Proverbs 14

azerbaijan-2013

1حئکمتلی آرواد اِوئنی تئکر، آمّا سفه آرواد اونو اؤز اللری ائله ییخار.

2دوز یولدا گزن، ربدن قورخار، لاکئن یوللاریندان آزان، اونا خور باخار.

3سفهئن آغزیندا تکبّور دَیَنَکی وار، آمّا حئکمتلی آداملارین دوداقلاری اونلاری حئفظ ادر.

4اؤکوز اولمایان یرده آخور تمئز اولار، لاکئن محصولون بوللوغو اؤکوزون قووّتئندن گلئر.

5حقئقی شاهئد یالان دمز، یالانچی شاهئدئن آغزیندان چیخان هر شی یالاندیر.

6رئشخند ادن حئکمت آختارار و اونو تاپماز، لاکئن فهئم آداما معرئفت تاپماق آسان‌دیر.

7آخماق آدامین قاباغیندان چیخ گت، چونکی اوندا معرئفت دوداقلاری تاپمازسان.

8شوعورلو آدام حئکمتی ائله اؤز یولونو آنلایار، لاکئن آخماق سفه‌لئیی ائله اؤز-اؤزونو آلدادار.

9سفه‌لر گوناها رئشخند ادرلر، آمّا ائلطئفات دوز آداملار آراسیندادیر.

10اورَک اؤز دردئنی بئلر، اونون شادلیغینا یاد بئر آدام شرئک اولماز.

11شر آداملارین اِوی یره ییخیلار، لاکئن دوز آداملارین یوردو چئچک آچار.

12یول وار کی، آدامین قاباغیندا دوز گؤرونور، آمّا آخیری اؤلومدور.

13گولرکن بله، اورَک قملی اولا بئلر، شادلیق بئتئنجه قوصّه گئنه گؤرونه بئلر.

14اوره‌یئنده آزان اؤز یوللاری ائله دویار، لاکئن یاخشی آدام عمل‌لرئنئن عوضئنی آلار.

15جاهئل آدام هر سؤزه ائنانار، آمّا شوعورلو آدام قدملرئنه دئقّت ادر.

16حئکمتلی آدام قورخار و پئسلئکدن دؤنر، آخماق آدام احتئیاطسیز اولار و اؤزونه بل باغلار.

17حؤوصله‌‌سئز سفه-سفه ائش گؤرَر، حئیله‌گر آدامدان هامی نئفرت ادر.

18جاهئل آداملارین مئراثی سفهلئکدئر، آمّا شوعورلو آدامین باشینا معرئفت تاجی قویولار.

19پئس آداملار یاخشی آداملارین قاباغیندا، شر آداملار صالح آدامین قاپیسیندا تعظئم ادرلر.

20یوخسول آدامدان قونشوسو دا نئفرت ادر، لاکئن وارلی آدامی سِوَن چوخدور.

21قونشوسونو تحقئر ادن، گوناه ادئر، خوش او آدامین حالینا کی، مظلوملارا سخاوت گؤرسه‌دئر.

22مگر شر قوران آداملار آزمیرلار؟ لاکئن صالحلئک و وفا یاخشیلیق دوشونَنلرئندئر.

23هر زحمتده بئر فایدا وار، آمّا بوش سؤزلر ائنسانی احتئیاجا سالار.

24حئکمتلی آداملارین تاجی اونلارین ثروتی‌دئر، لاکئن آخماقلارین سفه‌لئیی آنجاق سفه‌لئکدئر.

25حقئقی شاهئد جانلاری قورتارار، آمّا یالانلار دئین حئیله ائشله‌در.

26ربدن قورخان تام آرخاییندیر، اؤولادلارینین بئر پناهی اولاجاق.

27ربدن قورخماق حیات بولاغی‌دیر، آدامی اؤلوم تله‌لرئندن دؤندَ‌رَر.

28پادشاهین شؤوکتی خالقین چوخلوغوندادیر، لاکئن مئلّتئن اولماماسینا گؤره، حؤکمدار یره ییخیلار.

29گج قضبله‌نَن آدامین بؤیوک فراستی وار، آمّا حؤوصله‌سئز آدام سفه‌لئک قالدیرار.

30راحات اورَک بدنئن حیاتی‌دیر، لاکئن حسد سوموکلری چورودَر.

31کاسیبا ظولم ادن آدام، اونو یارادانی حقئر گؤرَر، آمّا اونا حؤرمت ادن، مؤحتاج آداما سخاوت گؤرسه‌در.

32شر آدام اؤز پئسلئیی اوزوندن قووولار، صالح آدامین اؤلومونده بله، پناهی وار.

33حئکمت فهئم اورَکده اؤزونه راحات یووا قورار، آمّا آخماق آداملارین قلبئنده اولانلار آشکارا چیخار.

34بئر مئلّتی صالحلئک اوجالدار، لاکئن گوناه هر خالق اوچون بی‌آبیرچیلیق‌دیر.

35پادشاه عاغیلّی قولدان خوشلانار، لاکئن قضبی خجالت گتئرنه دوشر.

← Chapter 13 Chapter 15 →