Genesis 24 — Azerbajani Bible (South) Used in Both Iran and Azerbaijan 2008

7گؤيلرئن تاريسي رب کي، مني آتامين اِوئندن و دوغولدوغوم يردن چيخارتدي و منئمله دانيشيب آند ائچدي کي "بو تورپاغي سنئن نسلئنه وره‌جيم"، اؤز مَله‌يئني سنئن قاباغيندا گؤندره‌جک و سن اورادان اوغلوما آرواد آليب گتئره‌جکسن.

8اگر او آرواد سنئنله گلمک ائستمه‌سه، سن بو آنددان آزاد اولورسان. آمّا منئم اوغلومو اورايا آپارما."

9نؤکر اَلئني آغاسي ائبراهئمئن بودو آلتينا قويوب بو ائشه گؤره اونا آند ائچدي.

10نؤکر آغاسينين دَوه‌لرئندن اون دوه گؤتوروب آغاسينين لاپ ياخشي هدئيّه‌لرئله گتدي و اَرام نَخه‌ره‌يئم، ناخورون شهرئنه گلدي.

11نؤکر آخشام دوه‌لري شهرئن اشئيئنده اولان قويونون يانيندا ياتيرتدي. آروادلار بو واخت سو چکمَک اوچون بورايا گلردئلر.

12سونرا دوعا اتدي: "يارب، آغام ائبراهئمئن تاريسي، يالواريرام، بو گون ائشئمي آواند اِله و آغام ائبراهئمه محبّت گؤرسد.

13باخ، من بو بولاغين يانيندا دورورام؛ شهر ساکئنلرئنئن قيزلاري سو چکمَک اوچون بورايا گلئرلر.

14قوي اِله اولسون کي، او قيزا کي، ديئرم "خاهئش ادئرم، سهنگئني اندئر، سو ائچئم"، و او دا ديئر کي، "ائچ، دوه‌لرئنه ده وره‌رم."، قوي او قيز قولون ائسحاق اوچون تعيئن اتدئيئن آرواد اولسون؛ بوندان بئله‌رم کي، آغاما محبّت ادئرسن."

15او، سؤزونو بئتئرمه‌مئشدي کي، بِتوعِلئن قيزي رئبقا کي، ائبراهئمئن قارداشي ناخورون آروادي مئلکادان دوغولموشدو، چئينئنده سهنگ اورايا گلدي.

16قيز چوخ گؤزل و باکئره ائدي. هچ کس اونونلا ياخينليق اتمه‌مئشدي. او، بولاغا اِندي و سهنگئني دولدوروب يوخاري قالخدي.

17نؤکر اونون پئشوازينا قاچيب ددي: "خاهئش ادئرم، سهنگئندن بئر آز سو ور، ائچئم."

18قيز ددي: "آغام، بويور ائچ". قيز تز سهنگئني اَلي اوستونه اِندئردي و اونا سو وردی.

19اونا سو ورندن سونرا ددي: "دوه‌لرئن اوچون ده سو چکرم کي، ائچئب دويسونلار."

20قيز تز سهنگئني تَکنه‌يه بوشالتدي، سو چکمَک اوچون قويونون يانينا گري قاچدي و نؤکرئن بوتون دوه‌لري اوچون سو چکدي.

21بو آرادا او آدام ساکئت دوروب دئقّتله قيزا باخيردي کي، ربّئن اونون سفرئني باشاريليغا چاتديريب چاتديرماماغيني بئلسئن.

22دوه‌لر سو ائچئب قورتاراندا او آدام چکئده بئر بِکا اولان قيزيل بورون حالقاسي، قيزين قوللاري اوچون و چکئده اون شِکِل اولان ائکي قولباق گؤتوروب ددي:

23"لوطفن منه دِه گؤروم، سن کئمئن قيزيسان؟ آيا آتانين اِوئنده بئزه گجه‌ني قالماق اوچون يِر تاپيلار؟"

24قيز اونا ددي: "من مئلکانين ناخورا دوغدوغو بِتوعِلئن قيزييام."

25گئنه ددي: "بئزده سامان دا، يِم ده چوخدور و قالماق اوچون يِر ده وار."

