Daniel 10

Azerbajani Bible (South) Used in Both Iran and Azerbaijan 2008

1فارس پادشاهي کوروشون حؤکمدارليغينين اوچونجو ائلئنده بِلطِشَصّر آدلانان دانيالا بئر وحی گلدي. بو وحی حقئقي ائدي و بؤيوک بئر ساواشدان سؤز ادئردي. او بو وحيي باشا دوشدو و رؤيا باره‌ده فهمي وار ائدي.

2او گونلر من دانيال اوچ هفته ياس توتدوم.

3اوچ هفته قورتارانا قدر، من دادلي يمک يِمه‌دئم، اَت و شراب دئلئمه دَيمه‌دي و هچ بئر عطئرلي ياغ سورتمه‌دئم.

4بئرئنجي آيين ائيئرمي دؤردونجو گونو من بؤيوک چاي دَجله‌نئن کناريندا ائدئم.

5باشيمي قالديريب گؤردوم کي، کتان پالتار گِيئنمئش، بِلي خالئص قيزيللا قورشانان بئر نفر وار.

6اونون بدني زبرجد کئمي، اوزو شئمشيه بَنزَر، گؤزلري يانار مشعل‌لر کئمي، قول‌لاري و آياقلاري جئلانميش بورونج کئمي ائشيلداييردي، اونون دانيشيغينين سَسي بؤيوک بئر جاماعات گورولتوسو کئمي ائدي.

7فقط من دانيال بو رؤياني گؤردوم، منئمله بئرلئکده اولان آداملار بونو گؤرمه‌دئلر. آنجاق اونلارين آراسينا اِله ولوله دوشدو کي، گئزلَنمک اوچون قاچديلار.

8من تک قالديم. بو بؤيوک رؤياني گؤرنده مَنده قووّت قالمادي، رنگئم برک آتدي و طاقتدن دوشدوم.

9من اونون دانيشيق سَسئني اشئتدئم. دانيشيق سَسئني اشئدنده درئن يوخويا گتدئم و اوزو اوسته دوشوب يِره اوزانديم.

10بو واخت منه بئر اَل توخوندو و منی اَللرئمله دئزلرئمئن اوستونه قويدو.

11او منه ددي: "ای چوخ سِوئلَن دانيال! سنه دِدئيئم سؤزلري درک ات و آياغا قالخ، چونکي ائندي سنئن يانينا گؤندرئلمئشم." او بو سؤزلري دئيَنده، من تئتره‌يه‌رک آياغا قالخديم.

12سونرا منه ددي: "قورخما، دانيال! اوره‌يئني فهم قازانماغا قويدوغون ائلک گوندن، تارينين حوضوروندا اؤزونو باشي‌آشاغي اتدئيئن ائلک گوندن سؤزلرئن اِشئدئلئب و من سنئن سؤزلرئنه گؤره گلمئشم.

13لاکئن فارس اؤلکه‌سئنئن ريئسي ائيئرمي بئر گون منئم ضئدّئمه داياندي. لاکئن باش ريئسلردن بئري اولان مئکاييل کؤمه‌يئمه گلدي، چونکي من اورادا فارس اؤلکه‌سئنئن ريئسلري ائله بئرلئکده قالميشديم.

14ائندي گلدئم کي، گله‌جکده خالقينين باشينا نه گله‌جيئني سنه باشا ساليم، چونکي بو رؤيا گله‌جک دؤوره عاييددير."

15او بله سؤزلر دئيَرکَن من اوزو اوسته يِره ييخيلديم و دئلئم توتولدو.

16بو واخت بشر اؤولادلارينا بَنزه‌ين بئر نفر دوداقلاريما توخوندو. او واخت آغزيمي آچيب دانيشماغا باشلاديم و قاباغيمدا دورانا ددئم: "ای آغام، بو رؤيايا گؤره عذاب ائچئنده قرق اولموشام و طاقتئم قالماييب.

17من قولون آغاملا نجه دانيشا بئله‌رم؟ چونکي مَنده هچ گوج قالماييب، جانيمدا آرتيق هچ نفس يوخدور."

18او واخت ائنسان بَنزه‌يئشئنده اولان همئن شخص گئنه منه توخونوب گوج وردی.

19او ددي: "ای چوخ سِوئلَن، قورخما، سنه آرامليق اولسون، قووّتلي اول، جسور اول!" او منئمله دانيشاندا، من قووّت تاپيب ددئم: "ای آغام، دانيش، چونکي سن منه گوج وردئن."

20او ددي: "آيا بئلئرسن کي، سنئن يانينا نئيه گلمئشم؟ ائندي من قاييديرام کي، فارس ريئسي ائله موبارئزه اِدئم. من گدئنجه يونان ريئسي گله‌جک.

21آنجاق اوّلجه من حقئقت کئتابيندا يازيلميش شيلري سنه بئلدئره‌جيم. اونلارين ضئدّئنه اولان موبارئزه‌ده منه کؤمکچي اولان هچ کس يوخدور، مگر سنئن ريئسئن مئکاييل.

← Chapter 9 Chapter 11 →