Genesis 25

Azerbajani Bible (South) Used in Both Iran and Azerbaijan 2008

1ائبراهئم آيري بئر آرواد آلدي. اونون آدي قِطورا ائدي.

2قِطورا اونا بونلاري دوغدو: زئمران، يوقشان، مِدان، مئديان، يئشباق و شواَح.

3يوقشاندان شِبا و دِدان اولدو. دِدانين نسئللري: آشورلولار، لِتوشلولار، لِعوملولار.

4مئديانين اوغوللاري: اِفاه، اِفِر، هه‌نوک، اَبئداع و اِلداعا. بونلارين هاميسي قِطورانين اؤولادلاريديرلار.

5ائبراهئم بوتون وار-يوخونوائسحاقا وردی.

6جارئيه‌لرئنئن اوغوللارينا دا هدئيّه‌لر وردی. صاغليغيندا اونلاري اوغلو ائسحاقين يانيندان شرقه، شرق تورپاغينا طرف گؤندردي.

7ائبراهئم يوز يتمئش بش ائل عؤمور سوردو.

8او، اوزون عؤمور سوروب حياتدان دويموش حالدا عؤمرونو باشا چاتديردي و خالقينا قوشولدو.

9اوغوللاري ائسحاق و ائسماعئل اونو مَمرِه‌نئن موقابئلئنده اولان ماکپِلا ماغاراسيندا، خئتلي زوخَر اوغلو عِفرونون زَمئسئنده باسديرديلار.

10او زمئني ائبراهئم خئتلئلردن ساتين آلميشدي. ائبراهئم و آروادي سارا اورادا باسديريلدي.

11تاري ائبراهئمئن اؤلوموندن سونرا اوغلو ائسحاقا برکت وردی. ائسحاق بئر لَخايي رويئيه ياخين ياشاييردي.

12بودور ائبراهئم اوغلو ائسماعئلئن نسئل تارئخچه‌سي کي، سارانين کنئزي مئصئرلي هاجر اونو ائبراهئمه دوغدو:

13دوغولما سيراسينا گؤره ائسماعئلئن اوغوللارينين آدلاري بله‌دئر: ائسماعئلئن ائلک اوغلو نِوايوت، قِدار، اَدبِعِل، مئبسام،

14مئشما، دوما، ماسّا،

15خَدَد، تِما، يِطور، نافئش و قِدما؛

16ائسماعئلئن اوغوللاري بونلاردير، کَندلري و اوبالاري ائله بئرلئکده اونلارين آدلاري بله‌دئر. اونلار اؤز قبئله‌لرئنئن اون ائکي باشچيسي ائدئلر.

17ائسماعئل يوز اوتوز يدّي ائل عؤمور سوردو. او، عؤمرونو باشا چاتديردي و اؤلوب اَجدادلارينا قوشولدو.

18ائسماعئلئن نسئللري خَوئلادان شورا قدر اولان اراضئده ساکئن اولدولار کي، آشورا گدرکن مئصئرئن شرق سمتئنده‌دئر. او بوتون قارداشلارينين موقابئلئنده ساکئن اولدو.

19ائبراهئمئن اوغلو ائسحاقين نسئل تارئخچه‌سي بله‌دئر: ائبراهئمدن ائسحاق اولدو.

20ائسحاق اَراملي لابانين باجيسي، پَدّان‌اَرامدان اَراملي بِتوعِلئن قيزي رئبقاني آرواد آلاندا قيرخ ياشيندا ائدي.

21ائسحاق آروادي اوچون ربّه يالواردي، چونکي او، سونسوز ائدي. رب ائسحاقين يالواريشينا جاواب وردی: اونون آروادي رئبقا بويلو اولدو.

22رئبقانين بطنئنده‌کي اوشاقلار چارپيشماغا باشلاديلار. او دا "نئيه بو ائش باشيما گلدئ؟" ديئب بو باره‌ده ربدن سوروشماغا گتدي.

23رب اونا جاواب وردی: "سنئن بطنئنده ائکي مئلّت وار، سنئن قارنيندان ائکي خالق چيخاجاق. بئر خالق او بئري خالقدان گوجلو اولاجاق، بؤيوکو کئچئيئنه قوللوق اده‌جک."

24رئبقانين دوغما واختي چاتاندا اونون بطنئنده اِکئز اوغوللار وار ائدي.

25ائلک دوغولان اوشاغين بوتون دَرئسي قيرميزي و توکلو جوبّه کئمي ائدي. اوندا اونون آديني عئسو قويدولار.

26اوندان سونرا قارداشي دوغولدو. او، اَلي ائله عئسونون توپوغوندان توتموشدو. بونا گؤره ده اونون آدي يعقوب چاغيريلدي. رئبقانين اونلاري دوغدوغو واخت، ائسحاق آلتميش ياشيندا ائدي.

27اوشاقلار بؤيودولر. عئسو ماهئر شئکارچي و چؤل آدامي اولدو. حالبوکي يعقوب چاديرلاردا ياشايان مولايئم بئر آدام اولدو.

28ائسحاق عئسويو سِوئردي، چونکي اونون شئکار اتدئيي حيوانلارين مزه‌سي آغزينا خوش ائدي. لاکئن رئبقا يعقوبو سِوئردي.

29بئر گون يعقوب شوربا پئشئرئردي. عئسو چؤلدن آج گلدي.

30عئسو يعقوبا ددي: "بو قيرميزي شوربادان بئر آز ور، ييئم، چونکي آجميشام." بونا گؤره ده عئسويا اِدوم آدي ورئلدي.

31يعقوب ددي: "اوّلجه ائلک اوغوللوق حاقّيني منه سات."

32عئسو ددي: "باخ، من اؤلوم حاليندايام، ائلک اوغوللوق حاقّي نَيئمه لازيمدير؟"

33يعقوب ددي: "اوّلجه منه آند ائچ." عئسو اونا آند ائچدي و ائلک اوغوللوق حاقّيني يعقوبا ساتدي.

34يعقوب عئسويا چؤرک و مرجي شورباسي وردی. عئسو يئب ائچدي و سونرا قالخيب گتدي. بلجه عئسو ائلک اوغوللوق حاقّينا حقارت اتدي.

← Chapter 24 Chapter 26 →