Psalms 72

azerbaijan-2013

1ای تاری، عدالتئنی پادشاها ور، صالحلئیئنی شاهزاده‌یه.

2اله کی، سنئن خالقینا ائنصافلا حؤکم اتسئن، فاغیرلارینا عدالتله.

3داغلار، تپه‌لر صالحلئکده خالقا خوشبختلئک گتئرسئن،

4خالقین فاغیرلارینا عدالت گتئرسئن، مؤحتاج آداملارینا نئجات ورسئن، ظالئملری اَزسئن.

5گون و آی دوردوقجا، قوی خالق، نسئلدن-نسئله سندن قورخسون.

6قوی پادشاه بئچئلمئش چمن اوستونه یاغیش کئمی اولسون؛ شئدّتلی یاغان یاغیش کئمی اولسون کی، تورپاغی ائسلادیر.

7اونون گونلرئنده صالحلئک چئچکلَنسئن، آی ائشیغی اولدوقجا، خوشبختلئک آرتیقلیقلا اولسون.

8قوی دهنزدن دهنزه قدر، فرات چاییندان یرئن نهایتلرئنه قدر، او، سلطنت اتسئن.

9قوی چؤلده یاشایانلار اونون قاباغیندا دئز چؤکسونلر، دوشمنلری تورپاغی یالاسینلار.

10قوی تَرشئش و جزئره‌لرئن پادشاهلاری اونا باج ورسئنلر، شِبا و سِبا پادشاهلاری خراج گتئرسئنلر.

11قوی بوتون پادشاهلار اونون قاباغیندا یره دوشسونلر، بوتون مئلّتلر اونا خئدمت اتسئنلر.

12دوغرودان دا مؤحتاج آدام کؤمک اوچون باغیراندا، پادشاه اونا خئلاص وِرَر، ائمدادینا چاتانی اولمایان فاغیر آداما دا خئلاص وِرَر.

13فاغیر و مؤحتاج آداما یازیغی گلر، مؤحتاج آداملارین جانینی قورتارار،

14جانلارینی ظولم و قدّارلیقدان خئلاص ادر؛ اونلارین قانی اونون نظرئنده قئیمتلی‌دئر.

15اونا گؤره قوی پادشاه یاشاسین، شِبانین قیزیلی اونا ورئلسئن؛ اوندان اؤتری همئشه دوعا ادئلسئن، بوتون گون اونون خاطئرئنه حمد اوخونسون.

16اؤلکه‌ده بوغدا بوللوقلا اولسون، داغلار باشیندا شپه‌لَنسئن، محصولو لوبنان مشه‌لری کئمی بول اولسون، شهرده اولانلار یرئن چمنی کئمی گؤیرسئن.

17قوی اونون آدی ابده کئمی قالسین؛ گون ائشیغی دوردوقجا، اونون آدی دا قالسین. بوتون ائنسانلار اوندا برکت تاپسینلار؛ بوتون مئلّتلر اونو موبارک چاغیرسینلار.

18رب تاری، ائسرایئلئن تاریسی، موبارک اولسون. عجایئب ائشلر گؤرن آنجاق اودور!

19اونون شؤوکتلی آدی ابده کئمی موبارک اولسون! قوی بوتون یر اوزو اونون عئزّتی ائله دولسون. آمئن و آمئن.

20بورادا یَسّه اوغلو داوودون دوعالاری باشا چاتیر.

← Chapter 71 Chapter 73 →