26او آدام اَيئلئب ربّه سجده اتدي.

27سونرا ددي: "آغام ائبراهئمئن تاريسي رب موبارک اولسون کي، محبّت و وفاسيني آغامدان قييمادي: رب مني بئرباش آغامين قارداشينين اِوئنه گتئردي."

28قيز قاچيب، آناسينين طايفاسيندا بو باره‌ده دانيشدي.

29رئبقانين بئر قارداشي وار ائدي، آدي لابان ائدي. لابان چيخيب او آدامين يانينا، بولاغين باشينا قاچدي.

30او، باجيسينين بورون حالقاسيني و قوللارينداکي قولباغي گؤرنده، باجيسي رئبقانين "بو آدام منئمله بله دانيشدي" سؤزلرئني اشئدنده او آدامين يانينا گلدي. او، بولاق باشيندا دوه‌لرئن يانيندا دايانميشدي.

31لابان ددي: "اي ربّئن برکت وردئيي آدام، ائچَري گئر. نه اوچون اشئکده دورورسان؟ من سنه اِوي و دوه‌لره يِر حاضيرلاميشام."

32او آدام اِوه گئردي. لابان دوه‌لرئن يوکونو بوشالتدي، اونلارا سامان و يِم وردی، و سو گتئردي کي، او و اونونلا بئرلئکده اولانلار آياقلاريني يوسونلار.

33اونلارين قاباغينا يِمک گتئرئلدي، لاکئن بو آدام ددي: "مقصدئمي دانيشمايينجا يميه‌جيم." لابان ددي: "دانيش."

34او ددي: "من ائبراهئمئن نؤکرئيم.

35رب آغاما چوخلو برکت ورئب، اِله کي، وارلي بئر آدام اولوب. اونا سورولر و رَمه‌لر، قيزيل و گوموش، نؤکرلر و کنئزلر، دوه‌لر و اششکلر ورئب.

36آغامين آروادي سارا قوجا ائکن آغاما بئر اوغول دوغدو. آغام اؤزونه مخصوص اولان هر شيي بو اوغولا وردی.

37سونرا دا منی آند ائچدئرئب ددي: "اؤلکه‌لرئنده ياشاديغيم کَنَعانليلارين قيزلاريندان اوغلوما آرواد آلماياجاقسان،

38لاکئن آتامين طايفاسينا، قوحوملاريمين يانينا گدئب، اورادان اوغلوما بئر آرواد آلاجاقسان."

39من آغاما ددئم: "بلکه او آرواد منئمله گلمه‌دي."

40او منه ددي: "يولونو گتدئيئم رب سنئنله اؤز مَله‌يئني گؤندره‌جک، او دا سنه يول آچاجاق و قوحوملاريمين آراسيندان، آتامين طايفاسيندان اوغلوما بئر آرواد آلاجاقسان.

41طايفامين يانينا گتدئيئن زامان، منه ائچدئيئن آنددان آزاد اولاجاقسان. اگر او قيزي سنه ورمسه‌لر، ائچدئيئن آنددان آزاد اولاجاقسان."

42من ده بو گون بولاغين يانينا گلئب ددئم: "اي آغام ائبراهئمئن تاريسي رب، يالواريرام، گتدئيئم يولو آچ.

43باخ، ائندي من بولاغين يانيندا دورورام؛ او قيز کي، سو چکمه‌يه گلئر و من اونا ديئرم "خاهئش ادئرم، منه سهنگئندن بئر آز سو ور، ائچئم"،

44او دا منه ديئر "سن ده ائچ، دوه‌لرئنه ده سو چکئم"، قوي او قيز آغامين اوغلو اوچون ربّئن تعيئن اتدئيي آرواد اولسون."

45من اوره‌يئمده دوعا اتمه‌يي قورتارماميشديم کي، رئبقا سهنگي چئينئنده گلدي و بولاغا اِنئب سو چکدي. اونا ددئم: "خاهئش ادئرم، منه سو ور."

46او تز سهنگئني چئينئندن اِندئرئب ددي: "سن ائچ، گدئم دوه‌لرئنه ده سو ورئم." من ائچدئم، او دا دوه‌لره سو وردی.

