Job 27

azerbaijan-2013

1اَیّوب گئنه موباحئثه‌سئنه داوام ورئب ددی:

2«حاقّیمی اَلئمدن آلان او دئری تارییا، جانیمی آجی ادن قادئری موطلقه آند اولسون،

3نه قدر ائچئمده حیات وار بورنومدا دا تارینین نفسی،

4دوداقلاریم ناحاق سؤز دِمَیه‌جک، دئلئم ده هچ حئیله دانیشمایاجاق.

5حاشا کی، سئزئن دوغرو اولدوغونوزو تصدئق ادئم؛ آخیر نفسئمه قدر کامئل‌لئیئمدن اَل چکمه‌یه‌جیم.

6صالحلئیئمدن بَرک یاپیشمیشام، بوراخمایاجاغام دا. اوره‌یئم هچ بئر گونوم اوچون منی مذمّت اتمئر.

7قوی دوشمنئم پئس آداملارین گونونه دوشسون، حاقسیز آداملارا نجه‌دئر، منه ضئدّ اولانا دا اِله اولسون.

8چونکی تاری، اونو تانیمایان آدامی کَسئب آتاندا، جانینی آلاندا، اونون اومئدی نه‌دئر؟

9دارلیغا دوشَنده، مگر تاری فریادینی اشئده‌جک؟

10مگر قادئری موطلقده کِف اده‌جک؟ تارینی هر زامان چاغیراجاق؟

11تارینین قودرتی حاقّیندا سئزه تعلئم وره‌جیم؛ قادئری موطلقده اولانی گئزلَتمیه‌جیم.

12باخین، سئزئن هامینیز اونو گؤروبسونوز؛ بس نئیه بوش سؤزلرله اؤزونوزو هچ ادئرسئنئز؟

13شر آدامین تاریدان آلدیغی پای، ظالئم آداما قادئری موطلقدن یِتئشدئیی مئراث بودور:

14گرچی اؤولادلاری چوخالیر، لاکئن اونلارین قدری قیلینج آغزی‌دیر؛ نسئللری ده دویونجا چؤرک تاپان اولمایاجاق.

15اونون نسلئندن قالانی اؤلوم باسدیراجاق، دول آروادلاری دا آغلایا بئلمیه‌جکلر.

16قوم قدر گوموش ییغسا دا، تورپاق ذرّه‌لری قدر پالتار ییغسا دا،

17اونون ییغدیغینی صالح آدام گئیَر، گوموشو ده گوناهسیزلار بؤلر.

18اِوئنی گووه کئمی، قوروقچونون قوردوغو کوما کئمی بئنا اِدَر.

19وارلی یاتار، آمّا بونو بئر داها اده بئلمز؛ گؤزلرئنی آچار، و واریندان آرتیق اثر یوخ.

20دهشتلر اونو سل کئمی بورویَر، طوفان دا گجه اونو قاپیب آپارار.

21شرق یِلی اونو قالدیریب سووورار، و او گتمئش اولار، چونکی اونو یرئندن سوپوروب آپارار.

22اونو توللایار و رحم اتمز، یقئن کی، اونون اَلئندن قاچماغا جهد اِدَر.

23اونا اَل چالار، یرئندن اونا فیشیلدایار.

← Chapter 26 Chapter 28 →