Genesis 42

Azerbajani Bible (South) Used in Both Iran and Azerbaijan 2008

1يعقوب بئلدي کي، مئصئرده تاخيل وار. او اؤز اوغوللارينا ددي: "نه اوچون بئربئرئنئزه باخيرسينيز؟"

2سؤزونه داوام وردی: "باخ، من اشئتدئم کي، مئصئرده تاخيل وار، گدئب اورادان بئزئم اوچون تاخيل آلين کي، اؤلمه‌يئب ياشاياق."

3يوسئفئن اون قارداشي تاخيل آلماق اوچون مئصئره گتدئلر.

4آمّا يعقوب يوسئفئن قارداشي بنيامئني، قارداشلاري ائله بئرلئکده گؤندرمه‌دي، چونکي فئکئرله‌شئردي کي، اونون باشينا بئر بلا گله بئلر.

5تاخيل آلماغا گلنلر آراسيندا، ائسرايئلئن اوغوللاري دا وار ائدي، چونکي کَنَعان تورپاغيندا دا آجليق حاکئم ائدي.

6يوسئف اؤلکه‌نئن باشچيسي ائدي و اؤلکه‌نئن بوتون اهالئسئنه ده تاخيلي اؤزو ساتيردي. يوسئفئن قارداشلاري گلئب اونون حوضوروندا اوزلرئني يره قويوب سجده اتدئلر.

7يوسئف قارداشلاريني گؤروب تانيدي، لاکئن اونلارلا ياد آدام کئمي رفتار ادئب برک دانيشدي. يوسئف اونلاردان سوروشدو: "هارادان گلئبسئنئز؟" اونلار جاواب وردئلر: "ارزاق آلماق اوچون کَنَعان تورپاغيندان گلمئشئک."

8يوسئف قارداشلاريني تانيدي، آمّا اونلار يوسئفي تانيماديلار.

9يوسئف قارداشلاري باره‌ده گؤردويو يوخولاري خاطيرلاييب، اونلارا ددي: "سئز جاسوسسونوز، اؤلکه‌نئن ضعئف يرلرئني اؤيرنمَک اوچون گلئبسئنئز."

10قارداشلاري اونا ددئلر: "خير ای آغاميز، قوللارين آنجاق ارزاق آلماق اوچون گلئبلر.

11بئز هاميميز بئر آدامين اوغوللاريييق. بئز دوز آداملاريق. قوللارين جاسوس ديئللر."

12آمّا يوسئف اونلارا ددي: "خير، سئز اؤلکه‌نئن ضعئف يرلرئني اؤيرنمَک اوچون گلئبسئنئز."

13اونلار ددئلر: "بئز قوللارين اون ائکي قارداشيق و کَنَعان تورپاغيندا بئر آدامين اوغوللاريييق. کئچئک قارداشيميز ائندي آتاميزين يانيندادير، لاکئن بئر قارداشيميز يوخا چيخيب."

14يوسئف اونلارا ددي: "هر شي من ددئيئم کئمئدئر: سئز جاسوسسونوز،

15آمّا من سئزي بله ائمتاحان اده‌جيم: فئرعونون جانينا آند اولسون کي، کئچئک قارداشينيز بورايا گلمسه، سئز بورادان گده بئلميه‌جکسئنئز.

16آرانيزدان بئر نفري گؤنده‌رئن کي، قارداشينيزي گتئرسئن، لاکئن سئز بورادا ساخلاناجاقسينيز. او واخت سئزئن دوز ديئب-دِمه‌دئيئنئز بئلئنه‌جک. يوخسا فئرعونون جانينا آند اولسون کي، سئز جاسوسسونوز."

17يوسئف اوچ گون اونلاري زئنداندا ساخلادي.

18اوچونجو گون يوسئف اونلارا ددي: "ددئيئمه عمل ادئب جانينيزي قورتارين، چونکي من تاريدان قورخورام.

19اگر سئز دوز آدامسينيز، قوي قارداشلارينيزدان بئري حبس اولوندوغونوز يرده قالسين، او بئرئنئز گدئب، عايئله‌لرئنئزي آجليقدان قورتارماق اوچون تاخيل آپارين.

20سونرا کئچئک قارداشينيزي منئم يانيما گتئرئن. بلجه سؤزلرئنئزئن دوز اولدوغو بئلئنَر و سئز اؤلمزسئنئز." قارداشلار بله ده اتدئلر.