47اوندان سوروشدوم: "سن کئمئن قيزيسان؟" او ددي: "مئلکانين ناخورا دوغدوغو بِتوعِلئن قيزييام." من ده اونون بورنونا حالقا و قوللارينا دا قولباق تاخديم.

48سونرا اَيئلئب ربّه سجده اتدئم. ربّه، آغام ائبراهئمئن تاريسينا شوکور اتدئم کي، آغامين قارداشي نوه‌سئني اوغلونا آلماق اوچون منه دوغرو يولو گؤرستدي.

49اگر منئم آغاما محبّت و صداقتله رفتار اده‌جکسئز، ائندي منه ديئن. اگر اتميه‌جکسئنئز ده، منه ديئن. اِله کي، من ده نه يولا گده‌جيئمي بئلئم."

50لابان و بِتوعِل اونا بله جاواب وردئلر: "بو ائش ربدن اولدو؛ سنه نه ياخشي، نه ده پئس سؤز دئيه بئله‌رئک.

51باخ، رئبقا حوضوروندادير: اونو گؤتور گت و قوي او، ربّئن ددئيي کئمي آغانين اوغلونا آرواد اولسون."

52ائبراهئمئن نؤکري اونلارين سؤزلرئني اشئدنده يِره قاپانيب ربّه پرستئش اتدي.

53نؤکر قيزيل-گوموش شيلر و پالتارلار چيخارديب رئبقايا وردی. اونون قارداشينا و آناسينا دا قئيمتلي شيلر وردی.

54اؤزو و اونونلا بئرلئکده اولان آداملار ييئب-ائچدئلر و گجه‌ني سحر اتدئلر. سحر اونلار قالخاندا نؤکر ددي: "منی آغامين يانينا گؤنده‌رئن."

55قيزين قارداشي ائله آناسي ددئلر: "قوي قيز بئر نچه گون، هچ اولماسا اون گون قالسين، سونرا گدر."

56نؤکر اونلارا ددي: "ائندي کي رب منه يول آچدي، منی يوباتمايين، بوراخين آغامين يانينا گدئم."

57اونلار ددئلر: "قوي قيزي چاغيريب اؤز دئلئندن اشئدک."

58رئبقاني چاغيريب اوندان سوروشدولار: "آيا بو آداملا گدئرسن؟" او دا "گدئرم" ددي.

59اونلار باجيلاري رئبقاني، اونون دايه‌سئني، ائبراهئمئن نؤکرئني و اونونلا اولان آداملاري يولا سالديلار.

60رئبقايا برکت ورئب ددئلر: "اي باجيميز، مئنلرجه، اون مئنلرجه اؤولادا آنا اولاسان! قوي نسلئن عاصئلرئن يوردونا صاحئب اولسون!"

61رئبقا و قوللوقچولاري قالخيب دوه‌لره مئندئلر و او آداملا بئرلئکده گتدئلر. بلجه، نؤکر رئبقاني گؤتوروب گتدي.

62بو واخت ائسحاق بئرلَخايي رويئدن گلمئشدي، چونکي او، نِگِب تورپاغيندا ياشاييردي.

63آخشام دوشنده ائسحاق گزمک اوچون چؤللويه گتدي. باشيني قالديريب باخاندا گؤردو کي، دوه‌لر گلئر.

64رئبقا دا باشيني قالديريب ائسحاقي گؤرنده دوه‌دن دوشدو..

65او، نؤکردن سوروشدو: "بو آدام کئمدئر کی، بئزئم پئشوازيميز اوچون چؤللويه گلئر؟" نؤکر ددي: "آغامدير." رئبقا روبندئني اوزونه چکئب اؤرتوندو.

66نؤکر باش ورمئش بوتون ائشلر باره‌ده ائسحاقا دانيشدي.

67ائسحاق رئبقاني آناسي سارانين ياشاديغي چاديرا آپاردي و رئبقاني آرواد آلدي و ائسحاق اونو سودي. بلجه ائسحاق آناسينين اؤلوموندن سونرا تسلّي تاپدي.