Genesis 35

Azerbajani Bible (South) Used in Both Iran and Azerbaijan 2008

1تاري يعقوبا ددي: "قالخيب بِيت‌ائله گت و اورادا قال. اورادا تارييابئر قوربانگاه دوزلت، او تارييا کی، قارداشين عئسونون اَلئندن قاچاندا سنه نظر سالدی."

2يعقوب عايئله‌سئنه و اونونلا اولانلارين هاميسينا ددي: "يانينيزدا اولان اؤزگه بوت آللاهلاريني آتين و اؤزونوزو پاک ادئب، پالتارلارينيزي دَيئشئن.

3قالخيب بِيت‌ائله گدک. اورادا بئر قوربانگاه دوزَلده‌جيم، او تارييا کی، دردلي گونومده منه جاواب وردی و گتدئيئم يولدا منئمله اولدو."

4اونلار يانلاريندا اولان بوتون اؤزگه بوت آللاهلاريني و قولاقلارينداکي گوشوارالاري يعقوبا وردئلر. يعقوب بونلاري شِکِم ياخينليغيندا اولان چؤل پوسته‌سي آغاجين آلتيندا باسديردي.

5اونلار يولا دوشدولر. تاري اطراف شهرلرئن ساکئنلرئني دهشته سالميشدي و بونا گؤره ده اونلار يعقوبون اوغوللاريني تعقئب اتمه‌دئلر.

6يعقوب يانينداکي بوتون آداملارلا بئرلئکده کَنَعان تورپاغيندا اولان لوزا، يعني بِيت‌ائله گلدي.

7اورادا بئر قوربانگاه دوزَلدئب، او يِرئن آديني «ائل‌بِيت‌ائل» قويدو، چونکي قارداشينين اَلئندن قاچاندا تاري اؤزونو اورادا يعقوبا ظاهئر اتمئشدي.

8رئبقانين دايه‌سي دِبورا اؤلدو. او، بِيت‌ائلين آشاغيسيندا اولان پاليدين آلتيندا باسديريلدي. اورانين آدي اَلّون‌باکوت قويولدو.

9يعقوب پَدّان‌اَرامدان قاييداندا تاري گئنه يعقوبا گؤروندو و اونا برکت وردی.

10تاري اونا ددي: "سنئن آدين يعقوبدور. آرتيق آدين يعقوب چاغيريلماياجاق، بوندان سونرا آدين ائسرايئل اولاجاقدير." تاري اونون آديني ائسرايئل قويدو

11و اونا ددي: "قادئری‌موطلق تاري منم. قوي نسلئن آرتيب چوخالسين. سندن بئر مئلّت و مئلّتلر ييغيني حاصئل اولاجاق، سنئن نسلئندن پادشاهلار چيخاجاق.

12ائبراهئمه و ائسحاقا وردئيئم تورپاغي سنه وره‌جيم. سندن سونرا دا اونو سنئن نسلئنه وره‌جيم."

13تاري يعقوبلا دانيشديغي يرده اونون يانيندان يوخاري چکئلدي.

14يعقوب تارينين اونونلا دانيشديغي يرده بئر داش سوتونو قويدو، اوستونه تؤکمه‌لئک تقدئمي سَپدي و سونرا اوستونه زيتون ياغي تؤکدو.

15يعقوب تارينين اونونلا دانيشديغي يِرئن آديني بِيت‌ائل قويدو.

16اونلار بِيت‌ائلدن يولا دوشدولر. اِفراتا چاتانا ياخين راحئلئن اوشاق دوغما واختي يِتئشدي. راحئل دوغارکن چوخ آغير چکدي.

17دوغوش زاماني آغري چکنده ماما اونا ددي: "قورخما، گئنه ده بئر اوغلون اولدو."

18او، اؤلوم آياغيندا جان وِرَرکَن اوغلونون آديني بِن‌اونی قويدو، آمّا آتاسي اونون آديني بِنيامئن قويدو.

19راحئل اؤلدو و اِفراتا، يعني بِيت‌لِخِمه گدن يولدا باسديريلدي.

20يعقوب اونون قبري اوستونه بئر سوتون قويدو. او بو گونه قدر راحئلئن قبئر سوتونودور.

21ائسرايئل گئنه کؤچدو و عِدِر قولّه‌سئنئن او بئري طرفئنده چادير قوردو.

22ائسرايئل بو اؤلکه‌ده ياشايارکن، رِعوبئن گدئب آتاسينين جارئيه‌سي بئلحا ائله ياتدي. ائسرايئل بونو اشئتدي.

23يعقوبون اون ائکي اوغلو وار ائدي. لئيه‌نئن اوغوللاري: يعقوبون ائلک اوغلو رِعوبئن، شمعون، لاوي، يهودا، يئسّاکار و زِبولون.

24راحئلئن اوغوللاري: يوسئف و بنيامئن.

25راحئلئن کنئزي بئلحا‌نين اوغوللاري: دان و نَفتالي.

26لئيه‌نئن کنئزي زئلپانين اوغوللاري: جاد و آشِر. يعقوبون پَدّان‌اَرامدا دوغولان اوغوللاري بونلاردير.

27يعقوب قئريَت‌اَربَعده، يعني خِبروندا اولان مَمرِه‌يه، آتاسي ائسحاقين يانينا گلدي. ائبراهئم و ائسحاق مَمرِه‌ده قرئب ائدئلر.

28ائسحاق يوز هشتاد ائل عؤمور سوردو.

29او، قوجاليب ياشلي اولاراق آخير نَفَسئني چکدي و اؤلوب خالقينا قوشولدو. اوغوللاري عئسو و يعقوب اونو باسديرديلار.

← Chapter 34 Chapter 36 →