Jeremiah 35

azerbaijan-2013

1یهودا پادشاهی یوشئیا اوغلو یِهویاقئمئن دؤورونده ربدن اِرِمیایا بو سؤز نازئل اولدو:

2«رِکابلی‌لارین اِوئنه گت و اونلاری ربّئن معبدئنئن اوتاقلاریندان بئرئنه دعوت ات و اونلارا ائچمک اوچون شراب ور.»

3بونون اوچون خَبَصّئنیا اوغلو اِرِمیا اوغلو یَعه‌زِنیانین، اونون قارداشلارینین، بوتون اؤولادلارینین یعنی رِکاب عایئله‌سئنئن هامیسینین یانینا گتدئم کی، اونلاری دعوت اِدئم.

4اونلاری ربّئن معبدئنه، تاری آدامی یئگدَلیا اوغلو خانانین اوغوللارینین اوتاغینا آپاردیم. بو اوتاق شَلّوم اوغلو قاپی گؤزَتچئسی مَعَسِیانین اوتاغی اوستونده، هم ده باشچیلار اوتاغینین یانیندا ائدی.

5من رِکاب عایئله‌سئنئن آداملاری قاباغینا شراب دولو جاملار و کاسالار قویوب «بویورون، شراب ائچئن» ددئم.

6لاکئن اونلار ددئلر: «بئز شراب ائچمئرئک. چونکی آتامیز رِکاب اوغلو یوناداب بئزه بله امر اتدی: ”سئز و نسلئنئز گرک هچ واخت شراب ائچمیه‌‌‌سئنئز!

7اؤزونوز اوچون اِو تئکمیه‌‌سئنئز، توخوم اَکمیه‌سئنئز، اوزوم باغی سالمایاسینیز. بو شیلره گرک هچ واخت مالئک اولمایاسینیز، عؤمرونوز بویو گرک چادیرلاردا یاشایاسینیز. بله اده‌سئنئز، کؤچ اتدئیئنئز تورپاقلاردا اوزون مودّت یاشایارسینیز.“

8آتامیز رِکاب اوغلو یونادابین بئزه امر اتدئیی هر شیه قولاق آسمیشیق. بئز، آروادلاریمیز، و اوغوللاریمیز-قیزلاریمیز هچ بئر زامان شراب ائچمه‌‌مئشئک.

9یاشاماق اوچون اِولر ده تئکمه‌مئشئک، اوزوم باغلارینا، زَمئلره و اَکئنلره ده مالئک اولمامیشیق.

10چادیرلاردا یاشامیشیق. آتامیز یوناداب نه امر ادئب، هامیسینا قولاق آسیب عمل اتمئشئک.

11آمّا بابئل پادشاهی نِبوکَدنِصّر بو اؤلکه‌یه هوجوم ادن زامان ددئک: ”گلئن، کَلده و اَرام قوشونلاریندان قاچماق اوچون اورشلئمه گِدَک.“ بونا گؤره ده اورشلئمده قالمیشیق.»

12بوندان سونرا اِرِمیایا ربّئن بو سؤزو نازئل اولدو:

13«ائسرایئلئن تاریسی اولان قوشونلار ربّی بله دیئر: گت، یهودا آداملارینا و اورشلئمده یاشایانلارا بونلاری دِه: ”سئز هچ بئر درس آلمایاجاقسینیز، سؤزلرئمه قولاق آسمایاجاقسینیز؟“ رب بویورور.

14”رِکاب اوغلو یوناداب اؤز نسلئنه شراب ائچمه‌مه‌لرئنی امر اتدی، نسلی ده اونون امرئنه عمل ادئب و بو گونه قدر ده شراب ائچمه‌یئب. چونکی آتالارینین امرئنه قولاق آسیبلار. آمّا من سئزئنله دفه‌لرله دانیشمیشام، آمّا سئز منه قولاق آسماییبسینیز.

15اؤز قوللاریم اولان بوتون پیغمبرلری دفه‌لرله سئزئن یانینیزا گؤندَ‌ردئم. اونلار سئزه ددئلر: هر بئرئنئز گرک اؤز پئس یولونوزدان دؤنه‌سئنئز، عمل‌لرئنئزی گرک ائصلاح اده‌سئنئز؛ باشقا آللاهلارین دالینجا گدئب اونلارا قوللوق اتمه‌یئن. او واخت سئزه و آتالارینیزا وردئیئم بو اؤلکه‌ده یاشایارسینیز. آمّا سؤزومه اهمئیّت ورمه‌یئب اونا قولاق آسمادینیز.

16رِکاب اوغلو یونادابین اؤولادلاری آتالارینین امر اتدئیئنه عمل ادئبلر، آمّا بو خالق منه قولاق آسماییب.“

17بونا گؤره ده ائسرایئلئن تاریسی اولان قوشونلار تاریسی رب بله دیئر: ”من، دِدئیئم بوتون فلاکتلری، یهودا خالقینین و اورشلئمده یاشایان هر کسئن باشینا گتئره‌جیم. اونلارلا دانیشدیم، آمّا اونلار قولاق آسمادیلار؛ اونلاری چاغیردیم، آمّا اونلار جاواب ورمه‌دئلر.“»

18او واخت اِرِمیا رِکاب نسلئنه ددی: «ائسرایئلئن تاریسی اولان قوشونلار ربّی بله دیئر: ”سئز آتانیز یونادابین امرئنه قولاق آسیبسینیز، اونون بوتون امرلرئنه عمل ادئبسئنئز، سئزه امر اتدئیی هر شیی یرئنه یتئرئبسئنئز.“

19بونا گؤره ده ائسرایئلئن تاریسی اولان قوشونلار ربّی بله دیئر: ”رِکاب اوغلو یونادابین نسلئندن منه خئدمت ادن بئر آدام هچ واخت اَسکئک اولمایاجاق.“»

← Chapter 34 Chapter 36 →