Proverbs 16

Azerbajani Bible (South) Used in Both Iran and Azerbaijan 2008

1اوره‌يئن ترتئباتي ائنسانينکي‌دير، آمّا دئلئن جاوابي ربدندئر.

2ائنسانين بوتون يوللاري اؤز نظرئنده طاهئردئر، لاکئن روحلاري تفتئش ادن ربدئر.

3ائشلرئني ربّه بوراخ، فئکئرلرئن برقرار اولار.

4رب هر شيي مقصدئنه مووافئق ياراديب، بلي، حتّا شر آداملاري بلا گونو اوچون.

5اوره‌يئنده مغرور اولان آدام ربّه مکروهدور؛ دوغرودان دا جزاسيز قالماز.

6صالحلئک و وفا ائله فسادين اوستو اؤرتولر، ربدن قورخماقلا آدام پئسلئکدن دؤنر.

7آدامين يوللاري ربّئن خوشونا گلسه، دوشمنلرئني ده اونونلا باريشديرار.

8صالحلئکله قازانيلان آز شي، حاقسيز يوللا اولان بول گلئردن ياخشي‌دير.

9ائنسان اوره‌يئنده اؤزو اوچون يول قورار، لاکئن رب قدملرئني هئدايت ادر.

10ائلاهي قرار پادشاهين دوداقلاريندادير؛ حؤکم اتمکده اونون آغزي گرک سهو اتمه‌سئن.

11دوغرو تره‌زي و چکي ربّئندئر؛ او، تورباداکي هر چکي داشيني موعيّن ادر.

12شرارت اتمک پادشاهلارا مکروهدور، چونکي بئر تخت صالحلئکله برقرار اولار.

13صالح دوداقلاردان پادشاهلار خوشلانارلار، اونلار دوز دانيشانلاري سِوَرلر.

14پادشاهين قضبي اؤلوم الچئسئدئر، آمّا حئکمتلي آدام اونون اوستونو اؤرتر.

15پادشاهين اوزونون نوروندا حيات وار، راضيليغي ياز ياغيشي گتئرن بولودا اوخشار.

16حئکمت قازانماق قيزيلدان نه قدر ياخشي‌دير! بلي، آنلاق قازانماق گوموشدن داها افضلدئر.

17دوز آداملارين جادّه‌سي پئسلئکدن دؤنمکدئر؛ يولونو ساخلايان آدام جانيني حئفظ ادر.

18هلاکتدن قاباق تکبّور گدر، ييخيلماقدان قاباق دا مغرور اورک.

19مظلوم بئر آداملا باشي آشاغي اولماق، تکبّورلو آداملارلا قارت ماليني پايلاشماقدان ياخشي‌دير.

20سؤزه دئقّت ادن ياخشيليق تاپار، ربّه توکّول ادن نه بختوردئر!

21اوره‌يي حئکمتلي اولان دا فهئم چاغيريلار، دوداقلارين شئرئنلئيي علمي آرتيرار.

22عاغيل، صاحئبئنه حيات بولاغي‌دير، لاکئن سفه‌لرئن تربئيه‌سي سفه‌لئکدئر.

23حئکمتلي آدامين اوره‌يي اونون آغزيني آغيلّي ادر، دوداقلاري اوستونه علم آرتيرار.

24خوش سؤزلر شان بالي کئمي‌دئر، جانا شئرئندئر، سوموکلره شفا.

25يول وار کي، آدامين قاباغيندا دوز گؤرونور، آمّا آخيري اؤلومدور.

26زحمتکش آدام اؤزو اوچون زحمت چکر، چونکي آج آغزي اونو مجبور ادر.

27ياراماز آدام پئسلئک قازار، دوداقلاريندا اله بئل کي، يانديران اود وار.

28اَيري آدام داعوا سالار، سؤز گزدئرن آدام دا ياخين دوستلاري بئربئرئندن آييرار.

29زور دئين آدام اؤز قونشوسونو آلدادار، اونو ياخشي اولمايان بئر يولا چکر.

30نئيّتي حئيله‌لي اولان گؤز وورار؛ دوداق بوزَر، شر قورار.

31آغارميش ساچلار شرف تاجي‌دير، صالحلئک يولونون قازانجي‌دير.

32گج قضبلنمک ائگئد اولماقدان ياخشي‌دير، نفسئنه حاکئم اولماق دا بئر شهري آلماقدان ياخشي‌دير.

33پوشک اَتَکده آتيلار، آمّا اونون هر حؤکمو ربدن گلر.

← Chapter 15 Chapter 17 →