Job 29

azerbaijan-2013

1اَیّوب گئنه اؤز موباحئثه‌سئنه داوام ورئب ددی:

2«کاشکی قدئم آیلارداکی کئمی اولسایدیم، تارینین منی حئفظ اتدئیی گونلرده‌کی کئمی؛

3چیراغینین باشیم اوسته ائشیق ساچدیغی، نورو ائله قارانلیقدا گَزدئیئم گونلر.

4کاشکی حیاتیمین چئچکلی گونلری گری دؤنسَیدی؛ او زامان کی، تارینین دوستلوغو چادیریمین اوستونده ائدی،

5او زامان کی، قادئری-موطلق حله منئمله ائدی، و اؤولادلاریم اطرافیمدا دولانیردیلار.

6او زامان کی، قدملرئم آیرانلا یویولوردو، قایا منئم اوچون یاغ بولاقلاری آخیردیردی.

7من قاپیدان شهره چیخاندا، میداندا کورسومو حاضیرلایاندا،

8جاوانلار منی گؤروب گئزله‌نَردئلر، یاشلی‌لار آیاغا قالخیب دوراردیلار.

9ریئسلر صؤحبتدن دایاناردیلار، اَللرئنی آغیزلارینا قویاردیلار.

10امئرلرئن سَسی کَسئلردی، دئللری داماقلارینا یاپیشاردی.

11قولاق منی اشئدن واخت، منی بختور چاغیراردی. گؤرَن گؤز ده منی تعرئفله‌یَردی.

12چونکی کؤمَیه باغیران فاغیری، کؤمه‌یی اولمایان یِتئمی قورتاراردیم.

13اؤلوم آغزیندا اولانین خیئر-دوعاسی اوستومه گلردی، دول آروادین اوره‌یئنی شادلیقدان اوخوماغا قالدیراردیم.

14صالحلئیی گِیئنَردئم و منه یاراشاردی، عدالتئم منه جوبّه و تاج کئمی ائدی.

15کورلارا گؤز ائدئم، توپاللارا آیاق ائدئم.

16مؤحتاجلارین آتاسی ائدئم، قرئبلرئن موشکول‌لرئنئن قیدئنه قالاردیم.

17ائنصافسیز آدامین چَنه‌سئنی سیندیراردیم، شئکاری اونون دئشلرئندن آلاردیم.

18دوشونَردئم: یووامدا اؤله‌جیم، گونلرئمی قوم قدر چوخالداجاغام.

19کؤکوم سولار طرفئنه یاییلاجاق، بوداقلاریما شِح دوشه‌جک.

20عئزّتئم یانیمدا تزه قالاجاق، و کامانیم اَلئمده تزه‌لَنه‌جک.

21منه قولاق آسیب گؤزله‌یَردئلر؛ مشورتئم اوچون ساکئت قالاردیلار.

22هچ کئم سؤزومون اوستوندن سؤز دِمَزدی، سؤزلرئم اوستلرئنه تؤکولردی.

23منی یاغیش کئمی گؤزله‌یردئلر، یاز یاغیشی کئمی سؤزلرئمی ائچَردئلر.

24اوزلرئنه گولومسه‌یَنده، گؤزلرئنه ائنانمازدیلار، و گولر اوزوم اونلارا جسارت وِرَردی.

25اونلارین یولونو من سِچَردئم، ریئس کئمی اَیلَشَردئم، عسگرلرئن آراسیندا پادشاه کئمی اوتوراردیم، یاسلی‌لارا تسلّی ورنه بَنزه‌یَردئم.

← Chapter 28 Chapter 30 →