Proverbs 17

Azerbajani Bible (South) Used in Both Iran and Azerbaijan 2008

1باريشلا بئر تئکه قورو چؤرک، ديئشمه ائله ضئيافت دولو اِودن داها ياخشي‌دير.

2عاغيلّي نؤکر آدباتيران اوغولون آغاسي اولار، قارداشلار آراسيندا مئراث پايي آلار.

3پوتا گوموش اوچوندور و کوره قيزيل اوچون، لاکئن اورکلره محک ووران ربدئر.

4پئسلئک ادن شر دوداقلارا دئقّت ورر، يالانچي آدام فئتنه سالان دئله قولاق آسار.

5يوخسول آداملاري رئشخند ادن، اونو يارادانا خور باخار، اؤزگه‌نئن بلاسينا سِوئنن آدام جزاسيز قالماز.

6نوه‌لر ياشلي‌لارين تاجي‌دير، اوغوللارين عئّزتي آتالاري‌دير.

7فضئلتلي سؤز عاغيلسيز آداما ياراشماز، نه قدر آرتيق يالان دانيشان دوداقلار بئر آغايا!

8روشوت اونو وره‌نئن گؤزونده قئيمتلي بئر داشدير، نه طرفه دؤنسه، ائش باش توتار.

9خاطانين اوستونو اؤرتن آدام محبّت آختارير، آمّا سؤز گزدئرن، ياخين دوستلاري بئربئرئندن آييرير.

10آنلاغي اولان آداما بئر ائراد، آخماغا وورولان يوز دَيَنَک ضربه‌سئنئن آغريسيندان داها آرتيقدير.

11پئس آدام آنجاق عوصيان آختارار، اونون ضئدّئنه قدّار قاصئد گؤنده‌رئلر.

12بالالاريني ائتئرمئش بئر آيي‌يا راست گلمک، سفاهته باتميش آخماقلا راستلاشماقدان ياخشي‌دير.

13کئم ياخشيليق عوضئنه پئسلئک اتسه، پئسلئک اونون اِوئندن آيريلماز.

14داعوانين باشلانيشي سويون بندئندن آچيلماسينا بنزر، داعوا باشلانماميش موناقئشه‌ني ترک ات.

15شر آدامي گوناهسيز چيخارتماق، صالح آدامي محکوم اتمک، هر ائکئسي ده ربّه مکروهدور.

16نه اوچون آخماق آدامين الئنده، حئکمتي ساتين آلماق اوچون مال وار؟! اونون کي، بونا عاغيلي يوخدور.

17بئر دوست همئشه سِوَر، قارداش دارليق اوچون آنادان اولوب.

18عاغيلسيز، آيري بئر آداملا ال‌بئر اولار، قونشوسونا ضامئن دورار.

19خاطاکارليغي سون داعواني سِوَر، قاپيسيني اوجالدان هلاک آختارار.

20اَيري اورکلي خيئر گؤرمز، ترسه دانيشان دئل ده بلايا دوشر.

21آخماغين آتاسي قوصّه‌يه آتا اولور، عاغيلسيزين آتاسينين شادليغي ائتر.

22شاد اورک ياخشي بئر درماندير، لاکئن سينيق بئر روح سوموکلري قورودار.

23شر آدام قولتوغونون آلتيندان روشوت آلار کي، عدالتئن يوللاريني پوزسون.

24حئکمت، آنلايان آدامين نظرئنده‌دئر، آخماغين گؤزلري دونيانين او تاييني آختارار.

25آخماق اوغول آتاسينا قوصّه، اونو دوغان آناسينا آجيليق‌دير.

26صالح بئر آدامي تنبه اتمک ياخشي ديئل، نجئبزاده‌لري ده دوزلوکلري اوچون دؤيمک ياخشي ديئل.

27معرئفتي اولان آز دانيشار، فراستلي آدامين دا آرام روحو وار.

28حتّا سفه بئر آدام دا ساکئت قالسا، حئکمتلي حساب ادئلر، آغزيني يومسا، فهئم گؤرونر.

← Chapter 16 Chapter 18 →