Daniel 9

Azerbajani Bible (South) Used in Both Iran and Azerbaijan 2008

1ماد طايفاسيندان اَخَشوِروشون اوغلو داريوشون پادشاهليغينين بئرئنجي ائلي ائدي. او، کَلدانئلر اوستونه پادشاه قويولموشدو.

2اونون پادشاهليغينين بئرئنجي ائلئنده، من دانيال، کئتابلاردان اؤرشَلئمئن وئران قالاجاغينين نِچه ائل چکه‌جيئني اؤيرَندئم کي، ربّئن سؤزو اونو اِرِميا پيغمبره آشکار اتمئشدي؛ يعني يتمئش ائل.

3من پروردئگار تارييا اوز توتدوم، چول گِيئب کوله اوتوردوم، اوروج توتاراق دوعا و يالواريشلا اونو آختارديم.

4تاريم ربّه دوعا اتدئم و اِعتئراف اده‌رک ددئم: "سنه دوعا ادئرم، ای بؤيوک و زَهملي پروردئگار تاري! سن، سني سِوَنلر و امرلرئنه عمل ادنلر اوچون عهدئنه صادئق قاليب محبّت گؤرسه‌دئرسن.

5بئز گوناه و خاطا اتمئشئک، پئسلئک ادئب سنه عاصي اولموشوق. سنئن امرلرئندن و حؤکملرئندن اوز دؤنده‌رمئشئک.

6بئز سنئن پيغمبرلرئنه کي، سنئن آدينلا پادشاهلاريميزا، باشچيلاريميزا، آتالاريميزا و اؤلکه‌نئن بوتون خالقينا دانيشيرديلار، قولاق آسماميشيق.

7ای پروردئگار، صالحلئک سنه عاييددير، لاکئن بئزه بو گونکو کئمي اوز قاراليغي! بو اوز قاراليغي، يهودا آداملارينا، اورشَلئمده ياشايانلارا و بوتون اوزاقدا و ياخيندا اولان ائسرايئل‌لی‌لره عايئددير کي، سن اونلاري سنه اتدئکلري خائنلئک اوزوندن بوتون اؤلکه‌لرده اسئر اتدئن.

8يارب، بئزئم، پادشاهلاريميزين، باشچيلاريميزين و آتالاريميزين اوزو قارادير، چونکي سنئن ضئدّئنه گوناه اتمئشئک.

9مرحمت و باغيشلاماق پروردئگار تاريميزا عاييددير، چونکي بئز اونون ضئدّئنه عوصيان اتمئشئک.

10تاريميز ربّئن سؤزونه قولاق آسماميشيق، اؤز قوللاري پيغمبرلر واسئطه‌سئله بئزه وردئيي قانونلارينا عمل اتمه‌مئشئک.

11بوتون ائسرايئللی‌لر سنئن قانونونو پوزوب آزديلار، سنئن سؤزونه قولاق آسماديلار. بونا گؤره ده سن آند ائچدئيئن لعنتي کي، تارينين قولو موسانين قانونوندا يازيلميشدي، باشيميزا ياغديردين، چونکي اونون ضئدّئنه گوناه اتمئشئک.

12او دا باشيميزا بؤيوک بلا گتئره‌رک بئزئم و حؤکم ادن حاکئملرئمئزئن ضئدّئنه ددئيي سؤزلري يرئنه يتئردي، چونکي اورشَلئمه گلن بلا گؤيلر آلتيندا اولان هچ بئر يِره گلمه‌يئب.

13موسانين قانونوندا يازيلديغي کئمي بوتون بو بلا باشيميزا گلدي؛ آمّا حله ده تاريميز ربّئن ائلتئفاطيني آختارماميشيق کي، تقصئرلرئمئزدن دؤنَک و اونون حقئقتئني درک اِدَک.

14رب ده حاضيرلاديغي بو بلاني باشيميزا گتئردي. چونکي تاريميز رب اتدئيي بوتون ائشلرئنده صالحدئر، و بئز اونون سَسئنه قولاق آسماميشيق.

15ای تاريميز پروردئگار، سن اؤز خالقيني مئصئر تورپاغيندان قووّتلي اَلئنله چيخارتدين و بو گونه قدر اؤزون اوچون بئر آد قازاندين! آمّا بئز گوناه ائشلَتدئک، پئسلئک اتدئک.

