Jeremiah 21

Azerbajani Bible (South) Used in Both Iran and Azerbaijan 2008

1پادشاه صئدقئيا مَلکئيا اوغلو پَشخورو و مَعَسِيا اوغلو کاهئن صِفَنياني اِرِميا‌نين يانينا گؤنده‌ره‌نده، ربّئن سؤزو اِرِميايا نازئل اولدو. اونلار دِمئشدئلر:

2"گل، بئزئم طرفئمئزدن ربدن سوروش. چونکي بابئل پادشاهي نَبوکَدنِصّر بئزه هوجوم گتئرئر. بلکه رب کِچمئشده اتدئيي مؤجوزه‌لره بَنزَر بئزه بئر شي اِدَر و نَبوکَدنِصّر بئزدن اَل چکر؟"

3لاکئن اِرِميا اونلارا جاواب وردی: "صئدقئيايا ديئن کي،

4ائسرايئلئن تاريسي رب بله بويورور: «اَلئنئزده اولان موحارئبه سئلاحلاريني کي، اونونلا دووارلارين او طرفئنده سئزي موحاصئره‌يه آلان بابئل پادشاهي و کَلدانئلرله ساواشيرسينيز، گری ساخلاياجاغام. سئلاحلارينيزي بو شهرئن اورتاسينا بئر يِره ييغاجاغام.

5من اؤزوم سئزئن ضئدّئنئزه اَل قالديراجاغام، گوجلو قولوملا، قِيض، قضب و بؤيوک حئدّتله سئزئنله ووروشاجاغام.

6بو شهرده ياشايان ائنساني دا، حيواني دا محو اده‌جيم. اونلار شئدّتلي وبادان اؤله‌جکلر.»

7رب بويورور: «بوندان سونرا يهودا پادشاهي صئدقئياني و اعيانلاريني، هم ده بو شهرده وبادان، قيلينجدان و آجليقدان صاغ قالانلاري بابئل پادشاهي نَبوکَدنِصّره و جانلاريني آلماق ائسته‌ين دوشمنلرئنه تسلئم اده‌جيم. او، اونلاري قيلينج آغزينا وره‌جک، اونلارا نه رحم، نه شَفقَت، نه ده مرحمت گؤرسده‌جک.»

8بوندان علاوه، بو خالقا دِه: رب بله ديئر: «باخ، حيات يولونو و اؤلوم يولونو قاباغينيزا قويورام.

9بو شهرده قالان قيلينج، آجليق و وبادان اؤله‌جک. لاکئن کئم باييرا چيخيب سئزي موحاصئره‌يه آلان کَلدانئلره تسلئم اولسا، صاغ قالاجاق، هچ اولماسا اؤز جا‌نيني قورتاراجاق.

10بو شهره ياخشيليق يوخ، پئسلئک اتمه‌يه نئيّت اتمئشم.» رب بويورور. «بورا بابئل پادشاهينا تسلئم ادئله‌جک، او دا بوراني يانديريب ياخاجاق.»

11يهودا پادشاهينين عايئله‌سئنه دِه: ربّئن سؤزونو اِشئدئن؛

12ای داوود نسلي، رب بله ديئر: «هر سحر عدالتله رفتار ادئن، مظلومو ظالئمئن اَلئندن قورتارين. يوخسا پئس عمل‌لرئنئزه گؤره قضبئم اود کئمي چيخيب يانديراجاق، اونو سؤندورن اولماياجاق.»

13رب بويورور: «من سنه ضئدّم، ای وادئنئن اوستونده‌کي يايلادا اولان قايادا اوتوران اورشلئم!» سئز ديئرسئز: «اوستوموزه کئم گله بئلر؟ ياشاديغيميز يِرلره کئم گئره بئلر؟»

14رب بويورور: «من سئزي عمل‌لرئنئزئن بهره‌سئنه موطابئق جزالانديرجاغام. مِشه‌لرئنئزه بئر اود سالاجاغام کي، اطرافينداکي هر شيي يانديريب يوخ اده‌جک.»"

← Chapter 20 Chapter 22 →