Job 7

azerbaijan-2013

1ائنسانین یر اوزونده‌کی حیاتی مگر زحمت چکمک اوچون دیئل؟ مگر گونلری ده فَحله‌‌نئن گونلری کئمی دیئل؟

2کؤلگه‌یه حسرت چکن قول کئمی، اوجرتئنه اومئد باغلایان فَحله‌لر کئمی،

3منه مئراث بوش آیلار ورئلدی، پاییما مشقّت گجه‌لر دوشدو.

4یاتان زامان دوشونورَم: نه زامان قالخاجاغام؟ لاکئن گجه اوزوندور، و سحره قدر ائکی یانیما وورنوخورام.

5بدنئمه قورد دوشوب، قابیقلانیر دَرئم چاتلاییر، چئرک آخیدیر.

6گونلرئم جولّانین مَکئیئندن داها سورعتلی گدئر، اومئدسئز آخیرینا چاتیر.

7خاطیرلا کی، حیاتیم بئر نفسدیر؛ گؤزلرئم بئر داها یاخشیلیق گؤرمه‌یه‌جک.

8منه باخانین گؤزو، منی داها گؤرمه‌یه‌جک؛ گؤزلرئن اوستومده اولاجاق، آمّا من اولمایاجاغام.

9بولود داغیلیب گتدئیی کئمی، اؤلولر دئیارینا اِنَن بئر داها چیخماز؛

10بئر داها اِوئنه دؤنمَز، یری ده آرتیق اونو تانیماز.

11بونا گؤره آغزیمین قاباغینی آلمایاجاغام؛ روحومون دارلیغینی دئله گتئره‌جیم؛ جانیمین آجیلیغیندان شئکایت اده‌جیم.

12مگر من دهنزَم، مگر اَژداهایام کی، اوستومه گودوکچو قویورسان؟

13اگر دئیَم: ”یاتاغیم منی راحاتلار، دؤشه‌یئم شئکوه‌می آزالدار“

14او زامان منی یوخولارلا قورخودورسان، و رؤیالارلا جانیما ولوله سالیرسان.

15اله کی، بوغولوب اؤلمه‌یه آرتیق راضی اولسون، و اؤلومو بو دردلردن داها سِوسئن.

16حیاتیمدان بِزمئشَم؛ اوزون عؤمور ائسته‌مئرم. مندن اَل چک؛ چونکی گونلرئم بئر نفس کئمی‌دئر.

17ائنسان نه‌دئر کی، اونو بو قدر بؤیودورسن، قیدئنه قالیرسان،

18اونا هر سحر باش چکئرسن، هر آن اونو ائمتاحان ادئرسن؟

19داها نه زاماناجاق گؤزونو اوستومدن گؤتورمیه‌جکسن، تَک بوراخمایاجاقسان کی، آغزیمین سویونو بئر اودوم؟

20مگر گوناه اتمئشم؟ سنه نه اتمئشم، ای ائنسانا گودوکچو اولان؟ نه اوچون منی اؤزونه هدف ادئبسن؟ اله کی، سنئن اؤزونه بئر یوک اولموشام؟

21نه اوچون عوصیانیمی باغیشلامیرسان و خاطامی دا اوستومدن گؤتورمورسن؟ بئر آزدان تورپاق آلتیندا یاتاجاغام، منی آختاراجاقسان، و من اولمایاجاغام.»

← Chapter 6 Chapter 8 →