Isaiah 66

azerbaijan-2013

1رب بله دیئر: «گؤیلر منئم تختئمدئر، یِر آیاقلاریمین آلتینداکی کَتئلدئر. هارادادیر بس او اِو کی، سئز منه تئکه‌بئله‌سئنئز؟ هارادیر او یِر کی، دئنجَلئم؟

2چونکی بوتون بونلاری منئم اَلئم یاراتدی، هر شی بله‌جه وار اولدو.» رب بویورور. «لاکئن من باشی‌آشاغی و روحو اَزئلمئش آداما، سؤزومون قاباغیندا تئتره‌ینه نظر سالارام.

3آنجاق اؤکوز کَسن، آدام اؤلدورَن کئمئدئر، قوزونو قوربان کَسَن، ائتئن بوینونو قیران کئمی‌دئر، تاخیل تقدئمی گتئرن، دونگوز قانینی تقدئم ادن کئمی‌دئر، کوندور یاندیران، بوته پرستئش ادن کئمی‌دئر. بلی، اونلار اؤز یوللارینی سِچئبلر، و جانلاری اؤز ائیرنج ائشلرئندن حظّ آلیر.

4من ده اونلاری تَنبه اتمیه قرار وره‌جیم، قورخدوقلاری بلانی باشلارینا گتئره‌جیم. چونکی من چاغیردیم، لاکئن جاواب ورن یوخ ائدی، دانیشدیم، لاکئن قولاق آسمادیلار، گؤزومده پئس اولانی اتدئلر، منه مقبول اولمایانی سِچدئلر.»

5ای ربّئن سؤزو قاباغیندا تئتره‌یَنلر، اونون ددئکلرئنی اِشئدئن: «سئزدن نئفرت ادن قارداشلارینیز، منئم آدیما گؤره سئزی اؤزلرئندن آتانلار دیئبلر: ”قوی رَب، شؤوکتئنی گؤرسدسئن کی، بئز ده سئزئن شادلیغینیزا بئر باخاق.“ لاکئن اونلار روسوای اولاجاقلار.

6شهردن بئر نعره سَسی، معبددن بئر سَس اِشئدئلئر! بو، دوشمنلرئندن قئصاص آلان ربّئن سَسی‌دئر.

7آرواد آغری چکمه‌دن دوغدو، سانجیسی توتمادان بئر اوغلان اوشاغی دوغدو.

8بله بئر شی کئم اشئدئب؟ بله شیلری کئم گؤروب؟ مگر بئر گونده اؤلکه عمله گلر؟ مگر بئر آندا بئر مئلّت دوغولار؟ آمّا صحیونون آغریسی توتدوقدا اوغوللارینی دوغدو.

9مگر من دوغوش آنیناجاق گتئرئب دوغماغا گوج ورمه‌رم؟» رب دیئر. «دوغوش اوچون گوج ورن من، مگر بَطنی باغلایارام؟» سنئن تارین دیئر.

10«اورشلئمله بئرلئکده سِوئنئن، ای اونو سِوَنلر، هامینیز اونون اوچون شادلیق ادئن. ای اورشلئم اوچون یاس توتانلار، اونونلا بئرلئکده جوشون، فَرَحله‌نئن!

11اِله کی، سئز آنانیز اورشلئمئن دؤشلرئنی اَمئب، تسلّی تاپاسینیز، دویاسینیز، اِله کی، اونون بول نعمتلرئندن دادیب حظّ آلاسینیز.»

12چونکی رب بله دیئر: «باخین، من اَمئن-آمانلیغی بئر چای کئمی، مئلّتلرئن ثروتئنی داشقین سل کئمی اونا ساری آخیدیرام. سئز اوندان بَسلَنه‌جکسئنئز، قوجاغیندا آپاریلاجاقسینیز، دئزلرئنده نازلاناجاقسینیز.

13اؤولادینا تسلّی ورن بئر آنا کئمی من سئزه تسلّی وره‌جیم. اورشلئمده تسلّی تاپاجاقسینیز.

14او واخت بونلاری گؤره‌جکسئنئز؛ و اوره‌یئنئز سِوئنه‌جک؛ سوموکلرئنئز یاشیل اوت کئمی قووّتلَنه‌جک. ربّئن اَلی قوللارینین طرفئندن تانیناجاق، لاکئن قضبی دوشمنلرئنئن اوستونده اولاجاقدیر.»

15باخ، رب اود ائچئنده گلئر، اونون دؤیوش عارابالاری فیرلانان یِل کئمی‌دئر کی، قضبئنی اودلو و تَنبِهی اود آلووو کئمی تؤکسون.

16چونکی رب بوتون بشری اودلا، قیلینجی ائله موحاکئمه اده‌جک، و اونون قیلینجی ائله ییخیلانلارین سایی چوخ اولاجاقدیر.

17«باغلارا گئرمک اوچون اؤزلرئنی تقدئس ادئب تمئز ادنلر، اورتادا دورانین دالینجا گده‌رک، دونگوز، سئچان و باشقا نجئس حیوانلارین اَتئنی یئیَنلرئن هامیسی محو اولاجاقلار.» رب بویورور.

18«چونکی من اونلارین عمل‌لرئنی ده، فئکئرلرئنی ده بئلئرم؛ او واخت یِتئشئر کی، بوتون مئلّتلری و دئل‌لری بئر یِره ییغیم. اونلار گلئب منئم شؤوکتئمی گؤره‌جکلر.

19من آرالاریندا بئر علامت قویاجاغام. اونلاردان قاچیب-قورتولانلاری من باشقا مئلّتلره گؤندَ‌ره‌جیم: تَرشئشه، پولا، ماهئر اوخ‌آتانلارین وطنی لودا، توبَله، یونانا، شؤهرتئمی اشئتمه‌ین، شؤوکتئمی گؤرمه‌ین اوزاق ساحئل‌لره. و اونلار منئم شؤوکتئمی مئلّتلر آراسیندا اعلان اده‌جکلر.

20ائسرایئل اؤولادلاری تاخیل تقدئملرئنی تمئز قابلار ائچئنده ربّئن معبدئنه نجه گتئرئرلر، اونلار دا بوتون قارداشلارینیزی مئلّتلر آراسیندان تاخیل تقدئمی اولاراق آتلار بِلئنده، عارابالاردا، تخت‌روانلاردا، دَوه‌لر و قاطیرلار بِلئنده منئم موقدّس داغیم اورشلئمه گتئره‌جکلر.» رب بویورور،

21«اونلاردان بعضئسئنی من کاهئن و لاوئلی سچه‌جیم.»

22«یاراتاجاغیم تزه گؤیلر و تزه یِر قاباغیمدا نجه دورور، سئزئن ده نسلئنئز و آدینیز بله دوراجاق.» رب بویورور.

23«هر تزه آی مراسئمئنده، هر سَبّت گونونده بوتون بشر گلئب قاباغیمدا سجده اده‌جک.» رب دیئر.

24«او واخت اونلار اِشئیه چیخاجاقلار، و منئم ضئدّئمه عاصی اولانلارین مِیئتلرئنی گؤره‌جکلر. چونکی قوردلاری اؤلمیه‌جک، اونلاری یاندیران آلوو سؤنمیه‌جک. و بوتون بشر اونلاردان ائیره‌نه‌جک.»