Leviticus 13 — azerbaijan-2013

1رب موسایا و هارونا دانیشیب، ددی:

2«بئر آدامین بدنئنئن دَرئسئنده شئش، و یا سَپکی، و یا لَکه عمله گلئب، دَرئده جوزام کئمی گؤرونن بئر چئرک اتمه اولسا، قوی او آدام کاهئن هارونون، و یا اونون اوغوللاریندان اولان کاهئنلرئن بئرئنئن یانینا گتئرئلسئن.

3کاهئن دَرئده‌کی علامته باخسین. اگر علامت ائچئنده‌کی توکلر، آغارمیش و بدنئنئن دَرئسئندن داها درئن گؤرونسه، بو چئرک اتمه جوزامدیر. کاهئن اونا باخاندان سونرا، او آدامی نجئس اعلان اتسئن.

4آمّا اگر دَرئسئنده‌کی لَکه آغارمیش، دَرئدن درئن گؤرونمه‌سه، اوستونده‌کی توکلری ده آغارمیش اولماسا، کاهئن ناخوشو یدّی گون مودّتئنه قرنطئنه‌ده ساخلاسین.

5یدّئنجی گون کاهئن گئنه ده اونا باخسین. علامت نظرئنده دَرئسئنه یاییلمیش یوخ، یرئنده قالیبسا، کاهئن اونو گئنه ده یدّی گون مودّتئنه قرنطئنه‌ده ساخلاسین.

6یدّئنجی گون کاهئن گئنه ده اونا باخسین. علامت سولوب دَرئسئنه یاییلماییبسا، کاهئن او آدامی تمئز اعلان اتسئن. بو مرض آنجاق دَری سَپمه‌سی‌دئر. او آدام پالتارلارینی یوسون و تمئز ساییلسین.

7لاکئن کاهئن اونا باخیب تمئز سایدیقدان سونرا، اگر سَپمه دَرئسئنه یاییلسا، او گئنه ده اؤزونو کاهئنه گؤرسدسن.

8کاهئن گئنه ده اونا باخسین، دَرئسئنده‌کی سَپمه یاییلیبسا، اوندا کاهئن او آدامی نجئس اعلان اتسئن. بو جوزامدیر.

9بئر آدامین دَرئسئنده جوزام چئرک اتمه‌سی عمله گلسه، اوندا او آدام کاهئنئن یانینا گتئرئلسئن.

10کاهئن اونا باخسین، اگر دَرئده توکلری آغاردان خورالی آغ بئر شئش وار، و شئشده قیرمیزی اَت گؤرونور،

11بو، آدامین دَرئسئنده‌کی کؤک سالمیش جوزامدیر. کاهئن او آدامی نجئس اعلان اتسئن، آمّا قرنطئنه‌ده ساخلاماسین، چونکی او نجئسدئر.

12اگر جوزام دَرئیه یاییلیب بوتون درئنی بوروسه و علامتئن اونو تپه‌دن دیرناغاجاق توتماسی کاهئنه گؤرونسه،

13قوی کاهئن باخسین. اگر جوزام، بوتون بدنی اؤرتوب، کاهئن ناخوشو تمئز اعلان اتسئن. هامیسی آغاردیغی اوچون او آدام تمئز ساییلسین.

14لاکئن او آدامدا دئری اَت گؤرونسه، او، نجئس ساییلسین.

15کاهئن دئری اَته باخیب، اونو نجئس اعلان اتسئن. دئری اَت نجئسدئر؛ او، جوزامدیر.

16اگر دئری اَت تَکرار دؤنوب آغارسا، آدام کاهئنئن یانینا گتسئن

17و کاهئن اونا باخسین؛ اگر چئرک اتمه آغا دؤنموش اولسا، او آدامی تمئز اعلان اتسئن، چونکی او، تمئزدئر.

18بئر آدامین دَرئسئنده چئبان عمله گلئب صاغالاندان سونرا،

19اگر یِرئنده آغ شئش، و یا قیرمیزیمتیل-آغ لَکه عمله گلسه، بو علامت کاهئنه گؤرسدئلسئن.

20کاهئن لکه‌یه باخسین. اگر دَرئدن درئن گؤرونسه و اوستونده‌کی توکلر آغارمیش اولسا، کاهئن او آدامی نجئس اعلان اتسئن. بو چئبانلا باشلانان جوزامدیر.

