Psalms 50

azerbaijan-2013

1قادئر اولان تاری، رب تاری دانیشیر، گون دوغاندان گون باتانا قدر دونیانی چاغیریر.

2گؤزل‌لئیئن کامئلی اولان صحیوندان، پارلاق شاخیر. تاریمیز گلئر،

3ساکئت قالمایاجاق. قاباغیندا یاخیب-تؤکن اود، اطرافیندا نَرئلده‌ین یل گدئر.

4خالقینی موحاکئمه اتمک اوچون یوخاریدان گؤیلره سَسله‌نئر، یر اوزونه ده:

5«موتّقی‌لرئمی منئم حوضورما ییغین، او آداملاری کی، قوربان واسئطه‌سی ائله منئمله عهد باغلاییبلار.»

6گؤیلر اونون صالحلئیئنی اعلان ادئر، چونکی تاری اؤزو داوردئر. سِلا

7«اشئت، منئم خالقیم، دانیشاجاغام، ای ائسرایئل، سنئن ضئدّئنه شهادت وره‌جیم: تاری منم، سنئن تارین.

8سنی تنبه اتمئرم، قوربانلاریندان اؤتری یوخ، یاندیرما قوربانلاریندان اؤتری ده یوخ کی، اونلار دائم گؤزومون قاباغیندادیر.

9سنئن اِوئندن بئر گامیشا نه احتئیاجیم وار؟! آغیل‌لارینداکی کِچئلره نه احتئیاجیم وار؟!

10چونکی مشه‌نئن بوتون حیوانلاری منئمدئر، مئنلرجه داغلارداکی سیغیرلار دا منئمدئر.

11داغلارین بوتون قوشلارینی تانی‌ییرام. چؤلون بوتون وحشی حیوانلاری دا منئمدئر.

12اگر آج اولسایدیم، سنه دِمَزدئم، چونکی دونیا و اوندا اولان هر شی منئمدئر.

13مگر من گامیش اتی ییئرم؟! مگر من کچی قانی ائچئرم؟!

14تارییا شوکور قوربانینی تقدئم ات. اوجالاردا اولانا نذئرلرئنی یرئنه یتئر.

15دارلیق گونده منی چاغیر، سنی خئلاص اده‌رم، سن منه عئزّت وِرَرسن.»

16آمّا تاری پئس آداملارا دیئر: «منئم شرئعتئمی ازبردن اوخوماغا نه حاقّین وار؟! یا دا منئم عهدئمی دئلئنه گتئرمه‌یه؟!

17سن منئم تنبهئمدن نئفرت ادئرسن، سؤزلرئمی آرخانا آتیرسان.

18بئر اوغرو گؤرونجه، اونا قوشولورسان، زئناکار آداملارلا شرئک اولورسان،

19آغزینی یامان دمه‌یه بوراخیرسان، دئلئن حئیله ائختئراع ادئر،

20اوتوروب قارداشیندان گئلیلئک ادئرسن، اؤز آنانین اوغلونو تحقئر ادئرسن.

21بو ائشلری ادئبسن، من دئنمه‌مئشم؛ گومان اتدئن کی، من ده سنئن کئمی‌یَم. لاکئن سنی تنبه اده‌جیم، گوناهلارینی گؤزونون قاباغینا دوزه‌جیم.

22سئز، تارینی اونودانلار، بونا دئقّت ادئن! یوخسا سئزی پارچالایارام، و خئلاص ادن اولماز.

23منه شوکور قوربانینی تقدئم ادن، منی عئزّتلندئرئر؛ یولونو دوز ادن آداما، من تارینین نئجاتینی گؤرسده‌جیم.»

← Chapter 49 Chapter 51 →