Genesis 34

Azerbajani Bible (South) Used in Both Iran and Azerbaijan 2008

1لئيه‌نئن يعقوبا دوغدوغو قيزي دئنا، او اؤلکه‌نئن قيزلاريني گؤرمَيه چيخدي.

2او اؤلکه‌نئن آغاسي خئولي خَمورون اوغلو شِکِم، دئنا‌ني گؤرونجه اونو توتوب اونونلا زورلا ياتدي.

3اونون قلبی يعقوبون قيزي دئنايا باغلاندي. شِکِم قيزي سِودي و اونونلا خوش دانيشدي.

4شِکِم آتاسي خَمورا ددي: "بو قيزي منه آرواد آل."

5يعقوب قيزي دئنا‌نين زورلانديغيني اشئتدي، آمّا اوغوللاري چؤلده‌کي سورولري يانيندا اولدوقلاري اوچون، اونلار گلنه قدر ساکئت قالدي.

6شِکِمئن آتاسي خَمور، يعقوبون يانينا گتدي کي، اونونلا دانيشسين.

7يعقوبون اوغوللاري بونو اشئدئب چؤلدن گلدئلر. اونلار ناراحات اولوب چوخ قضبلندئلر. چونکي شِکِم يعقوبون قيزي ائله ياتاراق ائسرايئلئن حيثئيّتئني آياق آلتينا قويموشدو. بله بئر ائش اولمامالي ائدي.

8خَمور اونلارا بله ددي: "اوغلوم شِکِمئن قلبی قيزينيزا باغلانيب. خاهئش ادئرم، قيزي اونا آرواد اولماق اوچون وره‌سئنئز.

9قوحوم اولون؛ اؤز قيزلارينيزي بئزه آرواد ورئن، بئزئم قيزلاريميزي اؤزونوزه آلين.

10ياشايين، اؤلکه ده سئزئن ائختئيارينيزدادير. بورادا ياشايين، تئجارت ادئن و مولک صاحئبي اولون."

11شِکِم قيزين آتاسينا و قارداشلارينا ددي: "سئزئن گؤزلرئنئزده لوطف تاپماق اوچون مندن نه ائستيه‌سئنئز، وره‌رم.

12مندن چوخلو باشليق و هدئيّه‌ ائسته‌يئن، منه ددئيئنئز هر شيي وره‌رم. آنجاق قيزي آرواد اولماق اوچون منه ورئن."

13يعقوبون اوغوللاري شِکِمه و اونون آتاسي خَمورا حئيله ائله جاواب وردئلر، چونکي شِکِم باجيلاري دئنا‌نين ناموسونا توخونموشدو.

14اونلارا ددئلر: "بئز بونو اده بئلمه‌رئک، باجيميزي ختنه اولونماميش بئر آداما اَره وره بئلمه‌رئک. بو بئزئم اوچون روسوايچيليق اولار.

15آنجاق بئر شرطله سئزئنله راضي اولوروق: بوتون کئشئلرئنئز ختنه ادئلئب بئزئم کئمي اولسالار،

16اؤز قيزلاريميزي سئزه اَره وره‌رئک، سئزئن قيزلارينيزي اؤزوموزه آلاريق و سئزئنله ياشاييب، بئر خالق اولاريق.

17اگر بئزه قولاق آسماياسينيز و ختنه اولونماياسينيز، قيزيميزي گؤتوروب گده‌جيئک."

18اونلارين سؤزلري خَمورون و اوغلو شِکِمئن خوشونا گلدي.

19جاوان اوغلان بو ائشي درحال اتدي، چونکي يعقوبون قيزي چوخ خوشونا گلمئشدي. شِکِم آتاسينين اِوئنده لاپ حؤرمتلي آدام ائدي.

20خَمور و اوغلو شِکِم اؤز شهرلرئنئن دروازاسينا گلدئلر و شهرئن آداملارينا بله ددئلر:

21"بو آداملار بئزه دوستلوق گؤرسدئرلر. قوي بو اؤلکه‌ده ياشاييب تئجارت اتسئنلر. باخ، بو اؤلکه اونلار اوچون کئفايت قدر گِنئشدئر. اونلارين قيزلاريني اؤزوموزه آرواد آلاريق، اؤز قيزلاريميزي دا اونلارا اَره وره‌رئک.

22بو آداملار آنجاق بئر شرطله ياشاماغا و بئر خالق اولماغا راضي اولورلار کي، بئزئم ده بوتون کئشئلرئمئز، اونلار کئمي ختنه اولونسونلار.

23مگر اونلارين سورولري، مولکلري و بوتون حيوانلاري بئزئم اولماياجاق؟ گلئن اونلارلا راضيلاشاق و اونلار ياشاسينلار."

24شهرئن دروازاسيندان کچن هر کس خَمورا و اوغلو شِکِمه قولاق آسدي؛ شهرئن بوتون کئشئلري ختنه اولوندو.

25اوچونجو گون اونلار حله ده آغري چکَرکَن، دئنا‌نين قارداشلاري، يعقوبون اوغوللاريندان ائکئسي، شمعون و لاوي، قيلينجلاريني گؤتوروب شوبهه قالديرمادان شهره گئردئلر و بوتون کئشئلري قيلينجدان کچئرتدئلر.

26خَمورو و اوغلو شِکِمي ده اؤلدوردولر. دئناني شِکِمئن اِوئندن گؤتوروب گتدئلر.

27يعقوبون باشقا اوغوللاري اؤلَنلرئن يانينا گلدئلر و شهري غارت اتدئلر، چونکي باجيلارينين ناموسونا توخونموشدولار.

28اونلارين قويون-کِچئلرئني، مال- حيوانلاريني، اِششَکلرئني، شهرده و چؤلده‌کي اولان هر شيي گؤتوردولر.

29بوتون ماللاريني، اوشاقلاريني و آروادلاريني اسئر آپارديلار، اونلارين اِولرئنده اولان هر شيي غارت اتدئلر.

30يعقوب شمعونا و لاوئيه ددي: "اؤلکه‌ده ياشايان کَنَعانلي‌لاردان و پِرئزلئلردن منه ضئدّ نئفرت قالديريب منی بلايا سالدينيز. بئز ساييجا آزيق، اگر منئم ضئدّئمه بئرله‌شئب هوجوم اده‌لر، اؤزوم ده عايئلَمله بئرلئکده هلاک اولاجاغام."

31آمّا اونلار ددئلر: "مگر بئزئم باجيميزلا بئر فاحئشه کئمي رفتار اتمه‌لي ائدی؟"

← Chapter 33 Chapter 35 →