Psalms 21

Azerbajani Bible (South) Used in Both Iran and Azerbaijan 2008

1يارب، پادشاه سنئن قووّتئنده شادليق ادئر؛ سنئن وردئيئن ظفرلر اوچون، اونون شادليغي نه قدر بؤيوکدور!

2اوره‌يئنئن آرزوسونو اونا ورئبسن، دوداقلارينين ائسته‌دئيئني اسئرگمه‌يئبسن. سِلا

3گؤزل برکتلرله پئشوازينا چيخدين، باشينا خالئص قيزيلدان تاج قويدون.

4سندن حيات ائسته‌دي، سن اونا وردئن؛ اوزون عؤمور، ابددن ابده‌جک.

5سنئن اونا وردئيئن ظفره گؤره، اونون عئزّتي بؤيوکدور؛ اوستونه شؤوکت و جلال قويوبسان.

6يقئن کي، اونا ابدي برکتلر ورئبسن حوضورونون شادليغي ائله اونو سوئندئرئبسن.

7چونکي پادشاه ربّه توکّول ادئر؛ اوجالاردا اولانين محبّتي ائله يرئندن ترپنمه‌يه‌جک.

8الئن بوتون دوشمنلرئني تاپاجاق؛ صاغ الئن سندن نئفرت ادنلري تاپاجاق.

9اؤزونو ظاهئر اتدئيئن زامان، يارب، اونلاري اودلو تندئر کئمي اده‌جکسن؛ رب حئدّتئنده اونلاري اوداجاق، اود اونلاري ييئب بئتئره‌جک.

10اونلارين اؤولادلاريني ير اوزوندن، اونلارين نسلئني ائنسانلار آراسيندان محو اده‌جکسن.

11گرچي سنئن ضئدّئنه پئس نئيّتلر ادئرلر، شرارت دوشونورلر، آمّا باجارا بئلمئرلر.

12چونکي کامانيني اونلارا طرف چکدئيئن زامان، اونلاري قاباغيندان قاچماغا مجبور اده‌جکسن.

13يارب، قودرتئنله اوجاليغيني گؤرسد! سنئن قودرتئنه اوخوياجاغيق، اونا پرستئش نغمه‌لري اوخوياجاغيق.

← Chapter 20 Chapter 22 →