Psalms 73

azerbaijan-2013

1دوغرودان دا تاری ائسرایئله یاخشی‌دیر، اوره‌یی تمئز اولانلارا!

2لاکئن منئم آیاقلاریم آز قالدی کی، یرئندن جایسین. قدئملرئم آز قالدی کی، سوروشسون.

3چونکی پئس آداملارین خوشبختلئیئنی گؤرنده، مغرور آداما پاخیلّیغیم گلدی.

4چونکی اؤلنه کئمی زحمتلری یوخدور، آنجاق هیکل کؤکَلدئبلر.

5نه آیری آداملار کئمی زحمت چکئرلر، نه ده اونلار کئمی باشلارینا بلا گلئر.

6اوندان اؤتری ده تکبّور بویونباغی‌لاری‌دیر، ظولم پالتار کئمی اونلاری اؤرتر.

7کؤکلوکدن گؤزلری اشئیه چیخیر، اورَکلرئنئن ائسته‌یئنئن آخیری یوخ.

8ائستهزا ادئرلر، ظولم اوچون یامان دیئرلر، تکبّورلو دانیشیرلار،

9آغیزلارینی گؤیلرئن ضئدّئنه توتورلار، دئللری یر اوزونده گزئر.

10اوندان اؤتری ده تارینین خالقی اونلارا دؤنور، سؤزلرئنی سو کئمی آخیریناجاق ائچئر.

11دیئرلر: «تاری هارادان بئله‌جک؟ مگر اوجالاردا اولانین معرئفتی وار؟»

12بودور پئس آداملار؛ دائم راحاتلیقدادیرلار، مال-دؤولت آرتیریرلار.

13دوغرودان دا من عبث یره قلبئمی تمئز ساخلامیشام، معصوملوقدا اللرئمی یوموشام.

14بوتون گون موصئبت چکمئشم، سحر تنبه اولموشام.

15اگر دِسَیدئم: «من ده اونلار کئمی دانیشاجاغام.» باخ، سنئن اؤولادلارینا خیانت اِدَردئم.

16بونو آنلاماق اوچون چوخ دوشوندوم، آمّا منئم اوچون چوخ چتئن ائدی.

17آخیردا تارینین موقدّس یرئنه گئردئم، او زامان اونلارین عاقئبتئنی آنلادیم.

18دوغرودان دا سوروشن یرلره قویورسان اونلاری! هلاکته آتیرسان، اونلاری!

19گؤر نجه بئر آندا هلاک اولوبلار! دهشت ائچئنده یوخ اولوب ائتئبلر.

20یوخودان اویانان آدامین یوخوسو کئمی‌دئرلر کی، سن ای پروردئگار، اویانان زامان، اونلارین صورتئنی حقئر گؤرورسن.

21بله‌جه اوره‌یئمی قم دولدورموشدو، ائچئمده پرئشان اولموشدوم.

22عاغیلسیز من، نجه آنلامیردیم! سنئن حوضوروندا بئر حیوان کئمی ائدئم.

23لاکئن من دائم سنئن یانیندایام؛ سن منئم صاغ اَلئمدن توتورسان.

24تدبئرئنله منی هئدایت اده‌جکسن، سونرا دا منی جلال ائچئنه قبول اده‌جکسن.

25سندن ساوایی گؤیده کئمئم وار؟ یر اوزونده سندن ساوایی بئر شی ائستمه‌رم.

26بدنئم تابدان دوشر، اوره‌یئم ده؛ لاکئن قلبئمئن قووّتی، منه دوشَن پای ابده کئمی تاری‌دیر.

27دوغرودان دا سندن اوزاق اولانلار هلاک اولاجاقلار؛ سنه وفالی اولمایانلارین هامیسینی محو اده‌جکسن.

28آمّا منئم اوچون تارییا یاخین گلمک یاخشی‌دیر؛ من پروردئگاریم ربّی پناهیم اِتمئشم کی، سنئن بوتون ائشلرئنی اعلان ادئم.

← Chapter 72 Chapter 74 →