21آمّا اگر کاهئن باخیب لکه‌نئن اوستونده آغ توکلر گؤرمه‌سه، لکه دَرئدن ده درئن اولمایاراق سولغون حالدا اولسا، کاهئن ناخوشو یدّی گون مودّتئنه قرنطئنه‌ده ساخلاسین.

22اگر دَرئده‌کی لکه یاییلیرسا، کاهئن آدامی نجئس اعلان اتسئن. چونکی بو، علامتدئر.

23آمّا اگر لکه یرئنده قالیب یاییلماییبسا، بو، چئباندان قالان چاپیقدیر و کاهئن او آدامی تمئز اعلان اتسئن.

24بئر آدامین دَرئسئنده‌کی اولان یانیغین دئری اَتی یرئنده قیرمیزیمتیل-آغ، و یا آغ پارلاق لکه عمله گلسه،

25کاهئن لکه‌یه باخسین، اگر لکه‌نئن اوستونده‌کی توکلر آغارمیش و دَرئدن درئن گؤرونسه، بو، یانیقدا باشلانان جوزامدیر. بونا گؤره کاهئن او آدامی نجئس اعلان اتسئن. بو جوزام علامتدئر.

26لاکئن اگر کاهئن باخیب گؤرسه کی، لکه‌نئن اوستونده آغ توکلر یوخدور و لکه دَرئدن درئن اولمایاراق سولغون حالدادیر، اوندا کاهئن ناخوشو یدّی گون قرنطئنه‌ده ساخلاسین.

27یدّئنجی گون کاهئن گئنه ناخوشا باخسین. اگر لکه دَرئیه یاییلیبسا، کاهئن او آدامی نجئس اعلان اتسئن؛ بو جوزام علامتدئر.

28آمّا اگر لَکه یِرئنده قالیب دَرئسئنه یاییلماییب، و سولوبسا، بو یانیقدان قالان شئشدئر؛ کاهئن او آدامی تمئز اعلان اتسئن، چونکی بو، یانیق یاراسینین قابیغی‌دیر.

29اگر بئر کئشئنئن و یا آروادین باشیندا، یا دا چَنه‌سئنده چئرک اتمه وارسا،

30کاهئن اونا باخسین. اگر چئرک اتمه دَرئدن درئن گؤرونسه و اوستونده‌کی توکلر ساری و نازئکدئرسه، کاهئن اونو نجئس اعلان اتسئن. بو باش و یا چَنه جوزامی‌دیر، قوتوردور.

31کاهئن قوتور علامتئنه باخسین. اگر علامت دَرئدن درئن گؤرونمه‌یئب، اوستونده ده قارا توکلر یوخدور، کاهئن قوتور آدامی یدّی گون قرنطئنه‌ده ساخلاسین.

32یدّئنجی گونده گئنه علامته باخسین، اگر قوتورلوق یاییلماییبسا، اوستونده‌کی توکلر سارالماییبسا، قوتورلوق دا دَرئدن درئن گؤرونمورسه،

33اوندا او آدام، قوتورلوق اولان یردن ساوایی، بوتون بدنئنی قیرخسین. سونرا کاهئن اونو گئنه ده یدّی گون قرنطئنه‌ده ساخلاسین.

34یدّئنجی گون کاهئن گئنه ده قوتورا باخسین. اگر قوتور دَرئیه یاییلماییبسا و دَرئدن درئن ده گؤرونمه‌سه، کاهئن او آدامی تمئز اعلان اتسئن. او آدام پالتارلارینی یوسون و تمئز ساییلسین.

35لاکئن اگر کاهئن ناخوشو تمئز سایدیقدان سونرا، قوتورلوق دَرئیه یاییلیرسا،

36کاهئن اونا تکرار باخسین. اگر قوتورلوق دَرئسئنه یاییلیبسا، کاهئن اوستونده‌کی ساری توکون اولوب-اولماماسینا باخماسین. او آدام نجئس ساییلسین.

37لاکئن اگر نظرئنده قوتورلوق یرئنده قالیب و اوستونده قارا توک عمله گلئب، قوتور شفا تاپیب و او آدام تمئزدئر. کاهئن اونو تمئز اعلان اتسئن.

38بئر کئشئنئن یا دا آروادین دَرئسئنده آغ پارلاق لکه‌لر اولسا،

39اوندا کاهئن باخسین؛ اگر دَرئسئنده سولغون آغ لَکه‌لر وار، بو باشلانان دَمروودور. او آدام تمئز ساییلسین.