21اونلار بئربئرلرئنه ددئلر: "دوغرودان دا، بئز قارداشيميزين موقابئلئنده تقصئرکاريق. او بئزه يالوارديغي واخت چکدئيي اذئيّتي گؤردوک، لاکئن اونا قولاق آسماديق. بونا گؤره ده باشيميزا بو بلا گلدي."

22رِعوبئن اونلارا بله جاواب وردی: "مگر من دمه‌دئم اوشاغا پئسلئک اتمه‌يئن، لاکئن سئز منه قولاق آسمادينيز. ائندي اونون قانينا گؤره جزا چکئرئک."

23قارداشلار بئلمئردئلر کي، يوسئف اونلارين سؤزلرئني باشا دوشور، چونکي ترجومه‌چي واسئطه‌سئله دانيشيرديلار.

24يوسئف اونلارين يانيندان قيراغا چکئلئب آغلادي. سونرا قارداشلارينين يانينا قاييديب اونلارلا صؤحبت اتدي. آرالاريندان شَمعونو گؤتوروب قارداشلارينين گؤزو قاباغيندا اونون اَل-قولونو باغلادي.

25يوسئف امر اتدي کي، اونلارين چوواللاري تاخيللا دولدورولسون، هر بئرئنئن وردئيي پول دا اؤز چووالينا قويولسون و اونلارا يول اوچون آذوقه ورئلسئن. بله ده ادئلدي.

26قارداشلار تاخيللاريني اِششَکلرئنئن بِلئنه يوکله‌يئب، اورادان گتدئلر.

27اونلاردان بئري گجه قالديغي يرده اِششه‌يئنه يِم ورمک اوچون چوواليني آچاندا، اؤز پولونو گؤردو؛ پول چووالين آغزيندا ائدي.

28او، قارداشلارينا ددي: "پولوم اؤزومه قايتاريليب، باخين، او، چوواليمين ائچئنده‌دئر." قارداشلارين اوره‌يي ائضطئرابا دوشدو و تئتره‌يه-تئتره‌يه بئربئرلرئنه ددئلر: "تاري بئزئم باشيميزا نه ائش گتئردی؟"

29اونلار کَنَعان تورپاغينا، آتالاري يعقوبون يانينا گلدئلر و باشلارينا گلن بوتون حکايه‌لري اونا ددئلر:

30"او اؤلکه‌نئن باشچيسي اولان آدام برک دانيشدي، بئزي اؤلکه‌يه گلن جاسوسلار حساب اتدي.

31اونا ددئک: «بئز دوز آداملاريق، جاسوس ديئلئک.

32بئز بئر آتانين اوغوللاري، اون ائکي قارداشيق. بئر قارداشيميز يوخا چيخيب، لاپ کئچئيي ده ائندي کَنَعان تورپاغيندا آتاميزين يانيندادير.»

33او اؤلکه‌نئن باشچيسي اولان آدام بئزه ددي: «سئزئن دوز آدام اولدوغونوزو بوندان بئله‌جيم: قارداشلارينيزدان بئرئني يانيمدا قويوب، عايئله‌لرئنئزي آجليقدان قورتارماق اوچون تاخيل گؤتوروب گدئن.

34سونرا کئچئک قارداشينيزي يانيما گتئرئن. او زامان سئزئن جاسوس يوخ، دوز آدام اولدوغونوزو بئله‌جيم. او واخت قارداشينيزي سئزه تحوئل وره‌جيم و اؤلکه‌ده آل-وِر اده بئلرسئنئز.»"

35قارداشلار چوواللاريني بوشالدارکن گؤردولر کي، هر کسئن چوواليندا پول کئسه‌سي وار. اؤزلري و اونلارين آتاسي پول کئسه‌لرئني گؤرنده قورخدولار.

36آتالاري يعقوب اونلارا ددي: "سئز منی اؤولادسيز قويدونوز. يوسئف يوخ، شَمعون يوخ، بِنيامئني ده آپاراجاقسينيز. ائسته‌يئرسئنئز بوتون بونلاري منئم باشيما گتئره‌سئنئز."

37رِعوبئن آتاسينا بله ددي: "اگر اونو سنئن يانينا گتئرمَسَم، ائکي اوغلومو اؤلدورَرسن. اونو منئم ائختئياريما ور، من ده اونو سنه قايتارارام."

38يعقوب ددي: "اوغلوم سئزئنله گتمَيه‌جک، چونکي اونون قارداشي اؤلوب و تک قاليب. اگر گتدئيئنئز يولدا اونون باشينا بئر بلا گلسه، منئم آغ ساچلي باشيمي کَدَر ائچئنده اؤلولر دئيارينا اندئره‌جکسئنئز."

← Chapter 41 Chapter 43 →