Genesis 43

Azerbajani Bible (South) Used in Both Iran and Azerbaijan 2008

1کَنَعان تورپاغيندا آجليق گوجلَنمئشدي.

2قارداشلارين مئصئردن گتئردئيي بوغدا يِيئلئب قورتاراندا، آتالاري اونلارا ددي: "گئنه گدئب، بئزه بئر آز ارزاق آلين."

3يهودا اونا بله ددي: "او آدام بئزه برک ائخطار ورئب کي، اگر قارداشينيز سئزئنله گلمسه، گؤزومه گؤرونمه‌يئن.

4اگر سن قارداشيميزي گؤندره‌سن، گدئب سنه ارزاق آلاريق.

5لاکئن اگر اونو گؤندرميه‌سن، گتميه‌جيئک، چونکي او آدام بئزه ددی کي، «قارداشينيز سئزئنله گلمسه، گؤزومه گؤرونمه‌يئن.»"

6ائسرايئل ددي: "نئيه او آداما داها بئر قارداشينيز اولدوغونو بئلدئرئب منه پئسلئک اتدئز؟"

7اونلار ددئلر: "او آدام اؤزوموز و عايئله‌مئز باره‌ده دفه‌لرله بئزدن بله سوآللار سوروشدو: «آيا آتانيز حله صاغدير؟ آيا آيري قارداشينيز دا وار؟» بئز ده اونون بو سوآللارينا جاواب وردئک. مگر آغليميزا گلردي کي، «قارداشينيزي گتئرئن» دئيه‌جک؟"

8سونرا يهودا آتاسي ائسرايئله ددي: "اوشاغي منئمله گؤندر کي، قالخيب گدک. بئز ده، سن ده، اوشاقلاريميز دا اؤلمه‌يئب صاغ قالاريق.

9من اونا ضامئن دورورام، اونو مندن طلب ادرسن. اگر اونو سنئن يانينا گتئرئب قاباغيندا دايانديرماسام، عؤمروم بويو قاباغيندا تقصئرکار اولاجاغام.

10اگر يوباتماسايديق، ائندي ائکي دفه گدئب-قاييتميشديق."

11آتالاري ائسرايئل اونلارا ددي: "اگر بله‌دئر، اوندا بونو ادئن: توربالارينيزدا بو تورپاغين لاپ ياخشي محصوللاريندان او آداما هدئيّه اولاراق بئر قدر بالزام، بئر قدر بال، کتئره، عطرئيّات، پوسته و بادام گؤتورون.

12اؤزونوزله ائکي قات پول گؤتورون. چوواللارينيزين ائچئنده گري قايتاريلميش پولو اؤز اَللرئنئزله قايتارين، بلکه بئر سهو اولوب.

13قارداشلارينيزي گؤتورون، قالخين و او آدامين يانينا قاييدين.

14قادئری‌موطلق تاري او آدامدا سئزئن حاقّينيزدا مرحمت اويانديرسين، او دا او بئري قارداشينيزي و بِنيامئني سئزه تحوئل ورسئن. منه گلئنجه، اگر من اوشاقلاريمدان محروم اولاجاغام، قوي اولوم."

15قارداشلار اؤزلرئله بو هدئيّه‌ني ائکي قات پوللا گؤتوردولر. بِنيامئني ده گؤتوروب قالخديلار و مئصئره گلئب، يوسئفئن حوضوروندا دوردولار.

16يوسئف بِنيامئني اونلارلا برابر گؤرنده اؤز اِو نظارتچئسئنه ددي: "بو آداملاري اِوه آپار و حيوان کسئب حاضيرلا، چونکي اونلار منئمله ناهار يئيه‌جکلر."

17او آدام يوسئفئن ددئيئنه عمل اتدي؛ بو آداملاري يوسئفئن اِوئنه آپاردي.

