Psalms 89 — azerbaijan-2013

1ربّئن محبّتئنی همئشه اوخویاجاغام؛ آغزیملا سنئن وفادارلیغینی بوتون نسئل‌لره بئلدئره‌جیم.

2اعلان ادئرم کی، سنئن محبّتئن ابده کئمی قالیر. گؤیلرده وفادارلیغینی مؤحکم ادئرسن.

3ددئن: «سچدئیئم آداملا عهد باغلامیشام، قولوم داوودا آند ائچمئشم:

4سنئن نسلئنی ابده کئمی دوردوراجاغام، تختئنی بوتون نسئل‌لر اوچون قوراجاغام.» سِلا

5یارب، گؤیلر سنئن مؤجوزه‌لرئنی حمد ادئر، وفادارلیغینی موقدّسلر جاماعاتیندا ثنا ادئر.

6گؤیده ربّه تای اولان کئم وار؟! ائلاهی مؤوجودلار آراسیندا ربّه بنزه‌ر کئمدئر؟

7موقدّسلر مجلئسئنده چوخ هیبتلی بئر تاری‌دیر، اطرافیندا اولانلارین هامیسیندان قورخولودور.

8یارب، قوشونلارین تاریسی، سنئن کئمی قودرتلی اولان کئم وار، یارب؟! وفادارلیغین سنی اَحاطه ادئر.

9قاباران دهنزه، سن حؤکمرانلیق ادئرسن؛ شپه‌لر قالخیب داشاندا، سن اونلاری یاتیردیرسان.

10رَحَبی اَزئب بئر جسده دؤندَ‌ردئن؛ قووّتلی قولونلا دوشمنلرئنی داغیتدین.

11گؤیلر سنئندئر، یر ده سنئندئر؛ دونیا و اوندا اولانلارین هامیسی - سن اونلاری بئنا ادئبسن.

12شئمال و جنوب - اونلاری سن یارادیبسان؛ تابور و خِرمون سنئن آدینی ترنّوم ادئر.

13سنئن گوجلو قولون وار؛ اَلئن قودرتلی‌دئر، صاغ اَلئن اوجادیر.

14سنئن تختئنئن اساسی صالحلئک و عدالتدئر؛ محبّت و وفا سنئن قاباغیندا یِرئیئر.

15بختور او خالق کی، بایرامین شادلیق سسئنی بئلئر. یارب، اونلار سنئن اوزونون ائشیغیندا گزئرلر؛

16بوتون گون سنئن آدینلا سوئنئرلر، سنئن صالحلئیئنده عئزّتله‌نئرلر.

17چونکی اونلارین شؤوکتلی قووّتی سنسن؛ سنئن لوطفونله گوجوموز آرتیلیر.

18چونکی قالخانیمیز ربّئندئر، پادشاهیمیز، ائسرایئلئن موقدّسئنئن‌دئر.

19کچمئشده موتّقئلرئنه رؤیا ائچئنده دانیشیب ددئن: «بئر ائگئده کؤمک اتمئشم، خالق آراسیندان سچئلمئش اولانی عئزّتلندئرمئشم.

20قولوم داوودو تاپیب، اونو موقدّس یاغیملا مسح اتمئشم.

21اَلئم دائم اونونلا قالاجاق، قولوم دا اونو قووّتلندئره‌جک.

22دوشمن اونا قالئب گلمه‌یه‌جک، پئس آداملار اونو ذلئل اتمه‌یه‌جک.

23قاباغیندا دوشمنلرئنی قیراجاغام، اوندان نئفرت ادنلری ووراجاغام

24وفادارلیغیم و محبّتئم اونونلا قالاجاق، منئم آدیمدا اونون گوجو آرتیلاجاق.

25الئنی دهنز اوستونه، صاغ الئنی چایلار اوستونه قویاجاغام.

26منی چاغیریب دئیه‌جک: سن منئم آتامسان، منئم تاریمسان، نئجاتیمین قایاسی‌سان.

27من ده اونو ائلک اوغلوم اده‌جیم؛ یر اوزونون پادشاهلارینین لاپ اوجاسی!

28محبّتئمی اونون اوچون ابده کئمی ساخلایاجاغام، عهدئم اونونلا ثابئت قالاجاقدیر.

29اونون نسلئنی ابدی اده‌جیم، گؤیلر دوردوقجا، تختئنی ساخلایاجاغام.

30اگر اوغوللاری تعلئمئمی ترک ادئب، حؤکم اتدئیئم کئمی رفتار اتمسه‌لر،

31اگر قانونلاریمی پوزوب، امرلرئمی ساخلاماسالار،

32او زامان اونلاری عوصیانلاری اوچون دَیَنکله، فسادلاری اوچون ده بلالارلا تنبه اده‌جیم.

33آمّا محبّتئمی اوندان کسمه‌یه‌جیم، وفادارلیغیمی یالانا دؤندَرمه‌یه‌جیم.

34عهدئمی پوزمایاجاغام، آغزیمدان چیخان سؤزو دیئشدئرمه‌یه‌جیم.

35بئر دفه موقدّسلئیئم آدینا آند ائچمئشم: داوودا یالان دمه‌یه‌جیم.

36اونون نسلی ابده کئمی، تختی حوضورومدا گونش کئمی دوراجاقدیر.

37آی کئمی ابده‌جک دوراجاق؛ گؤیلرده وفالی بئر شاهئد.»

38آمّا ائندی سن ردّ ادئب، اؤزوندن آتیبسان. مسح اتدئیئن پادشاها قضبله‌نئبسن.

39قولونلا باغلادیغین عهدئنی باطئل ادئب، اونون تاجینی تورپاقدا کئرله‌دئبسن.

40بوتون دووارلارینی ییخیب، قالالارینی وئران ادئبسن.

41یولدان کچن هر کس اونو سؤیور؛ قونشولارینا خجالت سببی اولوب.

42دوشمنلرئنئن صاغ الئنی اوجالدیبسان؛ خصملرئنئن هامیسینی سِوئندئرئبسن.

43قیلینجینین آغزینی کوت ادئبسن، اونا موحارئبه‌ده آرخا اولماییبسان.

44اونون شؤوکتئنی باشا گتئرئبسن، اونون تختئنی یره چیرپیبسان.

45جاوانلیغینین گونلرئنی قیسالادیبسان، اوستونو خجالتله اؤرتوبسن. سِلا

46نه واختا کئمی، یارب؟ مگر اؤزونو ابده کئمی گئزلده‌جکسن؟ نه واختا قدر سنئن قضبئن اود کئمی آلوولاناجاق؟

47عؤمرومون نه قدر قیسا اولدوغونو بئر خاطیرلا - بوتون ائنسان اوغوللارینی نه عبث بئر شی اوچون یارادیبسان!

48یاشایانلار آراسیندا کئم وار کی، اؤلوم اوزو گؤرمه‌سئن؟! اؤلولر دئیارینین قودرتئندن کئم جانینی قورتارا بئلر؟! سِلا

49ای پروردئگار، سنئن او قدئمکی محبّتئن هارادادیر، وفادارلیغیندا داوودا آند ائچدئیئن محبّت؟

50قولونون خجالتئنی خاطیرلا، ای پروردئگار؛ خاطیرلا کی، نجه چوخلو خالقلارین تحقئرئنی باغریمدا داشی‌ییرام!

51سنئن دوشمنلرئن اونونلا تحقئر ادئرلر، یارب؛ سنئن مسح اتدئیئنئن قدملرئنی تحقئر اتدئلر.

52رب ابده کئمی موبارک اولسون. آمئن، آمئن.