Jeremiah 47

azerbaijan-2013

1فئرعون غَزّه‌یه هوجوم اتمه‌مئشدن قاباق، اِرِمیا پیغمبره فئلئسطلی‌لر باره‌ده ربّئن بو سؤزو نازئل اولدو:

2رب بله دیئر: «گؤر شئمالدان سولار نجه قالخیر؛ اونلار سل کئمی داشاجاقلار، اؤلکه‌نئن و اوراداکی هر شیئن، شهرئن و اورادا یاشایانلارین اوستونه آخاجاقلار. خالق فریاد اده‌جک، او اؤلکه‌ده یاشایانلارین هامیسی شئون اده‌جک.

3توسَنلرئن یری دؤیَن دیرناقلارینین سَسئندن، دؤیوش عارابالارینین ولوله‌سئندن، تَکَرلرئنئن گورولتوسوندن، آتالار اؤولادلارینا کؤمک اتمک اوچون دؤنمه‌یه‌جکلر؛ اَل‌لری طاقتدن دوشه‌جک.

4چونکی بوتون فئلئسطلی‌لرئن محو ادئله‌جیی گون گلئب. صور و صئدوندان کؤمک اده بئلن، صاغ قالان هر کس یوخ ادئله‌جک. رب کَفتور ساحئلئندن گلن فئلئسطلی‌لرئن صاغ قالانلارینی هلاک اده‌جک.

5غَزّه یاس توتوب ساچینی یولاجاق؛ اَشقِلون سَسئنی کَسه‌جک. ای دره‌ده صاغ قالانلار، نه واختا قدر بدنلرئنئزی یارالایاجاقسینیز؟

6باغیریرسینیز: آه، ای ربّئن قیلینجی، نه واخت آرام توتاجاقسان؟ قینینا دؤن، دایان و آرام اول!

7رب امر اتدئیی حالدا، رب اونو اَشقِلون و دهنز ساحئلئنئنئن ضئدّئنه قویدوغو حالدا، قیلینج نجه آرام توتا بئلر؟»

← Chapter 46 Chapter 48 →