Isaiah 39

azerbaijan-2013

1او زامان بابئل پادشاهی بَلَدان اوغلو مِرودَک‌بَلَدان، خئزقئیایا مکتوبلار و هدئیّه‌لر گؤندَ‌ردی، چونکی خئزقئیانین ناخوشلادیغینی و ساغالدیغینی اشئتمئشدی.

2بونلار خئزقئیانی سِوئندئردی. او، خزئنه‌سئنده اولان شیلری یعنی قیزیل-گوموشو، عطرئیّاتی، قئیمتلی یاغلاری، سئلاح آنبارینداکی بوتون اشیالاری اِلچئلره گؤرستدی. خئزقئیانین ساراییندا و بوتون پادشاهلیغیندا اونلارا گؤرستمه‌دئیی بئر شی قالمادی.

3او واخت اِشَعیا پیغمبر خئزقئیا پادشاهین یانینا گلئب، اوندان سوروشدو: «بو آداملار نه ددئلر؟ سنئن یانینا هارادان گلدئلر؟» خئزقئیا جاواب وردی: «اوزاق بئر اؤلکه‌دن، بابئلدن گلئبلر.»

4اِشَعیا ددی: «سنئن ساراییندا نه گؤروبلر؟» خئزقئیا جاواب وردی: «ساراییمدا اولان بوتون شیلری گؤروبلر. خزئنه‌لرئمده، اونلارا گؤرستمه‌دئیئم بئر شی قالمادی.»

5او واخت اِشَعیا خئزقئیایا ددی: «قوشونلار ربّئن سؤزونو اشئت:

6”باخ، اِله گونلر گله‌جک کی، سنئن ساراییندا اولان هر شی و آتالارینین بو گونه قدر ییغدیقلاری شیلر بابئله آپاریلاجاق، هچ نه قالمایاجاق.“ رب دیئر.

7”سنئن نسلئندن اولان و سندن عمله گلن بعضی اوغوللارینی گؤتوروب آپاراجاقلار و اونلار بابئل پادشاهینین ساراییندا خاجه ادئله‌جکلر.“»

8سونرا خئزقئیا اِشَعیایا ددی: «ددئیئن ربّئن سؤزو یاخشی‌دیر.» چونکی دوشونوردو: «هچ اولماسا منئم دؤورومده صولح و اَمئن-آمانلیق اولاجاق.»

← Chapter 38 Chapter 40 →