Ezekiel 31

Azerbajani Bible (South) Used in Both Iran and Azerbaijan 2008

1اسئرلئيئمئزئن اون بئرئنجي ائلئنده، اوچونجو آيين بئرئنجي گونو منه ربّئن بو سؤزو نازئل اولدو:

2"ای بشر اوغلو، مئصئر پادشاهي فئرعونا و اونون بوتون جاماعاتينا دِه: «عظمتده کئم سنئنله موقايئسه ادئله بئلر؟

3باخ، آشور لوبنانداکي سئدر آغاجينا بَنزه‌يئردي، مِشه‌يه کؤلگه سالان گؤزل بوداقلاري وار ائدي، چوخ اوجا ائدي، باشي بولودلارا چاتيردي.

4اونو سولار بؤيوتدو؛ درئن سو قايناقلاري اونون بويونو اوجالتدي. چايلاري اَکئلدئيي يري اَحاطه اتدي، آرخلاري چؤلده‌کي بوتون آغاجلارا چاتيردي.

5بونا گؤره ده چؤلده‌کي بوتون آغاجلاردان بؤيوک اولدو؛ بول سو ائچدئيي اوچون قول-بوداق آتيب شاخه‌لري اوزاندي.

6بوتون گؤي قوشلاري اونون بوداقلاريندا يووا قوردولار؛ بوتون چؤلون وحشي حيوانلاري اونون شاخه‌لري آلتيندا بالالادي، بوتون بؤيوک مئلّتلر کؤلگه‌سئنده ياشادي.

7بؤيوکلويو و اوزون بوداقلاري ائله گؤزل اولدو، چونکي کؤکلري بول سو ائچئنده ائدي.

8تارينين باغچاسينداکي سئدر آغاجلاري دا بويدا اونا چاتمازدي، شام آغاجلاري بويدا اونون بوداقلارينا يِتمَزدي، چئنار آغاجلاري اونون شاخه‌لري کئمي ديئلدي، تارينين باغچاسينداکي آغاجلاردان هچ بئري اونون کئمي گؤزل ديئلدي.

9چوخلو بوداقلارلا او سئدر آغاجيني گؤزل‌لَشدئردئم، تارينين باغچاسي اولان عَدنده‌کي بوتون آغاجلار، اونا پاخيلّيق اتدئلر.»

10بونا گؤره ده پروردئگار رب بله ديئر: «ائندي کي بويو اوجاليب باشي بولودلارا چاتاندا، اوجاليغينا گؤره اوره‌يي کئبئرلَندي،

11من ده اونو مئلّتلرئن گوجلو بئرئنه تسلئم اده‌جيم. او دا اونون پئسلئيئنئن عوضئني وره‌جک. من اونو قووموشام.

12ياد-اِللي مئلّتلرئن لاپ رحمسئزي اونو کَسئب تک-تنها بوراخيب. بوداقلاري داغلارا و بوتون دره‌لره دوشوب. شاخه‌لري اؤلکه‌نئن بوتون وادئلرئنده قيريليب قاليب. يِر اوزونون بوتون خالقلاري کؤلگه‌سئندن چکئلئب اونو ترک ادئبلر.

13گؤيده‌کي بوتون قوشلار اونون ييخيلميش گؤوده‌سي اوستونه قونورلار، چؤلون بوتون وحشي حيوانلاري اونون شاخه‌لري آراسيندا ياشاييرلار.

14بو اونا گؤره اولوب کي، بئر داها سولارين ياخينليغيندا بئتَن هچ بئر آغاج بوي-بوخون آتماسين، باشيني بولودلارا چاتديرماسين، بول سو ائچَن هچ بئر آغاج بو قدر اوجالماسين. چونکي اونلارين هاميسي قبئره اِنَن ائنسانلارلا بئرلئکده، اؤلومه–يِرئن درئنلئکلرئنه تسلئم ادئلئبلر.»

15پروردئگار رب بله ديئر: «سئدر آغاجي اؤلولر دئيارينا اِندئيي گون ياس توتدوردوم؛ درئن سو قايناقلاريني اونا آخماقدان دايانديرديم، چايلارينين قاباغيني کَسدئم، گور سولارين چوخلاري کَسئلدئلر. او آغاج اوچون لوبنانا ياس توتدوردوم و بوتون چؤل آغاجلاري اونون اوزوندن سولدولار.

16قبئره اِنَنلرله بئرلئکده اونو اؤلولر دئيارينا اِندئردئيئم زامان، داغيلماسينين گورولتوسوندن مئلّتلري لرزه‌يه سالديم. او زامان عدن باغينداکي بوتون آغاجلار، لوبنانين لاپ سِچئلمئش، لاپ ياخشي و بول سولانان آغاجلاري يِرئن درئنلئکلرئنده تسلّی تاپدي.

17کؤلگه‌سئنده ياشايانلار، مئلّتلر آراسيندا اونا آرخا دورانلار دا اونونلا بئرلئکده اؤلولر دئيارينا، قيلينجلا اؤلدورولموش آداملارين يانينا اِندئلر.

18عدن آغاجلاريندان هانسي عئزّت و عظمتده سنئنله موقايئسه ادئله بئلر؟ آنجاق سن عدن آغاجلاري ائله بئرلئکده يِرئن درئنلئکلرئنه اِندئرئله‌جکسن. قيلينجلا اؤلدورولموش ختنه‌سئزلرئن آراسيندا ياتاجاقسان. فئرعونون و اونون جاماعاتينين عاقئبتي بله اولاجاق.» پروردئگار رب بويورور."

← Chapter 30 Chapter 32 →