18قارداشلار يوسئفئن اِوئنه آپاريلديقلاري اوچون قورخوب ددئلر: "کچن دفه چوواللاريميزدا گري قايتاريلميش پول اوستونده آپاريليريق. او ائسته‌يئر کي، بئزئم ضئدّئمئزه بهانه تاپيب اوستوموزه دوشسون، بئزي اؤزونه قول اتسئن و اِششَکلرئمئزي آلسين."

19اونلار يوسئفئن اِو نظارتچئسئنه ياخينلاشديلار و اِوئن آستاناسيندا اونا بله ددئلر:

20"ای آغاميز، بئز کچن دفه دوغرودان دا ارزاق آلماق اوچون گلمئشدئک.

21آمّا گجه قالديغيميز يِره چاتديغيميز زامان، چوواللاريميزي آچيب گؤردوک کي، هر بئرئمئزئن پولو تامام-کامال چوواللاريميزين ائچئنده‌دئر. ائندي اونو اؤز اَللرئمئزله گري قايتاريريق.

22ارزاق آلماق اوچون اؤزوموزله آيري پول دا گتئرمئشدئک. آمّا بئلمئرئک کي، پولوموزو کئم بئزئم چوواللاريميزا قويموشدو."

23اِو نظارتچئسي ددي: "ناراحات اولمايين، قورخمايين. اؤزونوزون و آتانيزين تاريسي سئزه چوواللارينيزدا خزئنه وردی. پولونوز منه گلئب چاتدي." سونرا شَمعونو اونلارين يانينا گتئردي.

24او آدام، قارداشلاري يوسئفئن اِوئنه گتئردي. آياقلاريني يوماق اوچون اونلارا سو وردی و اِششَکلرئنه يِم وردی.

25قارداشلار، يوسئف ناهارا گلنه قدر، هدئيّه‌ني حاضيرلاديلار، چونکي اورادا يمک يئيه‌جکلرئني اشئتدئلر.

26يوسئف اِوه گلنده اونلار هدئيّه‌ني اِوه گتئرئب اونا تقدئم اتدئلر، اونون حوضوروندا يِره قدر اَيئلدئلر.

27يوسئف اونلارين کِفئني سوروشوب ددي: "او دِدئيئنئز قوجا آتانيز سالاماتدير؟ حله ده ياشايير؟"

28اونلار ددئلر: "سنئن قولون آتاميز سالاماتدير، حله ده ياشايير." اونلار يوسئفه اَيئلئب سجده اتدئلر.

29يوسئف باشيني قالديراندا اؤز آناسينين اوغلو اولان قارداشي بِنيامئني گؤروب ددي: "منه دِدئيئنئز لاپ کئچئک قارداشينيز بودور؟" سونرا بِنيامئنه ددي: "تاري سنه لوطف اتسئن، اوغلوم."

30يوسئف تَلَسئک اورادان چيخدي، چونکي اوره‌يي سيزيلدادي، اونو آغلاماق توتدو و اوتاغا گئرئب، اورادا آغلادي.

31سونرا اوزونو يويوب چيخدي، اؤزونه گلئب ددي: "يمک گتئرئن."

32يِمه‌يي اونا آيريجا، قارداشلارينا آيريجا، اونونلا بئرلئکده يئين مئصئرلی‌لره آيريجا قويدولار، چونکي مئصئرلئلر عئبرانئلرله بئرلئکده يمک يمزدئلر؛ بو، مئصئرلئلر اوچون ائيرنج بئر شي ائدي.

33قارداشلار بؤيوکدن-کئچئيه دوغوم حاقلارينا گؤره اونون حوضوروندا اوتوردولار. اونلار بئربئرلرئنه حيرتله باخديلار.

34يوسئفئن قاباغينداکي يمکلردن اونلارا پاي آيريلدي. لاکئن بِنيامئنئن پايي اونلارين هر بئرئنئن پاييندان بش قات آرتيق ائدي. اونلار يِيئب-ائچدئلر و اونونلا برابر خوش واخت کچئرتدئلر.

← Chapter 42 Chapter 44 →