محکوم اتمه‌يه‌جک.

34ربّه اعتئماد ات و اونون يولونو توت. يري مئراث آلماق اوچون، او، سني اوجالداجاق. پئس آداملارين کسئله‌جيي واختي گؤره‌جکسن.

35پئس آدامي بؤيوک قودرتده گؤرموشم کي، نجه اؤزونو ياشيل آغاج کئمي بئتدئيي يرده ياييب؛

36قفئلدن کچئب گتدي، باخ، آرتيق يوخ اولموشدو؛ اونو آختارديم، لاکئن اوندان هچ بئر اثر يوخ ائدي.

37کامئل بئر آدامي گود، دوز بئر ائنسانا باخ؛ چونکي گله‌جک صولح‌سِوَن آدامين‌دير.

38آمّا عاصئلر بئرلئکده يوخ اولارلار؛ پئس آداملارين گله‌جيي کسئلر.

39صالح آدامين نئجاتي ربدن گلئر؛ دارليق واختيندا اونلارين قالاسي ربدئر.

40رب اونلارا ائمداد ادئب اونلاري قورتارار؛ پئس آداملارين الئندن اونلاري قورتارار، نئجات ورر، چونکي اونلار ربّه پناه گتئررلر.

← Chapter 36 Chapter 38 →