Esther 6

Azerbajani Bible (South) Used in Both Iran and Azerbaijan 2008

1همئن گجه پادشاهين يوخوسو قاچدي. او امر اتدي کي، حؤکمدارليغينين خاطئره کئتابي، سالنامه‌لر کئتابي گتئرئلسئن. بونلار پادشاهين حوضوروندا اوخوندو.

2اورادا يازي تاپيلدي کي، موردوکاي ساراي دروازاسينين کشئکچئلرئندن بئگتان و تِرِش آدلي ائکي خادئم حاقّيندا خبر ورمئشدي کي، پادشاه اَخَشوِروشا سوئي-قصد حاضيرلاييبلار.

3پادشاه ددي: "بونا گؤره موردوکايا هانسي شرف و عئزّت ورئلدي؟" اونون خئدمتئنده دوران نؤکرلر ددي: "بونا گؤره اونا هچ نه ادئلمه‌يئب."

4پادشاه ددي: "حَيَطده کئم وار؟" بو زامان هامان پادشاهين سارايينين بايير حَيَطئنه گئرمئشدي کي، پادشاهلا دا‌نيشيب موردوکايي دوزلتدئيي دار آغاجيندان آسديرسين.

5پادشاهين نؤکرلري اونا ددي: "باخ، هامان حَيَطده دايانيب." پادشاه ددي: "گلسئن ائچَري."

6هامان ائچَري گلنده پادشاه اوندان سوروشدو: "پادشاهين شَرَفلَندئرمک ائسته‌دئيي آداما نه گرک ادئلسئن؟" هامان دا اؤزو اؤزونده دوشوندو: «مندن باشقا کئمي شَرَفلَندئرمک ائستر کي؟"

7بو حالدا هامان پادشاها بله ددي: "پادشاه کئمي شَرَفلَندئرمک ائسته‌سه، قوي اونا بله ادئلسئن:

8پادشاهين گِيئندئيي شاهليق لئباسي، پادشاهين مئندئيي آت کي، باشينا شاهليق تاجي تاخيلير، گتئرئلسئن.

9همئن پالتار و آت پادشاهين لاپ اوجا روطبه‌لي ريئسلرئندن بئرئنئن اَلئنه ورئلسئن کي، پادشاهين شَرَفلَندئرمک ائسته‌دئيي آدامي گِيئندئرئب آتا مئندئرسئنلر و شهر ميدانيندا گَزدئرسئنلر و قاباغا دوشوب بله جار چکسئنلر: «پادشاه ائسته‌دئيي آدامي بو جور شَرَفلَندئرئر.»"

10پادشاه هامانا ددي: "پالتار و آتي تز گؤتور و ساراي دروازاسيندا وظئفه‌يه دوران يهودي موردوکايا ددئکلرئنئن هچ بئرئني اَسکئلتمه‌دن ات."

11هامان پالتاري و آتي گؤتوروب موردوکايا گِيئندئردي. سونرا آتا مئندئرئب شهرئن ميدانيندا گَزدئردي و قاباغيندا جار چکدي: "پادشاه ائسته‌دئيي آدامي بو جور شَرَفلَندئرئر."

12بوندان سونرا موردوکاي ساراي دروازاسينا قاييتدي. لاکئن هامان ماتم ائچئنده باشي اؤرتولو حالدا تز اِوه قاييتدي.

13او، آروادي زِرِشه و بوتون دوستلارينا باشينا گلن بوتون احوالاتلاري دانيشدي. حئکمتلي مصلحتچئلري ائله آروادي زِرِش اونا ددئلر: "اگر قاباغيندا ييخيلماغا باشلاديغين بو موردوکاي يهودي عئرقئندندئر، اونا گوجون چاتماز، قطعن قاباغيندا ييخيلاجاقسان."

14اِله اونونلا صؤحبت ادئردئلر کي، پادشاهين حرم‌آغالاري گلئب هاماني تَلَسئک اِستِرئن قوردوغو ضئيافته آپارديلار.

← Chapter 5 Chapter 7 →