Joshua 20

Azerbajani Bible (South) Used in Both Iran and Azerbaijan 2008

1سونرا رب يوشَعله دانيشيب اونا ددي:

2"ائسرايئل اؤولادلارينا دِه: «اؤزونوز اوچون موسا واسئطه‌سئله ددئيئم سيغيناجاق شهرلري سچئن کي،

3بئلمه‌دن، سهون بئر آدامي اؤلدورن قاتئل اورايا قاچسين. اورا سئزئن اوچون قان قئصاصيني آلان آدامدان سيغيناجاق يري اولسون.

4قوي قاتئل بو شهرلردن بئرئنه قاچسين، شهر قاپيسينين گئره‌جيئنده دورسون. اورادا او شهرئن آغساقّاللارينا اؤز عملئني دانيشسين. اونلار دا اونو شهره، يانلارينا آپارسينلار و اونا ير ورسئنلر کي، اونلارلا ياشاسين.

5اگر قان قئصاصي آلان اونو تعقئب اتسه، او زامان قاتئلي اونا تسلئم اتمه‌سئنلر، چونکي قونشوسونو بئلمه‌دن اؤلدوروب، اوّلدن اونونلا عداوتي يوخ ائدي.

6بو آدام جاماعات موقابئلئنده موحاکئمه اولانا قدر و او دؤورده اولان باش کاهئنئن اؤلومونه قدر بو شهرده ياشاسين. بوندان سونرا قاتئل اؤز شهرئنه، اؤز اِوئنه، اوندان قاچديغي شهره قاييدا بئلر.»"

7سيغيناجاق شهر اوچون جَلئلدن، نَفتالئنئن داغليق بؤلگه‌سئنده قِدِشي، اِفرايئمئن داغليق بؤلگه‌سئنده شِکِمي و يهودانين داغليق بؤلگه‌سئنده قئريَت‌اَربَعي، يعني خِبرونو آييرديلار.

8اوردون چايينين او بئري طرفي اَرئحانين شرقئنده ده رِعوبئن قبئله‌سئنئن تورپاغيندان يايلادا يِرلَشن صحراداکي بِصِري، جاد قبئله‌سئنئن تورپاغيندان اولان گئلعادداکي راموتو، مِنَسّه قبئله‌سئندن اولان باشاندا گولاني آييرديلار.

9بونلار بوتون ائسرايئللی‌لر اوچون و آرالاريندا ياشايان ياد اِللی‌لر اوچون تعيئن اولونان شهرلر ائدي کي، سهون قتل ادن هر بئر کس اورايا قاچا بئلردي و جاماعات قاباغيندا موحاکئمه اولوناجاق قان قئصاصيني آلانين اَلي ائله اؤلدورولمَزدي.

← Chapter 19 Chapter 21 →