40اگر بئر آدامین باشیندا اولان ساچ تؤکولسه، آدام کِچَلدئر. او تمئز ساییلسین.

41اگر ساچی آلنیندان و باشینین طرفلرئندن تؤکولوبسه، او آدامین آلنی آچیلمیشدیر. او، تمئز ساییلسین.

42لاکئن کِچَل و یا آلنی آچیلمیش آدامین ساچی تؤکولَن یردن، قیرمیزیمتیل-آغ لکه چیخسا، بو، او جوزامدیر کی، کِچَل و یا آلنی آچیلمیش آدامین ساچی تؤکولَن یرده باشلانیر.

43کاهئن اونا باخسین، اگر کِچَل و یا آلنی آچیلمیش آدامداکی شئش، قیرمیزیمتیل-آغدیرسا و جوزام کئمی گؤرونور،

44او کئشی جوزام ناخوشلوغونا توتولوب. و نجئسدئر. باشینداکی علامته گؤره کاهئن حَتمن اونو نجئس اعلان اتسئن.

45بله جوزام ناخوشلوغا توتولان آدامین پالتارلاری جیریلمالی، ساچی دا داغینیق اولمالی‌دیر. او آدام بوغونو اؤرتوب چیغیرسین: ”نجئسَم! نجئسَم!“

46دَرئسئنده علامت اولدوغو بوتون مودّت، او نجئس ساییلسین. نجئسلئیئنه گؤره دوشَرگه‌‌نئن اشئیئنده تک یاشاسین.

47اوستونده کوف علامتی اولان هر جور پارچا: یون، یا دا کتان پالتار و یا،

48هر جور توخونما پارچا، و یا دَری و دَرئدن اولان هر شیئن حاقّیندا تعلئمات بودور.

49اگر پالتاردا، و یا دَرئده، یا دا هر جور پارچادا، دَرئدن دوزَ‌لمئش هر بئر اشیادا عمله گلن علامت یاشیل‌تَهر و یا قیرمیزیمتیل اولسا، بو، کوف علامتی‌دئر. قوی بو کاهئنه گؤرسدئلسئن.

50کاهئن اونا باخیب، اشیانی یدّی گون قرنطئنه‌ده ساخلاسین.

51یدّئنجی گون گئنه ده اونا باخسین. اگر علامت پالتارا، پارچایا، دَرئیه، و یا دَرئدن دوزَ‌لمئش شیلره یاییلیب، بو علامت فاسئد کوفدور. نجئس ساییلسین.

52کاهئن اوستونده علامت اولان یون، یا دا کتان پالتاری، و یا پارچانی، یا دا دَرئدن اولان اشیانی یاندیرسین. بو فاسئد کوفدور. او گرک یاندیریلسین.

53آمّا اگر کاهئن باخیب گؤرسه کی، علامت پالتارا، پارچایا، و یا دَرئدن اولان اشیایا یاییلماییب،

54اوندا کاهئن امر ورسئن کی، اوستونده علامت اولان شی یویولسون. سونرا اونو گئنه ده یدّی گون قرنطئنه‌ده ساخلاسین.

55علامت یویولدوقدان سونرا، کاهئن گئنه ده باخسین. اگر علامتئن گؤرونوشو، یاییلماسینا باخمایاراق، دَیئشمه‌یئب، او شی نجئسدئر. اونو یاندیرمالی‌سینیز، ائستر علامت اوز طرفئنده اولسون، ائستر آرخا طرفئنده.

56لاکئن اگر کاهئن باخیب گؤرسه کی، علامتئن رنگی، یویولدوقدان سونرا، سولوب. کاهئن گرک اونو پالتاردان، دَرئدن، و یا پارچادان قوپارتسین.

57اگر بوندان سونرا علامت پالتاردا، پارچادا، و یا دَری اشیادا تزه‌دن عمله گلسه، علامت آرتیق یایییلیب و او شی گرک اوددا یاندیریلسین.

58یویولدوقدان سونرا علامت اوستوندن یوخ اولان پالتار، پارچا، و یا دَری اشیا گئنه ده یویولوب تمئز ساییلسین.

59بو، او قانوندور کی، اونونلا یون و یا کتان پالتاردا، هر توخونما پارچادا، و دَرئدن اولان هر شیده عمله گلن کوف علامتئنه اَساسن اونو تمئز و یا نجئس سایا بئلرسئنئز.»