Esther 7

Azerbajani Bible (South) Used in Both Iran and Azerbaijan 2008

1پادشاهلا هامان مَلَکه اِستِرئن ضئيافتئنه گلدئلر.

2ائکئنجي گون شراب ائچئلَنده پادشاه گئنه اِستِردن سوروشدو: «مَلَکه اِستِر، نه ائسته‌يئرسن؟ دِه، سنه ورئم! آرزون ندئر؟ حتّا پادشاهليغين ياريسي اولسا بِله، سنه ورئله‌جکدئر.»

3مَلَکه اِستِر پادشاها جاواب ورئب ددي: «اگر سنئن گؤزونده لوطف تاپميشام، ای پادشاه، اگر پادشاهين خوشونا گلئر، ائسته‌يئم بودور کي، منه حياتيمي عطا اده‌سن، خالقيم اوچون ده ائسته‌يئم بودور.

4چونکي هم مَن، هم ده خالقيم قيريلماق، اؤلدورولمَک و محو ادئلمَک اوچون ساتيلميشيق. اگر بئزي، کئشئلري و آروادلاري، قول کئمي ساتسايديلار، ساکئت قالارديم، چونکي پادشاهي بله بئر دَرد ائله ناراحات اتمه‌يه دَيمَز.»

5او زامان پادشاه اَخَشوروش مَلَکه اِستِردن سوروشدو: «بو ائشي کئم ادئر؟ هارادادير؟ کئمئن بله بئر ائسته‌يي وار؟»

6اِستِر ددي: «بئزه عداوت ادن دوشمنئمئز بو شَرئر هاماندير!» پادشاهين و مَلَکه‌نئن حوضوروندا هاماني دهشت بورودو.

7پادشاه قضب ائله شراب سوفره‌سئندن قالخدي و سارايين باغچاسينا چيخدي. آمّا هامان ائچه‌رئده قالدي کي، مَلَکه اِستِره جاني اوچون يالوارسين، چونکي آنلاميشدي کي، پادشاه اونون اؤزونه زئيان يتئرمَيه قَرار ورئب.

8پادشاه ساراي باغچاسيندان شراب ائچدئکلري ضئيافت يرئنه قاييداندا گؤردو کي، هامان اِستِرئن اولدوغو کورسونون اوستونه دؤشه‌نئب. پادشاه ددي: «بو آدام اِوئمده، منئم يانيمدا مَلَکه‌‌يه قَصد اده‌جک مَگَر؟» اِله بو سؤز پادشاهين آغزيندان چيخاندا هامانين اوزونو اؤرتدولر.

9حَرَم‌آغالاردان خَربونا آدلي بئر نفر کي، پادشاهين حوضوروندا ائدي، ددي: «باخ، هامانين اِوئنئن قاباغيندا اَلّي قول‌آچ اوجاليغيندا بئر دار آغاجي وار. هامان اونو پادشاها خيئر خبر ورن موردوکاي اوچون حاضيرلاتديريب.» پادشاه ددي: «اوندان اؤزونو آسين!»

10بلجه هامانين موردوکاي اوچون دوزلتدئردئيي دار آغاجيندان اونون اؤزونو آسديلار. بوندان سونرا پادشاهين قضبي سويودي.

← Chapter 6 Chapter 8 →