16ای پروردئگار، بوتون صالحلئيئنه گؤره سنه يالواريرام، قِيض و قضبئني اؤز شهرئن اورشَلئمدن، موقدّس داغيندان دؤنده‌ر. چونکي بئزئم گوناهلاريميزدان و آتالاريميزين تقصئرلرئندن اؤتري اورشَلئم و سنئن خالقين بوتون اطراف خالقلار آراسيندا روسواي اولدو.

17ای تاريميز، ائندي قولونون دوعاسيني و يالواريشلاريني اشئت. ای پروردئگار، اؤز آدينين خاطئرئنه ائشيقلي اوزونو وئران اولان موقدّس مکانينا طرف چِوئر.

18ای تاريم، قولاق ورئب اشئت، گؤزونو آچيب بئزئم وئرانليقلاريميزي و سنئن آدينلا چاغيريلان شهري گؤر. چونکي اؤز صالحلئيئمئزه گؤره يوخ، سنئن بؤيوک مرحمتئنه گؤره يالواريشلاريميزي سنئن حوضورونا تقدئم ادئرئک.

19ای پروردئگار، اشئت، ای پروردئگار، باغيشلا، ای پروردئگار، دئقّت ات و حرکته گل. ای تاريم، اؤز آدينين خاطئري اوچون يوباتما، چونکي شهرئن و خالقين سنئن آدينلا چاغيريلير."

20من حله دانيشيب دوعادا اؤزومون و خالقيم ائسرايئلئن گوناهلاريني اعتئراف اده‌رک تاريمين موقدّس داغي اوچون يالواريشيمي تاريم ربّه تقدئم ادئردئم کي،

21حله دوعا اِدَرکَن، اوّل گؤرونتوده گؤردويوم آدام-جَبراييل- آخشام قورباني ورئلَن واخت جلد اوچاراق يانيما گلدي.

22او منی باشا سالدي و منئمله دا‌نيشيب ددي: "ای دانيال! ائندي من گلدئم کي، سنه بصئرت و فهم ورئم.

23سنئن دوعانين باشلانيشيندا تاري جاواب وردی و من ده گلدئم کي، اونو سنه چاتديريم، چونکي تاري سني چوخ سِوئر. بونا گؤره ائندي سؤزوم باره‌ده دوشون و رؤياني بئل.

24سنئن خالقين و موقدّس شهرئن اوچون يتمئش هفته تعيئن اولونوب کي، عاصئلئک بئتسئن، گوناه آخيرا چاتديريلسين، تقصئرلر اوچون کفّاره ورئلسئن، ابدی صالحلئک گتئرئلسئن، رؤيا و نبئلئک مؤهورلَنسئن، لاپ موقدّس يِر مسح ادئلسئن.

25بونو بئل و آنلا: اورشَلئمي برپا ادئب تئکمک اوچون ورئلَن فرمانين چيخماسيندان مسح اولونموش حؤکمدارا قدر، يدّي هفته و آلتميش ائکي هفته اولاجاق. اورشَلئم تزه‌دن کوچه‌لر و خندقله تئکئله‌جک، آمّا بو چتئن واختلاردا اولاجاق.

26آلتميش ائکي هفته‌دن سونرا مسح اولونان هلاک اولاجاق، آمّا بو اؤزو اوچون اولماياجاق. گله‌جک حؤکمدارين خالقي، شهري و موقدّس يري وئران اده‌جک. اونون آخيري سل کئمي اولاجاق. موحارئبه آخيرا قدر داوام اده‌جک. وئرانه‌لئکلر اولاجاغينا قرار ورئلئب.

27او، بئر هفته عرضئنده چوخلاري ائله عهد باغلاياجاق، آمّا هفته‌نئن اورتاسيندا قوربانلا تقدئمي دايانديراجاق. ائيرنجلرئن قانادي اوستونده وئرانه‌لئک گتئرن گله‌جک. او زاماناجاق کي، تعيئن ادئلمئش عاقئبتي وئرانه‌لئک گتئره‌نئن باشينا تؤکولسون."

← Chapter 8 Chapter 10 →